Smiley face
Smiley face
Smiley face

موراد قەرەیلان سەرکەوتنی ڕەقەی پیرۆز کرد

2017-10-19 17:56:50



ڕۆژنیوز - ناوەندی هەواڵەکان

 

موراد قەرەیلان، ئەندامی کۆمیتەی بەڕێوەبەریی پارتی کرێکارانی کوردستان- پەکەکە، سەرکەوتنی ڕەقەی پیرۆز کرد و ڕایگەیاند، کە ڕزگارکردنی ڕەقە تێکۆشانی کۆنفیدرالی دیموکرات لە ڕۆژهەڵاتی ناوەڕاست بەهێزتر دەکات.

 

ڕەقە کە چەتەکانی داعش بە پایتەختی خەلافەت ناوزەدیان دەکرد، دوو ڕۆژ پێش ئێستا لەلایەن شەڕڤانانی هێزەکانی سوریای دیموکراتەوە ڕزگار کرا و ئەمڕۆ یەکینەکانی پاراستنی ژنان ڕزگارکردنی ئەو شارەیان بەتەواوی ڕاگەیاند، موراد قەرەیلان پەیامێکی بە بۆنەی ڕزگارکردنی ڕەقەوە بڵاوکردەوە.

 

قەرەیلان ڕایگەیاند: ڕزگارکردنی ڕەقە لە هەموو گەلانی سوریا، گەلی کوردستان و هەموو ڕۆژهەڵاتی ناوەڕاست پیرۆز دەکەین، ئەو کاتەی کۆبانێ لەلایەن چەتەکانی داعشەوە داگیر کرا، بە بەرخۆدانێکی چوار مانگە ئەو شارە ڕزگار کرا، ئێستاش ڕەقە پاش ئۆپەراسیۆنێکی چوار مانگ و نیوە لە چنگی چەتەکان ڕزگار کرا.

 

لە بەردەوامی پەیامەکەدا هاتووە: ڕزگارکردنی پایتەختی چەتەکانی داعش کە ترسی خستبووە دڵی هەموو خەڵکی جیهانەوە و ببووە مەترسییەکی گەورە بۆ سەر هەموو مرۆڤایەتی، سەرکەوتنێکی زۆر گەورە لە قەڵەم دەدرێت، لەلایەن کۆمیتەی بەڕێوەبەریی پارتی کرێکارانی کوردستانەوە ئەو سەرکەوتنە گەورەیە لە هەموو فەرماندە و شەڕڤانانی یەپەگە، یەپەژە و قەسەدە پیرۆزدەکەم، بەڕێوەبەریی پەکەکە ئەو سەرکەوتنە بە دەستکەوتێکی گەورە دەزانێت و بەرزی دەنرخێنێت.

 

قەرەیلان ڕاشیگەیاند: یادی هەموو شەهیدانی ئەو ئۆپەراسیۆنە دەکەینەوە، ئەوانەی لەو ڕێگایەدا شەهید بوون، شەهیدی ڕێگای مرۆڤایەتین، ئەوان بۆ تاهەتایە لە دڵی گەلاندا دەژین، بە گیانفیدایی ئەو شەهیدانەیە کە گەلانی کورد، عەرەب و هەموو گەلانی ناوچەکە و هەموو مرۆڤایەتی لە چنگی ئەو بەڵایە ڕزگار بوون، ئاگادارین کە ژمارەیەکی زۆری شەڕڤانی بیانیش بەشداری ئەو ئۆپەراسیۆنە بوون، یادی هەموویان دەکەینەوە.

 

لە بەشێکی دیکەی پەیامەکەیدا قەرەیلان ڕایگەیاند: تێکۆشان بۆ ڕزگارکردنی ڕەقە تێکۆشان بۆ دیموکراسی و ئازادی گەلان بوو، هیوای سەرکەوتنمان هەیە بۆ هەموو فەرماندەکان و شەڕڤانانی یەپەگە، یەپەژە و قەسەدە، کە داعشیان لە ناو برد، لەلایەکی دیکەوە تێکۆشانی هەموو ئەوانەی ڕۆڵیان هەبوو لە ئۆپەراسیۆنەکەدا بەرز دەنرخێنین، ڕزگارکردنی ڕەقە بە واتای ئازادیی گەلانی سوریا و لە سەر بنەمای برایەتیی گەلانی عەرەب و کورد و ئاشوری و هەموو گەلانی تر دێت و زەمینە ئامادەدەکات بۆ چارەسەرکردنی هەموو پرس و کێشەکان.

 

ئەو ئەندامەی کۆمیتەی بەڕێوەبەری پەکەکە لە کۆتاییدا ڕایگەیاند: کوڕان و کچانی کورد، عەرەب، سوریان و ئاشوری هەموو پێکەوە بۆ ڕزگارکردنی ڕەقە خوێنیان ڕژا، ئەوەش دەرفەتێکە بۆ دامەزراندنی کۆنفیدرالی دیموکراتی و نەتەوەی دیموکراتی لە سەر بنەمای برایەتی و ئاشتیی نێوان گەلان، ئێمە وەک پەکەکە باوەڕمان وایە، کە کێشەکانی سوریا و ڕۆژهەڵاتی ناوەڕاست بە ڕوانگەی نەتەوەی دیموکراتی و لە رێگای دیالۆگەوە چارەسەر دەکرێن، نەتەوەی دیموکراتی پێشتر لە شەداد، منبیج و تەبقا تاقی کراوەتەوە و سەلماندوویەتی دەتوانرێت لە ڕەقەش هەر بەو شێوەیە کێشەکان چارەسەر بکرێن.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin