Smiley face
Smiley face
Smiley face

سۆزدار ئاڤێستا: چالاکییەکان بەردەوامن تا تێکشکاندنی زیندانی ئیمرالی

2017-10-13 10:48:08



ڕۆژنیوز - ناوەندی هەواڵەکان

 

سۆزدار ئاڤێستا، ئەندامی کۆنسەی سەرۆکایەتیی گشتیی کۆما جڤاکێن کوردستان- کەجەکە، دەڵێت، گەلەکۆمە هەمیشە بەردەوامە و ئێستا بە قڕکردنی سیاسی و کلتوری و سیاسیی ئەو گەلەکۆمەیە ئەنجام دەدرێت، سەبارەت بە چالاکییەکانی دژی گۆشەگیریی ئیمرالیش وتی: تا کاتی تێکشکاندنی زیندانی ئیمرالی چالاکییەکان بەردەوامیان دەبێت.

 

ئاڤێستا شەوی ڕابردوو میوانی بەرنامەی ڕۆژەڤی ژنی تەلەفزیۆنی ستێرک تیڤی بوو و لە بارەی گەلەکۆمەی دژی عەبدوڵا ئۆجالان، ڕێبەری پەکەکە دوا.

 

سۆزدار ئاڤێستا وتی: کاتێک گەلەکۆمەی نێودەوڵەتی دەستیپێکرد، بیرمان کردەوە کە وەک بزووتنەوەی ئازادیخوازی گەلی کورد چۆن ڕێبەرەکەمان بپارێزین، کاتێک هەڤاڵان بینییان کە ڕێبەر ئاپۆ چۆن لە ڕۆژهەڵاتی ناوەڕاست چووە دەرەوە تێگەیشتن کە گەلەکۆمەیەک لە ئارادایە، بۆیە لە بەرامبەردا هەڵوێستێکی شۆشگێڕانەیان گرت و بازنەیەکی ئاگرینیان لە دەوری ڕێبەر ئاپۆ دروست کرد، ڕێبەر ئاپۆ هەموو لایەنە مێژوویی و فەلسەفی و ئابورییەکانی گەلەکۆمەی شرۆڤە و ئاشکراکردووە، گەلەکۆمە نەک تەنیا دژی ڕێبەر ئاپۆ، بەڵکو دژی هەموو گەلی کورد و گەلانی ڕۆژهەڵاتی ناوەڕاست بەڕێوەچوو.

 

ئاڤێستا بەم شێوەیە بەردەوامی بە قسەکانی دا: ئەو هێزانەی گەلەکۆمەی ٩ی ئۆکتۆبەریان بەرێوەبرد، ئەمڕۆکە لە ڕۆژهەڵاتی ناوەڕاستدا سەرکێشی دەکەن، ئەمریکا، بەریتانیا و ئیسرائیل، تورکیایان وەک داردەستێک بەکارهێنا، هەر ئەو هێزانەش بوون کە ئەردۆغانیان ئامادەکرد بۆ حوکمڕانی تورکیا، ئەوان بە ئەنجامدانی گەلەکۆمە هەوڵیاندا ئەردۆغان وەک ڕێبەری گەلان بخەنە گۆڕێوە.

 

ئەو ئەندامەی کۆنسەی سەرۆکایەتیی گشتیی کەجەکە وتیشی: ژنان و گەلی کورد بەدیلگرتنی رێبەر ئاپۆیان قبوڵ نەکرد و نایکەن، ئەو گەلەکۆمەیە دژی ژنانیش بوو، دوژمن هەوڵیدا ئەو دەرگایەی لەلایەن ڕیبەر ئاپۆ و بزووتنەوەی ئازادیخوازی گەلی کورد بۆ ژنان کرابووەوە دابخات، ١٩ ساڵە کە چالاکیی دژی گۆشەگیرکردنی ڕێبەر ئاپۆ ئەنجام دەدرێت، دوژمن دەیەوێت بە گۆشەگیرکردنی ڕێبەرایەتی ڕێگانەدات هزر و فەلسەفەی بگاتە بزوتنەوەی ئازادیخوازی و گەلانی ناوچەکە، بەڵام ڕێبەر ئاپۆ بە پارادایم و هزر و فەلسەفەیەکی نوێ لە ئیمرالییەوە هاتە دەرەوە، ڕێبەر ئاپۆ وتی:"لەم زیندانە تاکەکەسییەدا حەقیقەتی مرۆڤی ئازاد بۆم واتایەکی گەورەتری هەیە".

 

لە بەشێکی دیکەی قسەکانیشیدا وتی: پێویستە هەنگاوەکانی دژی گەلەکۆمە تەواوکەری یەکدی بن، پێویستە چالاکییەکان جەماوەری و بە ئامادەبوونی ژمارەی زۆر ئەنجام بدرێن، نابێت ئەو چالاکییانە هیچ سنوورێکیان هەبێت، هەمووان باش دەزانین کە ئازادیی ڕێبەر ئاپۆ ئازادیی هەموومانە، ئێستا گەلەکۆمە لە بواری کلتوری و سیاسی و کۆمەڵگاییەوە بەڕێوەدەبرێت، پێویستە چالاکییەکان بەپێی گەلەکۆمەی نوێ، نوێ بکرێنەوە و بەرفراوانتر ببنەوە، تا کاتی تێکشکاندنی زیندانی ئیمرالی چالاکییەکان بەردەوامیان دەبێت و بەرفروانتر دەبنەوە.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin