Smiley face
Smiley face
Smiley face

زیاتر لە ٦٠ خێزانی ئاوارەی کەرکوک و خورماتوو گەیشتنە کامپی بەرزنجە

2017-10-21 15:01:13



ڕۆژنیوز – هاوکار مستەفا

 

زیاتر لە ٦٠ خێزانی ئاوارەی کەرکوک و خورماتوو گەیەشتوونەتە کامپی بەرزنجە و بەڕێوەبەری کامپەکەش ڕایدەگەیەنێت:"دابینکردنی پێداویستی بۆ ئاوارەکان لە توانای ئێمەدا نییە".

 

بەهۆی هێرشەکانی چەکدارانی حەشدی شەعبی و هێزە عیراقییەکان بۆسەر شاری کەرکوک شارۆچکەی خورماتووی سەربە پارێزگای سەلاحەدین، سەدان خێزانی کورد ئاواری شار و شارۆچکەکانی هەرێم بوون، لە شەوی ڕابردوویشەوە هاتنی بەشێک لە ئاوارەکان بۆ کامپی بەرزنجە، لە شارەدێی بەرزنجە-ی شارۆچکەی سەیدسادقی سەر بە پارێزگای سلێمانی دەستپێکردووە.

 

 

نیهایەت فەخرەدین، یەکێک لەو هاوڵاتیینەی کە لە شاری کەرکوک-ەوە ڕووی لە کامپی بەرزنجە کردووە، بە ڕۆژنیوز وت:"بەهۆی هاتنی چەکدارانی حەشدی شەعبی و ئاڵۆزبوونی بارودۆخی شاری کەرکوک، دروستبوونی مەترسی لەسەر ژیانی ماڵ و منداڵەکانمان، ناچار شارەکەمان جێهێشتووە".

 

 

ئەو هاوڵاتییە، ئاماژەی بەوەشکرد:"دوای گەیشتنمان بە شاری سلێمانی، لەلایەن وەزارەتی کۆچ و کۆچبەرانی عێراقییەوە داوامان لێکرا کە دەبێت بگوازرێینەوە بۆ کامپی بەرزنجە، ئێمەش بەناچاریی ڕوومان لەم کامپە کردووە، تا ئەوکاتەی چارەنووسمان بە لایەکدا دەکەوێت".


نیهایەت، داواشی لە بەرپرسانی هەرێم کرد، کە ئاوڕ لە ژیان و گوزەرانیان بدەنەوە، هەوڵەکانیان بخەنەگەڕ بۆ گەڕانەوەیان بۆ زێدی خۆیان.


هەروەها، کاروان عومەر، سەرۆکی لیژنەی دابەشکردنی پێداویستیی بەسەر ئاوارەکاندا، لە وەزارەتی کۆچ و کۆچبەرانی عێراق، بە ڕۆژنیوزی ڕاگەیاند:"ماوەی دوو ڕۆژە دەستمان کردووە بە دابەشکردنی هاوکاریی بەسەر ئاوارەکاندا و گواستنەوەیان بۆ ئەو کامپانەی، کە شوێنی نیشتەجێبوونیان لێیە، ئەمڕۆش ٦١ خێزانمان گواستووەتەوە بۆ کامپی بەرزنجە".

 

 

سەبارەت بە ژمارەی ئەو هاوڵاتییانەی، کە ئاوارەبوون و ڕوویان کامپەکان کردووە، ناوبراو، وتی:"بەشێوەیەکی گشتیی ناتوانین ئامارێکی وردی ئاوارەکان بخەینە ڕوو، بەڵام تەنها دوێنێ‌ زیاتر لە ٥٠٠ خێزان ڕوویان لە کامپی قوشتەپە کردووە، ئەمڕۆش ٦١ خێزان هاتوونەتە کەمپی بەرزنجە، جگە لەو خێزانانەی کە ڕوویان لە ماڵی خزم و کەسوکارییان کردووە، بڕیاڕیاریشە تا ئێوارەی ئەمڕۆ ٩٠ خێزانی تریش بگەنە کامپی بەرزنجە".

 

لەبارەی دابینکردنی پێداویستییەکانی ئەو ئاوارانە، بەتایبەت سووتەمەنی و خواردن، هاوژین عوسمان جێگری بەڕێوەبەری کامپی بەرزنجە بەڕۆژنیوزی ڕاگەیاند: کامپەکەمان توانای لە خۆگرتنی ١٤٠ خێزانی هەیە، دابینکردنی پێداویستی بۆ ئەو خێزانانەش، لە توانای ئێمەدا نییە بەڵکو ئێمە تەنها ئەوەمان لەسەرە داوا لە وەزارەت و لایەنە پەیوەندییدارکان و هاوڵاتیان بکەین، کە هاوکاریمان بکەن بۆ دابینکردنی سووتەمەنی و خۆراک، بۆیە ئەوەی بەدەستمان گەشتووە، بەشی نزیکەی هەفتەیەکمان دەکات".

 


هاوژین عوسمان، وتیشی:"لە ئەگەری مانەوەی زیاتری ئەم ئاوارانە، دەبێت حکومەتی هەرێم و ڕێکخراوەکانی بواری ئاوارەکان، هاوکاریی و خۆراک و سووتەمەنیی بەپەلە بگەیەننە کامپەکەمان، چونکە تا دێت پلەکانی گەرما نزم دەبنەوە و هیچ سووتەمەنی و ئامێرێکی گەرمکەرەوەشمان نییە دابەشی بکەین".

 

کامپی بەرزنجە، دەکەوێتە شارەدێی بەرزنجەی سەربە شارۆچکەی سەیدسادق، لەلایەن وەزارەتی کۆچ و کۆچبەرانی عێراقییەوە ماوەی سێ‌ ساڵە درووستکراوە، سەرەتا ئاوارە عەرەبەکانی پارێزگاکانی ناوەراستی عێراقی تێدابوون، ئێستا تەنها 10 خێزانی ئاوارەی عەرەبی تێدا ماوە.

 

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin