Smiley face
Smiley face
Smiley face

"مەترسیی دروستبوونی شەڕ لە خورماتوو هەیە"

2017-09-24 15:35:48



ڕۆژنیوز - بەرهەم لەتیف

 

قایمقامی شارۆچکەی خورماتوو ڕایدەگەیەنێت، کە لەکاتی بەڕێوەچوونی پرۆسەی ڕیفراندۆم لە شارۆچکەی خورماتوو، مەترسی دروستبوونی شەڕ لەنێوان کورد و تورکمان هەیە و ئەندامێکی ئەنجومەن-یش دەڵێت:"هەر شەڕێک بەرامبەر بە باشوری کوردستان بکرێت، لە خورماتووەوە دەستپێدەکات".

 

هەتا ئێستا وا بڕیارە سبەینێ پرۆسەی ڕیفراندۆم لە هەرێمی کوردستان و ناوچە دابڕێندراوەکان بەرێوەبچێت.

 

شەلال عەبدول، قایمقامی شارۆچکەی خورماتوو-ی سەر بە پارێزگای سەلاحەدین، کە یەکێکە لە انوچە دابڕێندراوەکان، بە ڕۆژنیوزی ڕاگەیاند:"هەر لە سەرەتاوە تاوەکو ئێستا، هیچ شتێکی فەرمیمان بۆ نەهاتووە، بۆ بەڕێوەچوونی پرۆسەی ڕیفراندۆم لە شارۆچکەی خورماتوو، ئەوەی کە کرابێت زیاتر ئامادەکارییەکانی کۆمسیۆنە لەگەڵ خەڵک، بەڵام وەکو ئیدارەی شارۆچکەکە و ئەنجومەی شارەوانی خورماتوو، هیچ شتێکی فەرمی نەکراوە".

 

 

ناوبراو، ڕاشیگەیاند:"بەهۆی ڕیفراندۆمەوە مەترسیی دروسبوونی شەڕ لە شارۆچکەی خورماتوو هەیە، ئێمە ئامادەکاریمان کردووە و کۆبوونەوەشمان لەگەڵ لایەنە ئەمنییەکان کردووە، هەندێک ڕێ و شوێن گیراوەتەبەر، بۆئەوەی ڕیگە نەدەین شەڕ و ئاڵۆزیی دروست ببێت".

 

لەبارەی ئامادەکارییەکانی کۆمسیۆنی باڵای هەڵبژاردن و ڕاپرسی، بۆ ئەنجامدانی ڕیفراندۆم لە شارۆچکەی خورماتوو، تاهیر حەکیم، بەرپرسی ئۆفیسی شارۆچکەی خورماتووی کۆمسیۆنی باڵای هەڵبژاردن و ڕاپرسی، بەڕۆژنیوزی وت:"ئێمە هەستاوین بە هەموو ئامادەکارییەکان بۆ بەڕێوەچوونی ڕیفراندۆم لە شارۆچکەی خورماتوو، ئامادەکارییەکانیش لە کردنەوەی ناوەندی دەنگدان و وێستگەکان خۆی دەبینێتەوە".

 

 

تاهیر حەکیم، ئەوەشی خستەڕوو:"%٩٥ی ئامادەکارییەکانما بۆ بەڕێوەچوونی ڕیفراندۆم جێبەجێ کردووە، چاوەڕوانی دوا ساتەکانین بۆ بەڕێوەچوونی پرۆسەکە لە ڕیفراندۆم".

 

لەبارەی بڕیاری ئەنجامدانی ڕیفراندۆمیش لە شارۆچکەی خورماتوو، کەمال ئەحمەد، ئەندامی ئەنجومەنی شارۆچکەی خورماتوو، بۆ رۆژنیوز دوا و وتی:"ئەنجامدانی ڕیفراندۆم لە خورماتوو، بڕیاری هەموو حزبەکان نییە، هەریەکە لە گۆڕان و کۆمەڵ بەشداری ناکەن، بەوپێیەی کە شارۆچکەی خورماتوو ڕەوشێکی تایبەتی هەیە، بۆیە پێشبینی دەکەین خەڵک دەنگ بە بەڵێ دەدەین".

 

 

ناوبراو، ئاماژەی بەوەشدا:"مەترسییەکانی ئەنجاندانی ڕیفراندۆم لە شارۆچکەی خورماتوو، زیاتر کاردانەوەی تورکمانە شیعەکانە، چونکە ئەوان دژی ئەم پرۆسەیەن، بۆیە دەتوانن لەڕووی نەتەوەییەوە تورکیا بەرکاربهێنن، وە لە ڕووی مەزهەبییەوە ئێران بەکاربهێنن".

 

ئەو ئەندامەی ئەنجومەنی شارۆچکەی خورماتوو، وتیشی:"لێرە تورکمان و شیعەکان شەڕ بە کورد دەگێڕن، مەترسییەکانیش لەدوای ڕیفراندۆمەوە دەردەکەون، ئەگەر وەک کاردانەوەیەکیش دژی ڕیفراندۆم، هەر شەڕێکیش بەرامبەر بە باشوری کوردستان بکرێت، ئەوا بەدڵنیاییەوە لە خورماتووەوە دەستپێدەکات".

 


ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin