Smiley face
Smiley face
Smiley face

مەراسیمێک بۆ کۆچی ئەژین قادری ڕۆژنامەنووس و فۆتۆگرافەر بەڕێوەچوو

2017-09-21 18:25:46



ڕۆژنیوز- ڕێزان محەمەد

 

لقی سلێمانی سەندیکای ڕۆژنامەنووسانی کوردستان بە ئامادەبوونی ڕۆژنامەنووسانی سلێمانی و ھاوڕێ و دۆستانی ئەژین قادری ڕۆژنامەنووس و فۆتۆگرافەر، مەراسیمێکیان بۆ کۆچی دوایی هاوپیشەکەیان سازکرد.

 

ئێوارەی ئەمڕۆ، لە بەردەم ماڵی باوکی ئەژین قادر لە گەڕەکی باوەمردەی سلێمانی، لقی سلێمانی سەندیکای ڕۆژنامەنووسان بە ئامادەبوونی ڕۆژنامەنووسانی سلێمانی مەراسیمێکیان بۆ کۆچی دوایی ئەژین قادر-ی ڕۆژنامەنووس و فۆتۆگرافەر ڕێکخست.

 

 

کاروان ئەنوەر، سکرتێری لقی سلێمانی سەندیکای ڕۆژنامەنووسانی کوردستان، بە ڕۆژنیوزی وت: ئەژین مایەی شانازی بوو بۆ ژنانی ڕۆژنامەنووس کە ھەردەم شانازی پێوە بکەین، ژنێکی ئازا و چاونەترس و دڵسۆز بوو بۆ کارەکەی.

 

 

وتیشی: ئەم مەراسیمەمان ڕێکحست تا بڵێین ئەو ڕۆژنامەنووسانەی کە بە ئازایەتی دەمرن، بە ئازایەتی ناویان دەمێنێتەوە، ئەو ڕۆژنامەنووسانەی کە خۆنەویستن مێژوو ناویان شکۆدار دەکات.

 

لە مەراسیمەکەدا، ستران عەبدوڵا، سەرنوسەری ڕۆژنامەی کوردستانی نوێ، لە کۆنگرەیەکی ڕۆژنامەنووسیدا وتی: ئەژین زۆر ئازایانە کاری دەکرد، دەبێت ھەوڵبدەین کە کچانمان لە ڕاگەیاندنەکاندا ھەبێت، مادەم کچی وەک ئەژینمان ھەبێت، دەبێت چاوبکەین لەو ڕێچکەیەی کە ئەژین گرتبوویە بەر، چ بۆ ئێمە و چ بۆ ئەو ڕۆژنامەنووسانەی کە تازە دێنە مەیدانەوە.

 

 

ڕەحمان غەریب، ڕێکخەری سەنتەری میترۆ بۆ داکۆکیکردن لە مافی ڕۆژنامەنووسان لە کۆنگرەکەدا وتی: بەداخەوە کچێکی ئازا و چالاکمان لە دەستدا، ھیوادارین کە کوردستانی نوێ دەیان کچی دیکەی وەک ئەژین پێبگەیەنێتەوە.

 

 

خانەوادەی ئەژین، سوپاسی ھاوڕێ و دۆستانی ئەژین-یان کرد کە لە مەراسیمەکەدا ئامادەبوون و داوایان لە ژنانی ڕۆژنامەنووس ھەبوو کە ڕێگەی ئەژین بگرنەبەر و شوێنەکەی پر بکەنەوە تا شوێنی ون نەبێت.

 

 

ئەژین قادر، ڕۆژنامەنووس و فۆتۆگرافەری ڕۆژنامەی کوردستانی نوێ بوو، لە ساڵی ١٩٨٤ لە قەرەداغی سەر بە شاری سلێمانی لە دایک ببوو، دوێنێ ٢٠⁄٩⁄٢٠١٧ بەھۆی نەخۆشییەوە کۆچی دوایی کرد.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin