Smiley face
Smiley face
Smiley face

هەپەگە وردەکاری شەڕی گەریلاکانیان لە کەرکوک بڵاودەکاتەوە

2017-10-17 19:14:23



ڕۆژنیوز - ناوەندی هەواڵەکان

 

فەرماندەیی کەرکوک-مەخموری گەریلاکانی هەپەگە، لەبارەی ڕووداوەکانی دوێنێی شاری کەرکوک، ڕاگەیەندراوێکی بڵاوکردەوە، تیایدا وردەکاری شەڕی گەریلاکانیان-ی لە کەرکوک خستووەتەڕوو.

 

بەرەبەیانی دوێنێ دووشەممە، هێزەکانی سوپای عێراق و چەکدارای حەشدی شەعبی، هێرشیان کردە سەر شاری کەرکوک، دوای کشانەوەی پێشمەرگە لەو شارە، گەریلاکانی هێزەکانی پارستنی گەل-هەپەگە و یەژاستار، لەناو شاری کەرکوک ڕووبەڕووی سوپای عێراق و چەکدارانی حەشدی شەعبی بوونەوە.

 

لە ڕاگەیەندراوەکەی هەپەگە-دا، هاتووە:"لە شەوی ١٦ تشرینی یەکەم، هێزەکانی سوپای عێراق و چەکدارانی حەشدی شەعبی هێرشێکی داگیرکەرانەیان بۆ ناوەندی شاری کەرکوک و دەوروبەری دەستپێکرد، لە دژی ئەو هێرشە، گەریلاکانمان بۆ پاراستی گەل خەتێکی پاراستنیان دانا، بە چۆڵ کردنی کەرکوک لەلایەن پێشمەرگە، لە هەندێک شوێن لەنێوان هێزەکانی ئێمە و سوپای عێراق و چەکدارانی حەشدی شەعبی شەر دروست بوو".

 

ئاماژە بەوەشکراوە:"لە بەرامبەر هێرشی سوپای عێراق و چەکدارانی حەشدی شەعبی، لە سەرلەبەیانیدا هێزەکانی پێشمەرگە دەوروبەری کەرکوک و دواتر لە هەموو بەرەکانی شەڕیان لە ناو شاری کەرکوک چۆڵکرد، لەو کاتەدا کە مەترسی لەسەر شارەکە هەبوو، پێویستبوو کە شاری کەرکوک بپارێزرێت و بەڕێوەبردنێکی هاوبەش دروست بکرایە، بەڵام‌ هێزەکانی پێشمەرگە لەم بارەیەوە هیچ شتێکیان بە ئێمە ڕانەگەیاند، کاتێک هێزەکانی پێشمەرگە بێ ئاگاداری ئێمە لە شارەکە کشانەوە، هێزەکانی ئێمە بۆ پاراستنی خەڵک چوونە ناو شاری کەرکوکەوە".

 

هەپەگە، لەبارەی پێشوزی خەڵک لە گەریلاکانیان، ڕایگەیاند:"خەڵکی کەرکوک لە ناوەندی شارەکە، کاتێک هێزەکانی ئێمە (هەپەگە-یەژاستار)-یان بینی، بە دروشم و خۆشحاڵییەکی زۆرەوە پێشوازییان لێکردین، بۆ ئەمەش هێزەکانی ئێمە ویستیان لەگەڵ خەڵک و پێشمەرگە دێرینەکان بۆ پاراستنی شارەکە، لەو سەنگەرانەی شەڕدا جێگیربوون کە پێشمەرگە لێی کشابوونەوە، پێشتریش هێزەکانمان بۆ پاراستنی خەڵک لەبەرامبەر چەتەکانی داعش لە ناوچەکەبوون، بەڵام کاتێک کە پێشمەرگە سەنگەرەکانی بەرگری و ناوەندی شارەکەیان چۆڵکرد، هێزەکانمان لە ناوەندی شاری کەرکوک و سەنگەرەکانی پاراستن ئامادەکارییان نەبوو".

 

لە بەردەوامی ڕاگەیەندراوەکەی هەپەگەدا، هاتووە"دوای کشانەوەی هێزەکانی پێشمەرگە و شکانی هێڵەکانی ڕووبەڕووبوونەوە، ئێمەش لەگەڵ ئەو خەڵکانەی کە دەیانویست ڕووبەڕووببنەوە، هێڵێکی نوێی پاراستنمان دروستکرد، پێشتریش ئێمە ڕامانگەیاندبوو، کە لە شەڕێکی وەهادا لایەنگری هیچ کەسێک نین، هەتاوەکو هێرش لەدژی هێزەکانمان و گەلەکەمان دروست نەبێت، ئێمە لەگەڵ هیچ هێزێکدا شەڕ ناکەین".

 

هەپەگە، باسی لەوەشکردووە:"دوای نیوەڕۆی دوێنێ، کاتێک کە گروپی کۆتایی پێشمەرگە لە کەرکوک پاشەکشەیان کرد، شڵەژانێک دروست بوو، ژمارەیەکی زۆری خەڵک شارەکەیان چۆڵکرد، گەریلاکانی ئێمە لەگەڵ ئەو پێشمەرگانەی کە نەیاندەویست کەرکوک چۆڵبکەن و بەشێک لە خۆبەخشان، لە بەرەکانی شەڕدا بەتەنها مانەوە، لەگەڵ کشانەوەی گروپی کۆتایی پێشمەرگەدا، هێزەکانی سوپای عێراق و چەکدارانی حەشدی شەعبی بە تانکوتۆپ، هاوەن و چەکی قورس لە گەڕەکەکانی فەیلەق و عەرەفەیان دا، ئەو هێزانەمان کە لە گەڕەکی فەیلەق بوون، بوونە ئامانجی ئەو هێرشانە، هێزەکانمان لەدژی ئەو هێرشە، وەڵامێکی توندیان دایەوە و شەڕێکی سەخت ڕوویدا، کاتێک لە گەڕەکی فەیلەق شەڕ بەردەوام بوو لەگەڵ چەکدارانی حەشدی شەعبی، لە لەسەر ڕێگای هەولێر-کەرکوک لە گەڕەکەکانی شۆراو و ڕەحیم ئاوا، کە دەیانویست بچنە ناویەوە ماوەیەک شەڕ دروست بوو".

 

لە کۆتایی ڕاگەیەنداوەکەی فەرماندەیی کەرکوک-مەخموری هێزەکانی پاراستنی گەل-هەپەگە، ئاماژە بەوەشکراوە:"تەواوی ڕۆژەکە شەڕ بە سەختی بەردەوام بوو، کاتێک کە لە زۆر ناوچەی شارەکە شەڕ بەردەوام بوو، ئەو خەڵکە کەمەی کە مابوون لە ناو شارەکەدا، ئەوانیش شارەکەیان چۆڵکرد، بەو هۆیەشەوە هێزەکانمان بە تەنها مانەوە لەناو شارەکەدا، کاتێک کە بینیمان دۆخەکە بەوشێوەیە، بەشێک لە هێزەکانمان کشاندەوە بۆ ناوچە ئارامەکان، بەڵام تاوەکو بەیانی ئەمڕۆش، ئەو هێزانەمان کە مابوون لەناو کەرکوکدا بوون، ئەم بەیانییە هێزەکانی خۆمان کە مابوونەوە، بە هێڵێکی پاراستن کشاندمانەوە بۆ ناوچە ئارامەکان".

 

ب.ل



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin