Smiley face
Smiley face
Smiley face

شێخ جەعفەر: هێزە عێراقییەکان بەتەمابوون پەلاماری کەرکوک بدەن

2017-10-13 12:58:08



ڕۆژنیوز- سۆران محەمەد

 

فەرماندەی هێزەكانی ٧٠ی پێشمەرگە، شێخ جەعفەر شێخ مستەفا، ڕایدەگەینێت: هێزە عێراقییەکان بەتەمابوون پەلاماری کەرکوک بدەن، ئاشکراشی دەکات کە هێزەكانی پێشمەرگە بە هیچ شێوەیەك لە سەنگەرەكانیان ناكشێنەوە، وەستا ڕەسووڵ-یش، دەڵێت"دووژمنەكانمان زۆرن، چۆك بۆ هیچ لایەنێك دانادەین".

 

نیوەڕۆی ئەمڕۆ، فەرماندە باڵاكانی هێزەكانی پێشمەرگە، لە بارەگای میحوەری چواری هێزەكانی پێشمەرگە لە كەركوك كۆبوونەوە و دواتر کرنگرەیەکی رۆژنامەنووسیان ڕێکخست.

 

لە سەرەتای كۆنگرە ڕۆژنامەوانییەکەدا، شێخ جەعفەر شێخ مستەفا، فەرماندەی هێزەکانی ٧٠ی پێشمەرگە، ڕایگەیاند:"ئێمە ئاشتی خوازین و دەمانەوێت كێشەكان بە گفتوگۆ چارەسەر بكەین، ئێمە شەڕمان ناوێت، هێزەكانی حەشدی شەعبی و سوپای عێراق داوایان كردووە، بگەڕێنەوە بۆ هێڵی سەوز، هێڵی سەوز ئەو ناوچانەن كە پێش شەڕی داعش هەبوو، واتا ئەو شوێنانەی كە پێشتر بە دەستی سوپای عێراقەوە بوو و ئێستا لە دەستی پێشمەرگەیەدا، بەڵام هێزەكانی پێشمەرگە بە هیچ شێوەیەك لە سەنگەرەكانیان ناكشێنەوە".

 

ڕاشیگەیاند:"سوپای عێراق و حەشدی شەعبی بەرنامەیان هەیە، لە خانەقینەوە تا ناوچەكانی نزیك لە مەخموور نزیك بێتەوە لە سەنگەرەكانی پێشمەرگە، بۆ ئەوەی كە ناوچەكانی پێشووتری سوپای عێراق وەربگرنەوە، دیارە ئەمانە سونەیان لە ناوبرد و ئێستاش دەیانەوێت بەرنامەكانیان لەو ناوچەیە جێ بەجێ بكەن".

 

ئاماژەی بەوەش كرد:"حەشدی شەعبی و پۆلیسی فیداراڵی و فرقەی ئاڵتوونی و فرقەی 9ی مودەڕەعە، لە گوندی بەشیر هێزێكی زۆریان كۆكردوەتەوە، ئەو هێزانە پەیامیان بۆ وەستا ڕەسووڵ ناردووە، كە دەبێت لە ماوەی 48 كاتژمێردا، سەنگەرەكانی پێشمەرگە ڕادەست بكەن، بەڵام، وەستا ڕەسوڵ، بەشێوەیەك وەڵامی داونەتەوە كە كوردەواری دەڵێت، لوتیان تەزێندراوە".

 

دەربارەی كشانەوە هێزەكانی پێشمەرگە، شێخ جەعفەر، وتی:"بۆ پاراستنی كەركوك و سەرجەم فەرمانگە و بەڕێوبەرایەتییەكان، هێزی پێشمەرگە لە ماوەی ڕابردوو، زیاتر لە 20 كیلۆمەتر چووەتە پێشەوە، ئەوەی كە كراوە، پلانی سەربازییەوە بۆ پاراستنی هێزەكانی پێشمەرگەیە، چونكە سەنگەری پێشووی هێزەكانمان زۆر تۆكمەن بۆ ڕووبەڕووبوونەوە، بۆیە گەڕانەوتەوە ئەو سەنگەرە كۆنكرێتەی لە سەردەمی هەبوونی داعش لەو ناوچەیە دروست كرابوو".

 

وەستا ڕەسووڵ، فەرماندەی میحوەری چواری هێزەكانی پێشمەرگە، لە كۆنگرەكەدا، وتی:"دووژمنمان زۆرە، هەرگیز پێشمەرگە چۆك بۆ هیچ دوژمنێك دانادات، ئێمە سەنگەرەكانمان تۆكمەن، ئامادەین بۆ هەر ئەگەرێكی نەخوازراو، بەڵام بەڕاستی ئێمە شەڕمان ناوێت و دەمانەوێت كێشەكان بە گفتوگۆ چارەسەر بكەین".

 

ئەوەشی وت:"سەرجەم هێزەكانمان لە حاڵەتی ئامادە باشی دان، تا تەقەمان لێ نەكەن و هێرش نەكەنە سەرمان، ئێمە هیچ هێرشێك ئەنجام نادەین، ئەگەر هێرش ئەنجام بدەن، ئەوا هەر كەس كوڕی باوكی خۆیەتی، ئێمە ڕۆڵەی كوردستانین و ئامادەین بە گیان، بەرگری لە كوردستان و كەركوك بكەین".

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin