Smiley face
Smiley face
Smiley face

هاوسەرۆکی پەیەدە: دەرگاکانمان بۆ باشوری کوردستان کراوەیە لە هەموو هەلومەرجێکدا

2017-10-10 12:49:08



ڕۆژنیوز - هۆزان زوبێر

 

شاهۆز حەسەن، هاوسەرۆکی پارتی یەکێتی دیموکرات- پەیەدە نوێنەرایەتیی هێڵی سێیەم دەکات، ئێستاش لە سوریا تەنیا هێڵی سێیەمە کە سەرکەوتووە، لەلایەکی دیکەوە لەبارەی باشوری کوردستانیشەوە دەڵێت، دەرگاکانی ڕۆژئاوای کوردستان لە هەموو هەلومەرجێکدا بۆ باشوری کوردستان کراوەن.

 

شاهۆز حەسەن کە لە کۆنگرەی حەوتەمی پەیەدەدا وەک هاوسەرۆکی ئەو حزبە هەڵبژێردرا، لە میانەی چاوپێکەوتنێکی تایبەتدا بۆ ڕۆژنیوز وەڵامی پرسیارەکانی پەیامنێری ئاژانسەکەمانی دایەوە لە بارەی بەرنامەکانی پەیەدە لە داهاتوودا، دۆخی باکوری سوریا و ڕۆژئاوا و یەکێتی نەتەوەیی و دۆخی باشوری کوردستان.

 

دەقی چاوپێکەوتنەکە:

 

ئێوە وەک پەیەدە ستراتژییە سیاسییەکانتان چۆن دەنرخێنن؟

 

"بۆ چارەسەرکردنی پرسی کورد لە سوریا تێدەکۆشین"

 

شاهۆز حەسەن: لە ڕۆژی دەستپێکی دامەزرانی پەیەدەوە هەتاکو ئێستا بەرنامەی حزبەکەمان چۆنییەتی چارەسەرکردنی پرسی کورد و بەدیموکراتیکردنی سوریا بووە، پەیەدە بەردەوام لە سەر ئەو بنەمای تێکۆشانی کردووە، لە دەستپێکدا کێشە و گرفتی زۆرمان هەبوو، شەهیدی زۆرمان دا، هەڤاڵ شیلان باقی لەگەڵ چەند هەڤاڵی دیکەی لە موسڵ شەهیدبوون، سەدان هەڤاڵی دیکەمان ڕەوانەی زیندانەکانی سوریا کران، ئەوانە هەموو بەشێک بوون لە تێکۆشانی حزبەکەمان، ئەگەر لە سوریا پرسی کورد چارەسەر نەکرێت، هیچ کێشەیەکی دیکەش چارەسەر ناکرێت، ناکرێت بڵێی من وڵاتێکی دیموکراتم و زمانی گەلێک قەدەغە بکەیت و هەبوون و شوناسەکەی ئینکار بکەی، بۆیە ئێمە وەک پەیەدە بۆ چارەسەرکردنی پرسی کورد لە سوریا تێدەکۆشین بیر لە سیستمێکی دیموکراتی دەکەینەوە بۆ سوریا.

 

لە سوریا چەندین لایەنی باڵادەست هەن، ئێوە لایەنی کامیان دەگرن؟

 

"ئێمە هێڵی سێیەم مان هەڵبژارد"

 

شاهۆز حەسەن: کاتێک ئاڵۆزییەکان لە سوریا دەستیان پێکرد، ئێمە هێڵی سێیەم مان هەڵبژارد، لە ڕووی پراکتیکەوە هەنگاوی زۆر گرنگمان ناوە، بۆ دامەزراندنی سیستمێکی دیموکراتی کە لە سەر بنەمای ئەنجومەنەکان و کۆمۆنەکان پێکدێت، تێکۆشانی زۆرمان ئەنجام دا، لە دەستپێکدا ئەوە زۆر سەخت بوو، سەرەتا هەمووان دوور دەکەوتنەوە لێمان، بەڵام کاتێک بینییان کە ئەو سیستمە لە سەر بنەمای دۆستایەتیی گەلان و ژیانی هاوبەش پێکهاتووە بۆچوونەکانیان گۆڕا، ئێستاش بەرەو قۆناغی فیدراسیۆنی باکوری سوریا هەنگاومان ناوە، تا ئێستا سەرکەوتوو بووین، باوەڕمان وایە لەمەودواش هەر وا دەبێت، بەڵام پێویستە زیاتر هەوڵ بدەین.

 

ماوەیەک پێش ئێستا ڕژێمی سوریا ڕاگەیەندراوێکی بڵاو کردەوە و ڕایگەیاند، کە ئامادەن لە بارەی چارەسەری کێشەکاندا لەگەڵ کورد دانیشن، ئایا پێتان وایە سیاسەتەکانی ڕژێمی سوریا گۆڕابێت؟

 

"دەمانەوێت دەرفەت بدرێت بۆ دانوستان"

 

شاهۆز حەسەن: ئێمە باوەڕمان بە دیالۆگ هەیە، دەمانەوێت دەرفەت بدرێت بۆ دانوستان و هەموو کێشەکان لە ڕێگای دیالۆگەوە چارەسەر بکرێن، هیوادارین ئەو ڕاگەیەندراوەی حکومەتی سوریا لە ئاستی قسەدا نەبێت و هەنگاوی پراتیکیشی بۆ بنێن، ئەگەرچی هەڵوسوکەوتی ڕابردوویان ئەوە پیشان نادات، بەڵام هیوادارین گۆڕانکاری پێکهاتبێت، چونکە جگە لە دیالۆگ و دانوستان هیچ ڕێگای هەبوونی نییە بۆ چارەسەرکردنی پرسەکان.

 

کاریگەریی هێزە دەرەکییەکان لە سەر ناوخۆی سوریا لە چ ئاستێکدایە؟

 

"کاریگەریی ڕوسیا لە ناوخۆی سوریادا ڕۆژ لەدوای ڕۆژ زیاتر دەبێت"

 

شاهۆز حەسەن: پێموایە کاریگەریی چەند وڵاتێکی گەورەی وەکو ئەمریکا و ڕوسیا لە سەر سوریا هەیە و لە داهاتووشدا ئەو کاریگەرییە دەبێت، ئێمە باوەڕمان وایە کە پێویستە بتوانین لەگەڵ یەکدی دانیشین و بە قبوڵکردنی جیاوازییەکانمان یەکدی تەحەمول بکەین و دانوستان بکەین، کاریگەریی ڕوسیا لە ناوخۆی سوریادا ڕۆژ لەدوای ڕۆژ زیاتر دەبێت، ئەگەرچی ئێران و چەند ولاتێکی دیکەش کاریگەرییان لە سەر سوریا هەیە، بەڵام ئەوەندەی ڕوسیا نییە کاریگەرییەکەیان، پێمانوایە ئەگەر ڕوسیا خۆی بە بەرپرسیار بزانێت، دەتوانێت لەم دۆخەدا ڕۆڵی مێژوویی بگێڕێت بۆ چارەسەری ئاڵۆزییەکان، بەڵام ئەگەر بە هەڵە لە پرسەکان تێبگەن، هەرگیز ئەوە ڕووندات و کێشەکان قووڵتردەبنەوە.

 

 

هێڵە باڵادەستەکان لە سوریا کامانەن؟

 

"هێڵی سێیەم ئێمەین، ئێمە نەلایەنگری هێڵی مەزهەب پەرستین و نە لایەنگری هێڵی نەتەوە پەرستی"

 

شاهۆز حەسەن: لە سوریا سێ هێڵی بەرچاو هەن، یەکەم ڕژێم، کە بەردەوام پێی وایە دەتوانێت دۆخەکە بگەڕێنێتەوە پێشتر، ئێران کە حزبوڵا و ئەو دەستە چەکدارە شیعانەی لە ئەفغانستان و عێراقەوە هاتوون پشتگیریی ئەو هێڵە دەکەن، دووەمین هێڵ کە لە سەرەتاوە بە پشتگیریی سعودییە و تورکیا و قەتەر و تا ڕادەیەک ئۆردن پێکهات، بیری سەلەفییەکان و ئیخوان موسلمینە، نوێنەرانی ئەو هێڵە چەند قۆناغی جیاوازیان تێپەڕاندووە هەتاکو ئەمڕۆ، نوسرە و داعش، ئەحراری شام و... هتد، ئێستا دۆخەکە گۆڕاوە و پارچە بوون، ئێستا سعودییە و میسر و ئۆردن پشتگیریی لایەنێک دەکەن و تورکیا و قەتەریش لایەنی بەشێکی دیکەیان دەگرن، بەدڵنیاییەوە دەتوانین بڵێین کە هیچ شانسێکیان بۆ سەرکەوتن نەماوە، بۆیەشە تورکیا ڕاستەوخۆ و بە هێزە سەربازییەکانی خۆیەوە هاتە ناو سوریاوە، ئەو هاتنەش وەک هەڕەشەیەک بۆ سەر سیستمی فیدراڵی باکوری سوریا لە بەر چاو دەگیرێت، تورکیا بەتایبەتی هەوڵ دەدات بۆ ئەوەی ئاڵۆزییەکان قووڵتر بکاتەوە، هێڵی سێیەم ئێمەین، ئێمە نەلایەنگری هێڵی مەزهەب پەرستین و نە لایەنگری هێڵی نەتەوە پەرستی، ئێمە لە سەر ئەو باوەڕەین کە پێویستە ئەوانە تێپەڕ بکەین و ژیان لە سەر دیموکراسی و دۆستایەتی و ژیانی هاوبەش دامەزرێنێن، لە باکوری سوریا سیستمێکمان پێکهێناوە کە هەموو پێکهاتەکان تێیدا بەشدارن، سەدان هەزار کەس بەشداری هەڵبژاردنی کۆمۆنەکان بوون، لەلایەکی دیکەوە وەک هێزی شەڕ زەربەی زۆر قورسمان لە چەتەکانی داعش دا، ئەگەر هیوایەک لە سوریادا مابێت، هیوا بەو سیستمەیە، ئەنجومەنی سوریای دیموکراتی لە پێکهاتە و کەسایەتییە جیاوازەکانی باکوری سوریا پێکدێت، هەمووان لە بەرامبەر ئەو سیستمەی ئێمە ئاراستەمان کردووە واق وڕ ماون.

 

ڕاگەیەندراوێک بڵاوکرایەوە و ڕاگەیەندرا کە ئەگەر هێرش بکرێتە سەر باشوری کوردستان ئێوە پشتیگریی باشور دەکەن، چۆن ئەو پشتگیرییە ئەنجام دەدەن؟

 

"دەرگاکانمان بۆ باشوری کوردستان کراوەیە لە هەموو هەلومەرجێکدا"

 

شاهۆز حەسەن: ئەگەر ئەو ڕیفراندۆمە لە سەر بنەمای ئیرادەی گەل پێکهاتبێت و ڕێژەیەکی بەرچاویش دەنگی بەڵێیان پێدابێت، پێویستە هەمووان ڕێزی لێ بگرن، ئەگەر لە شوێنێک گەل دەیانەوێت چارەنووسی خۆیان دیاری بکەن، پێویستە هەمووان ڕێزی لێبگرن، لە هەر شوێنێک پێویست بێت ئێمە پشتگیرییان دەکەین، وەکچۆن پشتگیریی شەنگالمان کرد، پشتگیریی باشوری کوردستانیش دەکەین، وەکچۆن لە ڕۆژهەڵاتی کوردستانەوە و هاتن لە کۆبانێ شەهید بوون، ئێستا خوێنی شەهیدان وەک هەوێنی یەکێتی نەتەوەیی ڕۆڵ دەگێڕێت، پێویستە ئاڵۆزییەکانی نێوانمان وەلا نێین، ئێستا کورد زیاتر لە هەمیشە پێویستی بە یەکێتی نەتەوەیی هەیە و ئەوەش لەبارەی ڕۆژئاوا و باشوریشەوە ڕاستە، کاتێک دەوڵەتانی دژە کورد لەگەڵ یەکدی کۆدەبنەوە و هەڵوێستی هاوبەش دەگرن دژی کورد، چۆن دەبێت ئێمە لە ناوخۆمان دا نەتوانین پێکەوە دانیشین، دەرگاکانمان بۆ باشوری کوردستان کراوەیە لە هەموو هەلومەرجێکدا.

 

کۆچی دوایی مام جەلال چ کاریگەرییەکی لە سەر تێکۆشانی گەلی کورد دەبێت؟

 

"ئامادەین پشتگیریی میراتەکانی مام جەلال بکەین"

 

شاهۆز حەسەن: کۆچی دوایی مام جەلال بۆ گەلی کورد بە واتای لە دەست دانی شتێکی زۆر گەورە بوو، ئەو کەسێک بوو کە هەموو تەمەنی بۆ تێکۆشان تەرخان کرد، دانوستانی بەهێزی بە هەرچوار پارچەی کوردستانەوە هەبوو، بەتایبەتی لە ساڵی ١٩٩٣دا لە دانوستانەکانی نێوان دەوڵەتی تورک و پەکەکەدا ڕۆڵی گرنگی گێڕا، ئێستا پەیوەندییەکانمان بە یەکێتی نیشتمانییەوە زۆر باشە، پشتگیریی زۆریان کردووین، نامانەوێت دەستێوەردانی دۆخی ناوخۆی باشور بکەین و باسی بکەین، بەڵام ئامادەین پشتگیریی میراتەکانی مام جەلال بکەین.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin