Smiley face
Smiley face
Smiley face

عەبادی: دەوڵەتی تایفی و ڕەگەزپەرستی ڕەت دەکەینەوە

2017-09-24 18:54:28



ڕۆژنیوز – ناوەندی هەواڵەکان

 

سەرۆکوەزیرانی عێراق لە وتەیەکدا ڕایگەیاند، دەوڵەتی تایفی و ڕەگەزپەرستی ڕەت دەکەینەوە، هاوکات لەهەمان وتەدا باس لەوە دەکات کە دەستبەرداری شارۆمەندە کوردەکانمان نابین، ئێمە مەترسیمان لەسەر هەولێر دوورخستەوە، بەداخەوە دەبینین کە دەگەڕێنەوە بەرەو سەردەمی تاریکی و دەسەڵات و دیکتاتۆرییەت.

 

سەرلەئێوارەی ئەمڕۆ، حەیدەر عەبادی، سەرۆکوەزیرانی عێراق، لە وتەیەکیدا باسی پرسی ڕیفرادۆم و ناکۆکییەکانی لەگەڵ حکومەتی هەرێم کرد.

 

لە سەرەتای وتەکەیدا هاتووە: لە ڕۆژانێکدا کە شەڕ دژی تیرۆر تووندتر دەبێتەوە نزیک دەبینەوە لە سەرکەوتنی یەکجارەکی بەسەر تیرۆریستان لە رۆژئاوای ئەنبار و حەویجە و ڕۆژئاوای کەرکوک و هەموو شوێنەکانی دیکە، نەخشەی عێراق ڕووبەڕووی هەوڵی دابەشکاریی و هەڵوەشاندنەوەی عێراقی یەکگرتوو دەبێتەوە، هەوڵ دەدرێت تەفرەقە بخرێتە نێوان ڕۆڵەکانی یەک وڵات لەسەر بنەمای نەتەوەیی و ڕەگەزپەرستی و ڕووبەڕووبوونەوەی مەترسی کە خوا نەبێت کەس نازانێت داهاتووەکەی چی دەبێت.

 

ئەوەش هاتووە: لە کاتێکدا کە گەلی خۆمانمان یەکگرتوو کرد و جەنگاوەرەکانمان لە دژی چەتەکانی داعش وەستانەوە، لەپڕ هەوڵی تەفرەقە دەبینین و دەگەڕێینەوە بۆ سەردەمی تاریکی و دەسەڵاتدارییەتی دیکتاتۆرییەت.

 

لە بەشێکی دیکەیدا هاتووە: هێزەکانمان تکریت و ئەنبار و موسڵیان ڕزگار کرد و مەترسیشیان لە هەولێر و باکوری خۆشەویست دوور خستەوە، ئەوەش ئەرکێک بووە لەسەر شانمان و جێبەجێمان کردووە، ئەوەش بەرگریی بووە لە مرۆڤایەتی لەسەر خاکی عێراق.

 

لە بەشێکی دیکەی وتەکانیدا ئاماژە بەوەش کراوە: جەخت دەکەینەوە لەسەر ئەوەی کە ئێمە دەستبەرداریی هاووڵاتییە کوردەکانمان نابین، پێشتریش و ئێستاش دەوڵەتای تایفی و ڕەگەزپەرستی ڕەت دەکەینەوە، عێراق بۆ هەموو عێراقییەکان دەمیێنتەوە ڕێگە نادەین ئەم و ئەو ببنە خاوەنی خاکەکەی و بە ئارەزووی خۆیان دەستوەردانی تێدا بکەن بەبێ ئەوەی سزا بدرێن.

 

لە بەشێکی دیکەدا دەڵیت: ڕووی دەمم دەکەمە ڕۆڵەکانی گەلی کوردمان و دەڵێم، لە بەرپرسەکانتان بپرسن لە هەرێمی کوردستان، پارەی فرۆشتنی ئەو نەوتە بۆ کوێ دەچێت؟ کە ئێستاکە ڕۆژانە نزیکەی ٩٠٠ هەزار بەرمیل نەوت دەفرۆشرێت، ئەوەش دەکاتە نزیکەی چارەکێکی نەوتی هەموو عێراق، بۆ مووچەی کارمەندانی هەرێم نادەن، سەرەڕای ئەوەی کە برێ زۆرتر لە ژمارەی دانیشتوان دەردەهێنن و دەیفرۆشن بە بەراورد لەگەڵ شارەکانی دیکەی عێراق.

 

هەروەها دەشڵێت: لە بەرپرسانی هەرێم بپرسن، بۆچی داهاتەکانی نەوت ناچنە ژمارە حیسابێکی ڕوون و ئاشکرا کە خەڵک بیزانن، وەکو ئەوەی کە ئێمە لێرە دەیکەین، بۆ ڕێگە نادەن کە چاودێری دارایی بەدواداچوون بکات، بە بیانووی سەربەخۆیی هەرێک هەموو بەدواداچوونێکی چاودێری دارایی ڕەت دەکەنەوە.

 

هاوکات لەسەر داهاتی نەوت دەشڵێت "هەموو ئەو پرسیارانە دەربارەی چارەنووسی پارەکانی هەرێم و موچەی فەرمانبەرانمان بە لێپرسراوانی هەرێم وتووە چەند جارێک چاودێری داراییمان ناردوو، بەڵام بە بیانووی سەربەخۆیی دارایی ڕێگەیان نەداوە، ڕێکەیان نەداوە بە دەستوەردانی چاودێری داریی و لیژنەی نەزاهە، بەڵام لەڕاستیدا ئەوەهەموو گەندەڵی و خراپ بەڕێوەبردنی دامودەزگاکانە".

 

سەرۆک وەزیرانی عێراق دەشڵیت: بە هیچ شێوەیەک ناگونجێت دارایی گشتی بکرێتە موڵکی تاکە کەسی و حزبەکان و مووچەی لایەنگران و دەستەکانی پێ بدرێت و هاووڵاتیانی تر پشتگوێ بخرێت.

سەربارەت بە پەرلەمانی کوردستانیش عەبادی دەڵێت: کێشەیەکی تری هەرێمی کوردستان پەکخستی پەرلەمانە، کە ماوەی ١٢ مانگە کارەکانی ڕاگیراوە، بەڵام حکومەتی هەرێم بێ هیچ پشتیوانییەکی یاسایی بەردەوامە، دیارە ئەوەش بەهۆی سیاسەتەکانی لێپرسراوانی هەرێمەوە بووە.

هاوکات ئاماژەی بۆ ئەوەش کردووە: ڕێگە بە سەپاندنی سیاسەتی ئەمری واقیع نادرێت ئەو جۆرە لە کارکردن شکست دەهێنێت هەروەک چۆن پێشتر دەسەڵاتی بەعسی سەدامی شکستی هێنا کە دەیویست بە مەنتقی چەک عێراقیەکان سەرکوت بکات.

د.خ

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin