Smiley face
Smiley face
Smiley face

کەنەکە ڕزگارکردنی ڕەقەی پیرۆز کرد

2017-10-19 17:14:10



ڕۆژنیوز - ناوەندی هەواڵەکان

 

بەبۆنەی ڕزگارکردنی ڕەقە لە چنگی چەتکانی داعشەوە، کەنەکە ڕاگەیەندراوێکی بڵاوکردەوە و ئەو سەرکەوتنەی پیرۆزکرد.

 

دوو ڕۆژ پێش ئێستا ڕەقە لەلایەن شەڕڤانانی هێزەکانی سوریای دیموکراتەوە لە چنگی چەتەکانی داعش ڕزگاربوو و ئەمڕۆش فەرماندەی یەپەژە بە خوێندنەوەی ڕاگەیەندراوێک ڕزگارکردنی ڕەقەی بە فەرمی بە ڕای گشتی ڕاگەیاند، کەنەکە لەو بارەیەوە ڕاگەیەندراوێکی بڵاوکردەوە.

 

کەنەکە ڕایگەیاند:بە قارەمانی و فیداکارییەکی بێوێنە، بە قوربانییەکی زۆر، دوای ١٣٤ رۆژ شاری رەقەی پایتەخت و بنکەی داعش، بە هەماهەنگی هێزە هاوپەیمانەکان، لەسەردەستی هێزەکانی سورپای دیموکراتی سوریا کە یەپەگەو یەپەژە تیایدا هێزی سەرکین، رزگار کرا، بە ڕزگارکردنی رەقە ئیدی داعش وەک هێزێکی خوێنڕیژ و تاریکپەرستی دژە مرۆڤایەتی بەرەوە کۆتایی دەچێت، ئەم سەرکەوتنە مەزنە سەرکەوتنی مرۆڤایەتییە، سەرکەوتنی ڕووناکییە بەسەر تاریکستاندا، ئەم سەرکەوتنە هی کورد و عەرەب و سریان و هەموو پێکهاتەکانی باکوری سوریایە، نیشانەی برایەتی و هاوکاری گەلان و بیروباوەڕە.

 

لە بەردەوامیدا کەنەکە ڕایگەیاند: لە هەڵمەتی رزگارکردنی رەقەدا یەکینەکانی پاراستنی ژن، یەپەژە ئەرکێکی مەزنی خستە سەر شانی خۆی، بە قارەمانی و فیداکارییەکی مەزن لە هەموو بەرەکاندا بەشداربوون، بەیاننامەی رزگارکردنی رەقە لە لایەن فەرماندار و شەرڤانانی یەپەژەوە راگەیەنرا، ئەمە ئاماژەی پێشکەوتنی ژنە، ئەمە نیشانەی شۆڕشی کۆمەڵایەتییە، ئەمە تۆڵەکردنەوەی هەموو ژنانی دیلە، بەتایبەتیش ژنانی دەڤەری شەنگاڵ.

 

ئەوەش هاتووە: ڕزگارکردنی رەقە نەک تەنیا کۆتایهێنانە بە دەسەڵاتی داعش، بەڵکو کۆتایی هێنانە بە تاریکستانی کۆنەپەرستی و دژە مرۆڤایەتی لەو ناوچەیە، مزگێنی دامەزراندنی سوریایەکی فیدراڵ و دیموکراتە، رزگارکردنی رەقە لەسەر ئاستی نێودەوقڵەتیش دەنگدانەوەو شکۆو بەرزکردنەوەی ورەی گەلی کوردستانە.

 

لەکۆتاییدا کەنەکە ڕایگەیاند: ئێمە وەک کۆنگرەی نەتەوەیی کوردستان سەرەتا لە کەسێتی شەهیدانی هەڵمەتی رزگارکردنی رەقەدا، هەموو گیانبەختکردوانی شۆڕشی رۆژاوا بە رێزەوە بەبیردێنینەوە، سەری رێز لەبەردەمیان دادەنەوێنین. ئێمە سەرکەوتنی رەقە لە شەڕڤانانی یەپەژە، یەپەگە و سوپای دیموکراتی سوریا، لە هاوپەیمانیی دژی داعش، لە هەموو پێکهاتەکانی باکوری سوریا، لە هەموو سوریا، لە گەلی کوردستان و هەموو جیهان پیرۆز دەکەین.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin