Smiley face
Smiley face
Smiley face

عێراق: لە پردێ دوو سەرباز کوژراون

2017-10-21 14:17:23



ڕۆژنیوز – ناوەندی هەواڵەکان

 

فەرماندەیی ئۆپەراسیۆنە هاوبەشەکانی عێراق ڕایدەگەیەنێت، کە لە شەڕەکەی دوێنێ-ی پردێ-دا دوو سەرباز کوژراون و ئاماژە بە دەستپێشخەریی پێشمەرگەش دەکات بۆ دروستبوونی شەڕ، فەرماندەیی هێزەکانی پێشمەرگەش لە سنوورەکە دەڵێت: ئێمە دەستپێشخەر نەبووین و تەنها بەرگرییمان کردووە.

 

ئەمڕۆ، فەرماندەیی ئۆپەراسیۆنە هاوبەشەکانی عێراق ڕاگەیەنراوێکی سەبارەت ڕاگەیەندراوەکەی دوێنێی فەرماندەیی پیشمەرگە لە میحوەری ڕۆژئاوای کەرکوک-پردێ لەبارەی شەڕەکەی دوێنێی شارەدێی پردێ-ی سەر بە شاری کەرکوک بڵاوکردەوە و بە ڕاگەیەندراوێکی نامۆی ناودەبات، لەبەرامبەریشدا جارێکی دیکە فەرماندەیی پیشمەرگە لە میحوەری ڕۆژئاوای کەرکوک-پردێ، ڕاگەیەندراوی بڵاوکردەوە.

 

لە ڕاگەیەندراوەکەی شانەی جەنگی عێراق-دا هاتووە:"ڕاگەیەندراوکەی فەرماندەیی پێشمەرگە لە هەولێر لەبارەی بڵاوکردنەوەی هێزەکانی فیدراڵی لە شارەدێی پردێ زیادەڕەویی و ناوردی و ناڕاستی تێدابووە".

 

هەروەها، هاتووە: بۆ ڕوونکردنەوەی ڕاستییەکان بۆ ڕای گشتی ڕایدەگەیەنین، کە دوای ئەوەی هێزەکانی فیدڕاڵی لە کەرکوک و ناوچەکانی سەر بە کەرکوک بڵاوکرانەوە بۆ پاراستنی ئاسایش و تەواوکردنی یەکە ئیداریەکانی کەرکوک و هێزەکانی دژە تیرۆر، پۆلیسی فیدڕاڵی، هێزە چەکدارەکانی یەکەی ٩، لە پردێ جێگیربوون.

 

ئاماژە بەوەشکراوە: هێزەکانی فیدراڵی پابەندبوون بە تەقەنەکردن، کەوتنە ژێر هێرشی هاوەن و موشەکی جۆری میلانی ئەڵمانی کە پێشمەرگە لە حکومەتی ئەڵمانیای وەرگرتووە و پردەکەی پردێ-شیان تەقاندووەتەوە.

 

لە ڕاگەیەندراوەکەدا، ئاماژە بە ژمارەی کوژراو و بریندارەکان کراوە و  هاتووە: دوو سەرباز کوژراون و پێنجی دیکەش برینداربوون.

 

جێگای ئاماژەیە، ‌فه‌رمانده‌یی هێزه‌کانی پێشمه‌رگه‌ له‌ میحوه‌ری ڕۆژئاوای که‌رکوک – پردێ، ڕاگەیەنداروێکی بڵاوکردەوە، کە تیایدا هاتبوو:"ئه‌مڕۆ سه‌رله‌به‌یانی هێزه‌کانی حەشدی شەعبی به‌ چه‌ک و تۆپ و تانکی ئه‌برامزی ئه‌مه‌ریکی هێرشێکی گه‌وره‌ و به‌ربڵاویان هێنایه‌ سه‌ر هێزه‌کانمان له‌ پردێ و به‌ره‌و جاده‌ی سه‌ره‌کی پردێ-هه‌ولێر.هێزه‌کانی پێشمه‌رگه‌ قاره‌مانه‌کانی کوردستان لێیان هاتنه‌ ده‌ست و به‌ره‌نگاریان بوونه‌وه و پاش گورزێکی کوشنده‌ پاشه‌کشه‌یان پێکرا"

 

هەروەها، هاتبوو:"له‌ ئه‌نجامی ئه‌م شه‌ره‌ دوو ده‌بابه‌ که‌ یه‌کێکیان ئه‌برامزی ئه‌مریکی بوو له‌ گه‌ڵ یه‌ک مدره‌عه‌ و زیاتر له‌ ١٢هه‌مه‌ڕ و ئالیات تێکشکێندران و ژماره‌یه‌کی زۆر کوژراو و برینداریان به‌دوای خۆیان دا راکێشا که‌ به‌ پێی هه‌واله‌کان زیاتر له‌ ١٥٠ چه‌کدار ده‌بن".

 

ئەمڕۆش لەدوای ڕاگەیەنداروەکەی شانەی جەنگی عێراق، فه‌رمانده‌ییه‌که‌ ڕاگەیەندراوێکی بڵاوکردەوە و تیایدا هاتووە"هێزی پێشمەرگە لە شوێنەکانی خۆی بووە و دەستپێشخەری شەڕ نەبووە و تەنها بەرگریی کردووە و توانیویەتی ڕێگە لە پەلامار و پێشڕەوی ئەوان بگرێت و هێرشەکەیان تێکبشکێنێت".

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin