Smiley face
Smiley face
Smiley face

سلێمانی، هاواری ژنانی دەستگێڕ ناگاتە دەسەڵات

2017-09-18 11:24:49



ڕۆژنیوز – سلێمانی

 

ژنانى ده‌ستگێڕى ناوبازاڕ، ڕۆژانە هاوار بۆ فرۆشتنی شمەکەکانیان دەکەن، بەڵام دەنگی هەژارییان ناگاتە دەسەڵات و تیمەکانی شارەوانی ڕێگا نادەن لە شوێنە قەرەباڵغەکاندا کاربکەن.


بازاڕی حەوزە وشکەکە، یەکێکە لە کۆنترین بازاڕەکانی شاری سلێمانی و قەرەباڵغترین شوێنی شار-یشە، کە جگە لە دوکاندارەکان ژمارەیەکی زۆر ژنی دەستگێڕ-یش تیایدا کۆدەبنەوە و ڕۆژانە لەسەر شەقامەکە پەڵپینە، گەڵامێو و جۆرەها گیای سروشتی دەفرۆشن.

 

 

ڕۆژنیوز بۆ ئامادەکردنی ڕاپۆرتێک سەبارەت بە کار و ژیانی ڕۆژانەی ئەو ژنانە و ئەو بەرهەمانەی دەیفرۆشن سەردانی حەوزە وشکەکەی کرد، بەڵام ئەگەرچی ئەوان ڕۆژانە لەناو خەڵکدا هاوار بۆ فرۆشتنی بەرهەمەکانیان دەکەن، ترسیان لە کامێرا هەبوو، هەستیان دەکرد، کە کامێراش تیمێکی دیکەی شارەوانییە و دەیەوێت شوێنەکەیان پێ چۆڵ بکات، بۆیە زۆربەیان ئامادەنەبوون لەبەردەم کامێرادا بدوێن و تەنیا لێدوانیان بۆ تیمەکەمان دا، لەسەر ڕەزامەندی خۆشیان هەندێک وینەمان گرتن و هەندیکیشیان پشتیان لە کامێرا دەکرد لەکاتی وینەگرتن-دا.

 

 

 

ژنێکى به‌ته‌مه‌ن که‌ ته‌نها چه‌ن کیلۆیه‌ک په‌ڵپینه‌ى له‌ به‌رده‌مدا بوو وتى: ئه‌مه‌ ژیانى ئێمه‌یه‌ تا ئێواره‌ له‌ ترسى شاره‌وانى له‌ شوێنێک ناتوانین جێگیربین و شته‌که‌مان بفرۆشین.

 

 

 له‌ نێویاندا ژنێک هەبوو، کە خەمێکی قوڵی لە ناخیدا هەڵگرتبوو، بەڵام وه‌ک بڵێى ته‌نانه‌ت ترسى له‌ هه‌ڵڕشتنى خه‌مه‌کانیشى هه‌یه‌ له‌وه‌ى دواتر لێپێچینه‌وه‌ى لێبکه‌ن له‌ژێر لێوەوە  ده‌یوت: ئه‌گه‌ر مافى ژن هه‌بوایه‌ ئێمه‌ حاڵمان وا نەده‌بوو، ڕێز نه‌ماوه‌ ئینسانیه‌ت حسابى بۆ ناکرێت، ئێمه‌ هەژارین نیمانه‌ دوکانێک بگرین و کاری تیابکه‌ین له‌م شوێنه‌ سه‌رمان کزکردووه‌ کاسبى ده‌که‌ین، به‌ڵام ناهێڵن.

 

 

ئەو ژنە، بە دەنگێکی نزم وتی:"پێمان دەڵێن نابێت ژن له‌سه‌ر شەقام دابنیشێت ناشیرینه،‌ خۆ ئێمه‌ش ئینسانین سه‌ربه‌رزین و شه‌رفمه‌ندانه‌ کارى خۆمان ده‌که‌ین".

 

هه‌مان کات، ژنێک کە لە ترسی تیمەکانی شارەوانیی خەریکی پێچانەوەی کۆڵەکەی بوو، بەڵام بە ئاستەم ڕازیمان کرد، کە لەبارەی کارەکەیەوە لێدوانێکی کورت بۆ ئاژانسەکەمان بدات و وتی:"من سه‌ربه‌رزم بە کارەکەم ته‌نها گرفتمان ئه‌وه‌یه‌ ناهێڵن له‌م جێگا‌ کاسبى خۆمان بکه‌ین، نزیکه‌ى ٢٠ ژن ده‌بین ڕۆژى چه‌ند جار شاره‌وانى دێت و کۆڵه‌کانمان پێ دە‌پێچێته‌وه‌ و دەرمان دەکات".

 

 

ئەو ژنە، بۆئەوەی پێش گەیشتنی تیمەکانی شارەوانی کۆڵەکەی بپێچێتەوە تەنانەت ناوی خۆی پی نەوتین و بەخێرایی وتی: شارەوانی شوێنێکیان بۆ دیاریکردووین، بەڵام زۆر پێچه‌ و که‌س ڕێى تێناکه‌وێت، ئێره‌ بۆ ئێمه‌ باشه‌ و کاسبى تێدایه‌.

 

بۆ بەراوردکارییەک لەنێوان ژیانی ئەو ژنانەی لەسەر شەقامەکان فرۆشیاریی دەکەن و ئەو ژنانەی لەناو مۆڵ و دوکانەکاندا کار دەکەن، سەردانی یەکێک لە مۆڵەکانی شاری سلێمانی-مان کرد و ژنێکی دوکاندارمان دواند.

 

کاشان نادر

 

کاشان نادر، ئەو ژنە دوکاندارەیە و فرۆشیارى بابه‌تى جوانکارى ژنانه‌، ئەو سەبارەت بە کارەکەی وتی: من هیچ گرفتم نییه‌ خێزانەکەم پاڵپشتییم ده‌که‌ن، ده‌وروبه‌ر قه‌سه‌ ده‌که‌ن، به‌ڵام من گوێیان پێناده‌م، چونکه‌ کاره‌که‌مم خۆشده‌وێت.

 

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin