Smiley face
Smiley face
Smiley face

جەودەت: حکومەت چاكسازی نەكات شێرپەنجەی گەندەڵی لەناوی دەبات.. بەڤیدیۆ

2017-09-02 10:13:37



ڕۆژنیوز - دانا عومەر

 

شێركۆ جەودەت دەڵێت، كە مافیای گەورە لە هەرێمی كوردستاندا هەیە لە بواری وزەد و دەسەڵاتیان لە حزب و حكومەتیش زیاترە، دەشڵێت: وەزیری سامانە سروشتیەكان بووەتە سندوقە ڕشەكەی حكومەت، حکومەت چاكسازی نەكات لە وزەدا، شێرپەنجەی گەندەڵی لەناوی دەبات.

 

شێركۆ جەودەت، ئەندامی پەرلەمانی هەرێمی كوردستان و سەرۆكی لیژنەی پیسەشازی و وزە و سەرچاوە سروشتیەكانی پەرلەمان، لەم چاوپێكەوتنەوەی ڕۆژنیوزدا وەڵامی چەند پرسیارێكی گرنگ دەداتەوە لەبواری نەوت و گاز و كاركردنی كۆمپانیا نەوتییەكان و دابەشبوونی سەرچاوەكانی نەوت و گاز لە هەرێمی كوردستان و ئەو گەندەڵیانەی كە لەو بورارەدا دەكرێت.

 

دەقی چاوپێكەوتنەكە:

 

- ئایا سەرچاوەكانی وزە لە هەرێمی كوردستاندا چۆن دابەش بووە و چەند بەرهەم و داهاتیان هەیە؟

 

" بیرە نەوتییەکان 53% خاكی هەرێمی كوردستان پێكدەهێنن"

 

شێركۆ جەودەت: بیرەنەوتەكانی كوردستان خۆی لە 57 بلۆكی نەوتیدا دەبینێتەوە، بلۆكی نەوتی واتای ئەوەیە كە هەرێمی كوردستان دابەشكراوە بەسەر ئەو بلۆكانەدا كە لەنێو ئەو بلۆكانەدا بیری نەوت هەیە، ئەو بلۆكە نەوتیانە 53% خاكی هەرێمی كوردستان پێكدەهێنن، واتا ئەوەی كە بەرهەمهێنانی نەوەتی تێدا دەكرێت 53%ی خاكی هەرێمی كوردستانە.

 

- چەند كۆمپانیای بیانی كار دەكەن لە هەرێمی كوردستاندا لەبواری نەوت و غازدا؟

 

"کۆمپانیا زۆرە"

شێركۆ جەودەت: كۆمپانیا بیانییەكان زۆرن، بەڵام هەندێك جار پشكەكانیان دەفرۆشنەوە، وە هەندێكیان كشانەوە، هەندێكی نۆێ‌ هاتوون، بەڵام خۆیان لە چەند كۆمپانیایەكی نێودەوڵەتیدا دەبیننەوە وەك دی ئێن ئۆ، ئیكسۆل مۆبێل و گەنەڵ ئێنەرجی و شێفۆن و چەندین كۆمپانیای تر، گرێبەستەكانیش زۆربەی بۆ 25ساڵ بەرەوسەرە، وەك شەراكەت پشكدراوە بە كۆمپانیاكان بە ڕێژەی جیاواز، لە زۆربەی گرێبەستەكاندا ئەوەی جێگیركراوە كە كێشەكانی نێوان كۆمپانیاكان و حكومەتی هەرێم لەڕێگەی دادگای لەندەنەوە دەبێت، ئەوەش جۆرێك لە لەدەستدانی دەسەڵاتی تێدایە بۆ حكومەتی هەرێمی كوردستان.

 

- داهات و بەرهەمهێنانی نەوت چەندە لەهەرێم؟

 

"ڕۆژانە نزیكەی 600 هەزار بەرمیل لەڕۆژێكدا لەڕێگەی بۆرییەوە دەڕواتە دەرەوە"

 

شێركۆ جەودەت: لەبەر ئەوەی شەفافیەت لە بواری نەوت دا لە كوردستان لە ئاستێكی زۆر نزمدایە، ناتوانین بە شێوەیەكی فەرمی بڵێین چەند بەرهەم دێت، بەڵام بەپێی بەدواداچوونەكانی ئێمە ڕۆژانە نزیكەی 600 هەزار بەرمیل لەڕۆژێكدا لەڕێگەی بۆرییەوە دەڕواتە دەرەوە بە نەوتی كەركوكیشەوە، وە لەڕێگەی تەنكەریشەوە مامەڵە بەنەوت دەكرێت، ئەم نەوتەش لە بازاڕدا بەنرخی ڕۆژ دەفرۆشرێت، بەڵام بە كەمتر لە نرخی بازاڕ، كە هەر بەرمیلێك بە 10 دۆلار كەمتر دەفرۆشرێت لە نرخی بازاڕ، كە ئەمەش بەهانەیەكی باوەڕ پێنەكراوە، هیچ هۆكارێك نییە بۆ ئەوەی كە ئەو نەوتە بە پارەیەكی كەمتر بفرۆشرێت، ئەگەر حكومەتی هەرێم بەرمیلێك نەوت بە 50دۆلار بفرۆرشێت بە لێدەركردنی تێچووی بەرهەمێنان 30 دۆلاری بۆ دەمێنێتەوە.

 

 

- گەندەڵی چۆن دەكرێت لەبواری نەوت و گازی سورشتیدا؟

 

"كەسانی دەست ڕۆشتوو لەپشتی گەندەڵییەكانەوەن"

 

شێركۆ جەودەت: كێشەكەلەوەدایە كە گەندەڵی لەبواری نەوتدا گەندەڵییەكی ڕێكخراوە، گەندەڵی تیم و كەسانی دەست ڕۆشتوو هەیە، لەبەر ئەوە بەدەستخستنی بەڵگە ئاسان نییە، كەسانی دەست ڕۆشتوو لەپشتی گەندەڵییەكانەوەن، زۆرینەی گەندەڵیەكان لەبوای گواستەنەوەی نەوتەكەدا دەكرێت، بێجگە لەوەی تێبینی زۆر لەسەر گرێبەستەكان هەیە، كەموكورتی زۆریان تێدایە، جۆرێكی تر گەندەڵی لەوەدایە كە حكومەتی هەرێمی كوردستان كەیس ئەدۆڕێنێت لە دادگاكانی دەرەوە، كە گومانی زۆری لەسەرەو حكومەت ناڵێت بۆ ئەو كەیسانە دەدۆڕێنێت.

 

-بەپێی بەدواداچوونەكانی ئێوە بۆ حكومەت كەیسەكان ئەدۆڕێنێت؟

 

"زانیاریمان دەست ناكەوێت"

 

شێركۆجەودەت: ئێمە بەدواداچوونمان كردووە، بەڵام دۆسیەی نەوت و غاز زۆر داخراوە لە هەرێمی كوردستاندا، زانیاریمان دەست ناكەوێت، حكومەت جوابی پەرلەمانیش ناداتەوە، ئێمە نالێین پەرلەمان لەناو گرێبەستییە نەوتیەكاندا هەبێت، بەڵام دەڵێین پێویستە بەپێی یاسای 29ی نەوت و گازی ساڵی 2007، دەبێت پەرلەمان زانیاری هەبێت لەسەر گرێبەستیە نەوتییەكان، لە ئێستادا حكومەتی هەرێمی كوردستان ڕێككەوتنی 50 ساڵی هەیە لەگەڵ توركیادا، بەڵام پەرلەمان بەهیچ شێوەیەك ئاگاداری ئەو ڕێككەوتنەوە نییە، زۆربەی ئەو گرێبەستانەش لەوكاتەدا كراوە كە پەرلەمان پەكی خراوە، ئەو دەرفەتە قۆستراوەتەوە و ئەوگرێبەست و ڕێككەوتنە جەرگ بڕانە کراوە بۆ هەرێمی كوردستان.

 

- دۆسیەی نەوت و گاز بۆچی لەدەستی یەك كەسدا كۆكراوەتەوە كە وەزیری سامانە سروشتییەكانە؟

 

"بووەتە سندوقە ڕەشەكەی كەرتی نەوت و گاز"

 

شێركۆ جەودەت: وەزیری سامانە سروشتییەكان ئەندازیاری كەرتی نەوت و گازە لە هەرێمی كوردستاندا، بەڵام خۆی هەموو شتێك نییە، هەرچەند بووەتە سندوقە ڕەشەكەی كەرتی نەوت و گاز، بەڵام ئەو هەموو شتێك نییە ئەنجومەنی باڵای نەوت و گاز هەیە لە هەرێمی كوردستان، كە بریتین لە سەرۆكی حكومەت و جێگرەكەیی و وەزیری سامانە سروشتییەكان و دارایی و پلاندانان و سكرتێری ئەنجومەنی وەزیران، ئەمانە ئەنجومەنی باڵای نەوت و گازن ئەمانە بەرپرسن لە ورد و درشتی دۆسیەی نەوت و گاز.

 

- داهاتی نەوت و گاز بەشی هەرێم دەكات؟

 

"بە دڵنیاییەوە كەرتی نەوت و گاز خەرجیەكانی هەرێمی كوردستان دەردەكات"

 

شێركۆ جەودەت: بەدڵنیاییەوە ئەگەر بە دەستێكی ئەمین بەڕێوە ببات، دەستی حزبی لێ دوربخرێتەوە، بەڕێوبردنێكی سەردەمیانەی بۆ بكرێت، دامەزراوەیەكی سەربەخۆ و بێلایەن وردبینی بۆ داهاتی نەوت و گاز بكات، بە دڵنیاییەوە كەرتی نەوت و گاز خەرجیەكانی هەرێمی كوردستان دەردەكات، بەڵام بەداخەوە وەك نەوت وای لێهاتووە كەرتی گازیش پەكی كەوتووە، كە ئەكرا داهاتی هیچی كەمتر نەبێت لە نەوت.

 

 
-كەواتە حكومەتی هەرێم بۆ قەرزارە؟
 

"كەڵەكەبووی ساڵانی ڕابردووە"

 

شێركۆ جەودەت: حكومەت ڕای گەیاندووە كە نزیكەی 28 ملیار دۆلار قەرزارە، بەڵام ئەوە هەمووی قەرز نییە، هەندێكی پێ دەوترێت كەڵەكە بووی ساڵانی ڕابردوو، بەهۆی كورت هێنانی بودجەوە، كە 3 ملیار دۆلارە، وە پاشەكەوتی مووچەی فەرمانبەران كە7 ملیار دۆلارە، پارەی بەڵێندەرەكان كە بەنایاسایی لە بانكەكان دەرهێندران ئەوە بڕێكی تری قەرزەكانە، هەروەها شایستە داراییەكانی كۆمپانیاكان كەحكومەتی نەیداوە، بڕێكی تریشی قەرزە لە وڵاتی توركیا و وڵاتانی تر حكومەت وەری گرتووە.

 

- ململانێ‌ سیاسیەكانی نیوان یەكێتی و پارتی چ كاریگەرییەكیان لەسەر كەرتی نەوت و گاز هەبووە؟

 

"ململانێ‌ دەكەن بۆ ئەوەی كێ‌ زیاتر سەرچاوەكانی وزە كۆنتڕۆڵ بكات"

 

شێركۆ جەودەت: خۆی لەڕاستیدا ململانێكان ئابوورین، بۆ بەدەستهێنانی پێگەی سیاسی و سەربازی و دەسەڵاتە، بەشە ئابووریەكەی پەیوەندی بە كۆنتڕۆڵكردنی سەرچاوەكانی وزەوەهەیە، ململانێ‌ دەكەن بۆ ئەوەی كێ‌ زیاتر سەرچاوەكانی وزە كۆنتڕۆڵ بكات و دەسەڵاتی زیاتر بەدەست بهێنێت، لەنێوان خۆشیاندا زانیاریەكان دەشارنەوە و ئاشكرای ناكەن بۆ خەڵك و پەرلەمان، بۆیە لە بنەڕەتدا ململانێكان ئابوورین، وە بەرژەوەندییە ئابووریەكانیشە ئاڕاستە سیاسی و سەربازیەكان دیاری دەكات.

 

 

- بەپێی زانیارنی ئێوە لە سنوری یەكێتی و پارتی كامیان سەرچاوەی وزەیان زۆرترە؟
 
"دەتوانین بڵێین هاوكێشەكان پێچەوانە دەبێتەوە لەنێوان ناوچەكاندا لەڕووی نەوت و گازی سروشتییەوە"
 

شێركۆ جەودەت: وەك نەوت 60%ی سەرچاوەكانی نەوت لە هەرێمی كوردستاندا دەكەوێتە زۆنی هەولێر و بادینانەوە، وە 40%ی تری دەكەوێتە زۆنی سلێمانی و هەڵەبجە وگەرمیانەوە، وەك گازی سروشتی 80-90%ی لە زۆنی گەرمیان و چەمچەماڵ و سلێمانی و هەڵەبجەیە، 20% دەكەوێتە زۆنی هەولێر و دهۆك، لەبەر ئەوە دەتوانین بڵێین هاوكێشەكان پێچەوانە دەبێتەوە لەنێوان ناوچەكاندا لەڕووی نەوت و گازی سروشتییەوە.

 

- ئەتوانیت پێم بڵێیت یەكێتی یان پارتی زیاتر كەرتی وزەی بەدەستەوەیە لە هەرێمی كوردستان؟

 

 "دەستەو تاقمێك لەناو یەكێتی و پارتی و دەرەوەی ئەوانیش بوون بە تۆڕێك"

 

شێركۆ جەودەت: بابەتەكە یەكێتی یان پارتی نییە، بابەتەكە بریتییە لەو دەسەو تاقمەی كە لەناو یەكێـتی و پارتیدا و لە دەرەوەی یەكێتی و پارتی بوون بە تۆڕێك و كار دەكەن بۆ دروستكردنی تۆڕێكی بەرژەوەندی لەناو هەرێمەوە بۆ دەرەوەی هەرێم، من باوەڕم وایە كە دەستەو تاقمێكی تایبەتی هەن كەدەسەڵاتی خۆیان بەكار دەهێنن نەك تەنها بۆ بەرژەوەندی حزبەكەیان، بەڵكو بۆ بەرژەوەندی خۆشیان، ئەوانە ڕاگەیاندن و دەسەڵات و هێز و دامەزراوەیان بۆ خۆیان پێكهێناوە، وە پاڵپشتی سیاسی و پەیوەندی و سەربازییان بۆخۆیان پێكهێناوە، لە ئەنجامدا هەموو شێوازەكانی هێزیان بۆ خۆیان پێكهێناوە، ئەوان بڕیاردەرن لەسەر حكومەت و پەرلەمان و حزبەكان و دەسەڵاتی دادوەری.

 

 

-كەواتە دەتوانین بڵێن مافیای گەورە لە هەرێمی كوردستاندا هەیە؟

 

"بەدڵنیاییەوە مافیای گەورە هەیە"

 

شێركۆ جەودەت: بەڵێ‌  بە دڵنیاییەوە مافیای گەورە هەیە كە لەناو هەرێمی كوردستاندا، وە تۆڕێكی مافیایی گەورەن كە لەناوەوە و دەرەوەی هەرێمی كوردستاندا پێكەوە كار دەكەن بۆ ئەوەی سەروەت و سامانی ئەم وڵاتە هەڵـلووشن، وە ئەم بارودۆخەشڵەژاوەی هەریمی كوردستانیان قۆستۆتەوە كە بەهۆی شەڕی داعش و هۆكارەكانی ترەوە دروستووە.

 

- ڕۆڵی سەرۆكی حكومەت و ئەنجومەنی نەوت و گاز چییە لەو مافیا گەریەدا؟

 

"ئەوان بێدەسەڵاتن و ڕۆڵیان لاوازە"

 

شێركۆ جەودەت: ئەوان ڕۆڵییان لاوازە، لەبەر ئەوەی بڕیارەكان بەسەریاندا دەسەپێنرێت، ڕۆلیان لاوازە لەبەر ئەوەی بێدەسەڵاتن لە بەرامبەر ئەو هەموو قەرزەی كە لەسەریان كەڵەكە بووە، بێدەسەڵاتن لەبەرامبەر ئەو گرێبەستە خراپانەی كە بەهۆی نەزانی ئەوانەوە ئەنجام دراوە، ئەو فشارانەی كە لەلایەن سەرمایەدارە گەورەكانەوە لێیان دەكرێت، ئیتر لە ڕووی ئابوورییەوە بێت یان لەڕووی سەربازییەوە، ئەی داعش بۆ دروست بوو كێ‌ دروستی كرد، چۆن دروست بوو، بۆ وێرانكردنی ئەو وڵاتانە بوو، قەرزاركردنی ئەو وڵاتانە بوو، سەپاندنی مەرجەكانی ئەوانە بەسەر ئەو وڵاتانەوە، بۆ ئەوەی سەروەت و سامانی  زیاتر بەدەست بهێنن.

 

- وەزیری سامانە سروشتییەكان هەمیشە پاكی خۆی نیشان دەدات و دەڵێت ڕۆژێك دێت كە خەڵك دەزانێت چیم بۆ ئەوان كردووە، پێت وایە چی بۆ كردوون؟

 

"دەبێت لەبەردەم دادگایەكی بێلایەندا پاكی خۆی بسەلمێنێت"

 

شێركۆ جەودەت: با پاكێتی خۆی لەبەردەم دادگایا بسەلمێنێت، من بۆ خۆم چەندین كەیسی گەندەڵی سامانە سروشتیەكانم داوەتە دادگا، بەڵام بەداخەوە سەرەوەری یاسا لە هەرێمی كوردستاندا لەئاستێكی زۆر لاوازدایە، ئەبێت لەبەردەم دادگایەكی بێلایەندا پاكی خۆی بسەلمێنێت لەبەرامبەر ئەو هەموو كەیسی گەندەڵییە لەسەری كە ئێمەومانان بەڵگەكانمان پێشكەشكردووە، نەك دادگایەك لە ژێر دەسەڵاتی حزب و خواستی حزبدا بێت، بە تەلەفۆنێك دادوەرەكە بگوازنەوە بۆ شوێنێكی دوورە دەست، ئەگەر بڕیارێكی دا بەدڵی ئەوان نەبوو.

 

-لەئێستادا هیچ پەیوەندیەكت هەیە لەگەڵ وەزیری سامانە سورشتییەكاندا؟

 

شێركۆ جەودەت: بەڵێ‌ بێگومان هەمانە

 

- جوابی پرسیار و گومانەكانتان دەداتەوە؟

 

 

"زۆر بە هەستیارییەوە مامەڵە لەگەڵ ئێمەدا دەكەن"
 
شێركۆ جەودەت: نەخێر بەهیچ شێوەیەك جواب ناداتەوە، لەبەر ئەوەی كە بڕیارەكان قۆرغ كراون، مەلەفی نەوت و گاز مەلەفێكی داخراوە، تەنانەت زۆر بە هەستیارییەوە مامەڵە لەگەڵ ئێمەدا دەكەن، دنیایان ڕاسپاردووە بۆ ئەوەی هیچ بەدواداچوونێكی ئێمە سەرنەگرێت، بۆ ئەوەی ڕاستییەكان ئاشكرا نەبن.
 

- ئەی كە قسە دەكەن باسی چی دەكەن كە وەڵامی پرسیارەكانت ناداتەوە؟

 

شێركۆ جەودەت: فشار دەكەین و داوادەكەین، ئێمە كۆڵ نادەین چوونكە ئەوە مافی خەڵكە.

 

- پەك خستنی پەرلەمان چ كاریگەرییەكی لەسەر دۆسیەی نەوت و گاز هەبووە؟

 

"بەشێکی زۆری پەیوەندی بەو دۆسییەوە هەبوو داخستنی پەرلەمان"

 

شێركۆ جەودەت: بەشێك لە هۆكاری پەكخستنی پەرلەمان پەیوەندی بە كارایی لیژنەی سامانە سروشتییەكانەوە هەبوو، پەیوەندی بە دەستبردن بۆ دۆسیە هەستیارەكانی نەوت و گازەوە هەبوو، دەستبردن بۆ گەندەڵیەكان و ئاشكراكردنی كەم و كورتییەكانی بەڕێوەبردنی كەرتی نەوت و گاز، پەیوەندی بە دەركردنی یاسای نەوت و گاز و دانانی سندوقی داهاتی نەوت و گازەوە هەبوو، كە لە ساڵی 2015 دەركراوە بەڵام تا ئێستا جێبەجێ‌ نەبووە، لەبەر ئەوەی لەبەرژەوەندییە نایاساییەكانی ئەوان دەدات، بەڵی بەدڵنیاییەوە پەكخستنی پەرلەمان هۆكاری ئەو فشارە جدیانە بوو كە پەرلەمان و لیژنەی سامانە سروشتییەكان كردی بۆ مەلەفی نەوت و گاز.

 

- زانیاریتان چییە لەسەر دۆسیەی دانەغاز، حكومەتی هەرێم بۆچی ئەو پارانە دەدۆڕێنێت؟

 

"مەلەفێكی گوماناوییە"

 

 

شێركۆ جەودەت: دۆسیەی دانەغاز دۆسیەیەكی داخراو و گوماناوییە، بەنوسراوی فەرمی حكومەتی هەرێمی كوردستان ئێمەی ئاگادار كردووەتەوە لەوەی كە ناتوانین بەهیچ شێوەیەك بچوكترین زانیاری بدەین بە پەرلەمان و پەرلەمانتاران لەسەر كەیسی دانەغاز و ئەو كەیسەی كە دۆڕاندوویانە، بەڕاستی مەلەفێكی گوماناوییە، نازانین حكومەت چۆن بێدەنگ دەبێت بەرامبەر ئەو كەیسەی دەیدۆڕێنێت بەدانەغاز، بۆ هەڵوێستی نییە، بۆ كۆمپانیەكە دەرناكات و كۆتایی بە پەیوەندیەكانی ناهێنێت!؟.
 
- لە چەند ڕۆژی ڕابردوودا وەزارەتی سامانەسروشتیەكان ڕایگەیاند كە لەباتی قەرز پشكی داوەتە دوو كۆمپانیای نەرویجی و توركی لە كێڵگەی تاوگێ‌، هەڵسەنگاندتان بۆ ئەوە چییە؟
 

"كارەساتە پشكی ئەمانە بەرزبكرێتەوە لەبەرامبەر قەرزێكی كەم"

 

شێركۆ جەودەت: ئەمە تەواوكاری ئەو بازنەی یاریە ئابوورییەیە كە لەسەر ئاستی جیهان ئەنجام دەدریت، كە چەند سەرمایەدارێكی گەورەی جیهانی بەڕێوەی دەبەن، شەڕ دەنێنەوە، نانەوەی شەڕەكە و كۆتایی هاتنی لە بەرژەوەندی ئەواندایە، حكومەتەكان دەخەنەژێر قەرزەوە، دواتر ناچاریان دەكەن بە دانەوەی قەرزەكە، یان لەبەرامبەردا سەرچاوەكانی وزەیان دەوێت، كێڵگەی تاوگێ‌ 542ملیۆن بەرمیل نەوتی یەدەكی تێدایە، هەموو قەرزی ئەو دوو كۆمپانیایە لای حكومەتی هەرێم 221 ملیۆن دۆلارە، لەبەر ئەوە كارەساتە پشكی ئەمانە بەرزبكرێتەوە لەبەرامبەر قەرزێكی كەم، لێرە دەردەكەوێت كارەكە كارێكی ڕێكخراوە.

 

- ئەگەر ئاوا بڕاوات ئایندەی ئابووری هەرێمی كوردستان و كەرتی نەوت و گاز بەرەو كوێ‌ دەڕوات؟

 

"ئەگەر لە حکومەتدا چاكسازی نەكرێت و فریای خۆی نەكەوێت شێرپەنجەی گەندەڵی لەناوی دەبات"

 

شێرکۆ جەودەت: ئەگەر بەم ناڕێكخراوەییە بەردەوام بێت، ئەوا ئابووری كوردستان ڕووبەڕووی مەترسی گەورە دەبێتەوە، دانەوەی شایستە داراییەكان و قەرزی كۆمپانیا نەوتییەكان هەروا ئاسان نییە، كۆمپانیاكان هەتا قەرزیان زیاتر بێت داوای پشكی زیاتر دەكەن، وەك ئەوەی گەنەڵ ئێنەرجی و دی ئێن ئۆ كردیان، پێموایە لەداهاتووشدا كۆمپانیای تر دەبینین كە داوای پشك بكات لەبەرامبەر قەرزەكانیدا، لەبەر ئەوە ئەمە بەروە ئەوەمان دەبەن كەسەرچاوەكانی وزە كۆنتڕۆڵ بكرێت لەلایەن ئەو كۆمپانیانەوە، ئەوەش دەبێتە هۆی ئەوەی كە سەروەت و سامانی كوردستان بۆ ئەو كۆمپانیایانە بێت، بۆنمونە كۆمپانیایەكی وەك دی ئێن ئۆ، لەوەتەی لە هەرێمی كوردستانە زیاتر لە دوو ملیار د‌ولار قازانجی كردووە، بەڵام حكومەتی هەرێم بەڵام حكومەتی هەرێم 28 ملیار دۆلار قەرزارە، ئەگەر چاكسازی نەكرێت و فریای خۆی نەكەوێت شێرپەنجەی گەندەڵی لەناوی دەبات.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin