Smiley face
Smiley face
Smiley face

کەنەکە: پێویستە لە زوترین کاتدا هێزی بەرگریی و دیپلۆماسیی هاوبەش پێکبینین

2017-10-18 16:36:56



ڕۆژنیوز – ناوەندی هەواڵەکان

 

دەربارەی ئاڵۆزییەکانی ناوچە دابڕواوەکانی هەرێمی کوردستان و هێرشەکانی سوپای عێراق، کەنەکە ڕایگەیاند: ئێمە لەبەردەم هەڕەشەو مەترسی گەورەداین، پێویستە هەموو هێزو دینامیکە کوردستانییەکان لە پەیوەندی و هەماهەنگیدابن، لە زوترین کاتدا هێزی بەرگریی و دیپلۆماسیی هاوبەش پێکبینن.

 

لە بەرەبەیانی ١٦ی ئەم مانگە، هیزێکی هاوبەشی سوپای عێراق و حەشدی شەعبی، هێرشیان کردە سەر شاری کەروکوک و دواتریش چوونە شارەکەوە، دوێنێ بەهەمان شێوە چونە شەنگال و مەخموورو چەندین  شوێنی دیکە، لەوبارەیەوە کۆنگرەی نەتەوەیی کوردستان- کەنەکە، ئەمڕۆ ڕاگەیەندراوێکی بڵاوکردەوە.

 

لە راگەیەندراوەکەی کەنەکەدا هاتووە:"لە چەند ڕۆژی رابردوودا هێزەکانی حکومەتی عێراق و حەشدی شەعبی هێرشێکی بەربڵاویان کردە سەر ناوچە دابڕێنراوەکان و دەوروبەری کەرکوک، هەموو گەلی کوردستان چاوەڕێی و بەهیوابوون هێزی پێشمەرگە رووبەڕوویان ببنەوەو نەهێڵن پێشڕەوی بکەن، بەداخەوە سەرەڕای ئەوەی چەندین پێشمەرگە شەهید و بریندار بوون، بەڵام هێزەکانی پێشمەرگە پاشەکشەیان کردوو زۆر ناوچەیان چۆڵ کرد".

 

ئەوەش هاتووە:"حەشدی شەعبی کەوتنە ناو کەرکوک، دووزخورماتوو، داقوق، شەنگال، مەخمورو دەوروبەری موسڵ و چەند شوێنێکی تر. لە کەرکوک هێزێکی بچوکی گەریلاکانی هەپەگە لەگەڵ کۆمەڵێک لە پێشمەرگەی دێرین و خەڵکی خۆبەخش تا ماوەیەکی باش بەرخۆدانیان کرد، هێزەکانی حەشد هەر لە دووزخورماتووەوە دەستیان بە راونانی خەڵک و تاڵانکردن و سووتاندنی ماڵ و موڵکی هاووڵاتیان کرد، لە کەرکوکیش کەوتنە ئازاردانی خەڵک و سوتاندنی چەندین بنکەو بارەگای پارت و رێکخراوە کوردستانییەکان، لە ئاکامدا خەڵکێکی زۆر ئاوارەو دەربەدەر بوون".

 

کەنەکە ڕایگەیاندووە:"دوای ریفراندۆمی 25ی ئەیلول دۆخی باشوور بەرەو ئاڵۆزی و ناسەقامگیریی زیاتر چوو، هەر لە سەرەتاوە دەوڵەتانی تورکیاو ئێران بە هەماهەنگی لەگەڵ حکومەتی عێراق، دەستیان بە جووڵە کرد، کۆبوونەوەو رێککەوتنی هاوبەشییان لە دژی خواستەکانی گەلی کوردستان رێکخست و کەوتنە هەڕەشە، رێبەرایەتی باشوور بە پەلەو بێ حسابێکی ورد، بێ ئامادەکاریی ناوخۆیی و دەرەکی، بێ ئامادەکاریی سیاسی و دیپلۆماسی، لەهەمووی مەترسیدارتر، بێ ئامادەکاریی سەربازی پرۆسەی ریفراندۆمیان دەستپێکرد، ئەم بێ پلانییەش بووە هۆی روودانی کارەسات، بووە هۆی ئاوارەبوون و تالانکردنی خەڵک، بوو بە هۆی رووخانی ورەی خەڵک، بووە هۆی شکاندنی شکۆی گەلی ئێمە لە ناوخۆو دەرەوە، رێبەرانی باشووری کوردستان بەگشتی بەرپرسن لەم دۆخە".

 

کەنەکە لەسەر ئەم بارودۆخە دەڵێت:"نابێ هەروا تێپەڕێت، پێویستە گەلی کوردستان لێپرسینەوە لەو کەسانە بکات کە بوون بە هۆکاری ئەم ڕەوشە، ئەمڕۆ رۆژی پاساو هێنانەوەو وتووێژی بێ ناوەرۆک نییە،  نەیارانی ئێمە لەبەر دەرگان، دۆخەکە ئاڵۆز و ناڕوونە و ئێمە لەبەردەم هەڕەشەو مەترسی گەورەداین، پێویستە هەموو هێزو دینامیکە کوردستانییەکان لە پەیوەندی و هەماهەنگیدابن، لە زوترین کاتدا هێزی بەرگریی و دیپلۆماسیی هاوبەش پێکبینن، جگە لە هەماهەنگی و کاری هاوبەش، رێگایەکی تر نییە بۆ سەرکەوتن، ئێمە لاواز و بێتوانا نین، ڕۆژاوای کوردستان لەبەرچاومانە، ئەگەر یەکێتی و هەماهەنگیمان هەبێت، ئەگەر خاوەن بڕیار بین، ئەتوانین سەرکەوتن بەدەست بێنین، ئازادکردنی رەققە کە پایتەخت و بنکەی داعش بوو، نمونەیەکی زیندووە، نەیارانی ئێمە سەرەڕای ناکۆکیەکانیان، لەسەر دژایەتی کۆکن و رێککەوتوون، پێویستە ئێمە ئەو ڕاستییە ببینین و لێی فێربین".

 

لەکۆتاییدا کەنەکە ڕایگەیاند:"پێوستە حکومەتی عێراق ئەوە بزانێ کە ناتوانێ بە هێزی سەربازیی ئیرادەی خەڵکی کوردستان بشکێنێ، ئەبێ بە پێی یاسا و دەستور مامەڵ بکات و هەموو ئەکەسانەی دەستیان لە هێرش و تاڵانکردن و کاولکاری و دەربەریی خەڵکدا هەبووە، سزا بدرێن، ئێمە لەو بارەیەوە ئەو هێرشانەی حکومەت و هێزەکانی عێراق بۆسەر کوردستان بە توندی شەرمەزار دەکەین، ئامادەشین تا دوایی لەبەرامبەر ئەو هێرشانە بەرخۆدان بکەین، داوا لە رای گشتی و فەرمی جیهان و هێزە هاوپەیمانەکانیش دەکەین، کە تەنیا تەماشاوانی بارودۆخەکە نەبن، بەڵکو پشتگیریی گەلی کوردستان و مافە رەواکانی بکەن".

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin