Smiley face
Smiley face
Smiley face

هێزە ئەمنییەکانی سلێمانی کامێرامانێکی ڕۆژنیوز-یان دەستگیرکرد

2017-09-20 11:20:54



ڕۆژنیوز – سلێمانی 

 

هێزە ئەمنییەکانی سلێمانی کامێرامانێکی ڕۆژنیوز-یان دەستگیرکرد و هەردوو کامێرای ڤیدیۆ و فۆتۆ-شیان لە تیمی ڕۆژنیوز سەند.

 

ئەمرۆ کاتژمێر ١١:٠٠ تیمی ڕۆژنامەوانی ڕۆژنیوز بەمەستی ڕووماڵکردنی خۆپیشاندانێک، کە بڕیاربوو دژ بە هاتنی بارزانی بۆ سلێمانی بەڕێوەبچێت چوونە شەقامی سالم، بەڵام هێزە ئەمنییەکان هەردوو کامێرای ڤیدیۆ و فۆتۆ-یان لە تیمەکە سەند و (محەمەد وەلی)کامێرامانیشیان دەستگیرد.

 

ڕێزان محەمەد، پەیامنێری ڕۆژنیوز وتی: هێزە ئەمنییەکان محەمەد و ژمارەیەکی دیکە لە ڕۆژنامەنووسان و دوو چالاکوانی مەدەنیان دەستگیرکرد و بردنیان بۆ بنکەی ئاسایشی ڕزگاریی.

 

جێگای باسە، هەریەکە لە چالاکوانانی مەدەنی سەردار تۆفیق، نەبەز بابانی، مامۆستا ئاراسن و دڵشاد میرانی دەستگیرکراون، جگە لەنەبونی هەواڵ لەسەر نزار مەحمود و دڵشاد بابانی و چەند کەسێکی دیکە.

 

ئەمە لەکاتێکدایە، هەر ئەمڕۆ سەنتەری میترۆ بۆ داکۆکی لە مافی ڕۆژنامەنوسان لە راگەیەندراوێکدا داوای لە لیژنەی باڵای رفراندۆمی هەرێمی کوردستان کرد، کە وەک هەر چالاکییەکی گشتی، میدیاکان ئازادبکەن لە روماڵکردنی ئاهەنگی یاریگاکەی سلێمانی.

 

سەنتەرەکە، ڕاشیگەیاندووە: بە پێی یاسای رۆژنامەگەری هەرێم رۆژنامەنوسان ئازادن لە روماڵکردنی چالاکی گشتی، هەر مامەڵەیەکی پێچەوانەی ئەم بڕگەیە بێت، پێشێلکردنی یاسایە.


بریارە ئەمڕۆ مەسعود بارزانی، سەرۆکی پارتی لە یاریگای سلێمانی بانگەشە بۆ ریفراندۆمی باشوری کوردستان بکات، لەبەرامبەر ئەوەشدا بەرەی خەڵک و ژمارەیەک لە چالاکوانان وەک ناڕەزایی دەیانویست خۆپیشاندانیک لە شەقامی سالم ئەنجام بدەن، بەڵام هێزە ئەمنییەکان ڕێگرییان لە خۆپیشاندانەکە کرد.

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin