Smiley face
Smiley face
Smiley face

ڕۆژنامەنووسانی هەولێر: کاری ڕۆژنامەنووسی ڕۆژ بە ڕۆژ مەترسیدارتر دەبێت

2017-08-21 14:39:44



ڕۆژنیوز - قەرەچوغ ئەنوەر

 

ڕۆژنامەنووسانی شاری هەولێر ئاماژە بە خراپی ڕەوشی ڕۆژنامەنووسان و ئازادیی ڕادەربڕین دەکەن لە هەرێمی کوردستان و بەتایبەت لە زۆنی زەرد  و دەڵین ڕۆژ بەڕۆژ مەترسیی زیاتریان لەسەر دروست دەبێت،  ڕۆژنامەنووسێک-یش هۆکارەکەی بۆ تاکڕەویی پارتی و دەستگرتن بەسەر دەزگا ئەمنییەکانی سنورەکە دەگەڕێنێتەوە.

 

ژمارەیەک لە ڕۆژنامەنووسانی شاری هەولێر سەبارەت بە ئازادیی ڕادەربڕین لە هەرێمی کوردستان و بەتایبەت لە زۆنی زەرد بۆ ڕۆژنیوز دەدوێن.

 

بەشدار عوسمان، یەکێک لەو ڕۆژنامەنووسانەیە و وتی:"ڕەوشی ڕۆژنامەنووسان، چالاکانی سیاسی و کەسانی ناڕازیی بە گشتی لە هەرێمی کوردستان لە ئاستێکی خراپ-دایە، چونکە لەماوەی ساڵانی ڕابردوو کۆمەڵێک ڕۆژنامەنووس تیرۆر کران و بکوژانیان دەستگیرنەکرا، ئەمەش دەستی بکوژان و دەسەڵاتدارانی ئاواڵاتر کرد بۆ سەرکوتکاریی زیاتر".

 

بەشدار عوسمان

 

بەشدار، تیشکی خستە ئازادیی ڕادەربڕین بەتایبەت لە زۆنی زەرد و وتی:"بەهۆی تاکڕەویی حزبی دەسەڵاتداری هەولێر و دهۆک و دەسەڵاتی ڕەهای بەسەر دەزگاکانی ئاسایش و دادگا، ئاستی پێشێلکارییەکان لە زۆنی زەرد زۆر زیاترە بەبەراورد ناوچەی سەوز و کەیسەکان لە بەرژەوندی خۆیان کۆتایی پێدێنن و بکوژان و هێرشبەرانیش لە چاوی خەڵک و میدیاکان دەشارنەوە".

 

هەروەها، محەمەد گۆران، ڕۆژنامەنووس، وتی:"ڕۆژنامووسانی هەرێمی کوردستان لە ڕەوشێکی زۆر خراپدان و سەندیکای ڕۆژنامەنووسانیش سەنگی جارانی نەماوە و لە ڕۆژنامەنووسان دوورکەوتووەتەوە".

 

محەمەد گۆران

 

هاوڕێ کوردی، چالاکوانێکی کۆمەڵگای مەدەنییە، کە چەندین جار بەهۆی بۆچوونەکانییەوە ڕووبەڕووی هێرش و پەلاماردان بووەتەوە، ناوبراو، لەبارەی ئازادیی ڕادەربڕین-ەوە وتی:"لە زۆنی زەرد ئازادیی ڕادەربڕین و کاری ڕێکخراوەکانی کۆمەڵگای مەدەنیی ڕۆژ بە ڕۆژ ئاستەمتر دەبێت و  مەترسییدارتر دەبێت".

 

هاوڕێ کوردی

 

هاوڕێ، ئاماژەی بۆ ئەوەشکرد، کە هەر ڕۆژنامەنووسانی ئەو دەزگا ڕاگەیاندنانە زیاتر ڕووبەڕووی هەڕەشە و لێدان دەبنەوە، کە کارەکانیان لەگەڵ سیاسەتی پارتی-دا یەکناگرێتەوە و ڕۆژنیوزیش بەنمونەی ئەو ڕاگەیاندنانە هێنایەوە.

 

سەبارەت بە هەمان بابەت، ڕۆژنامەنووسێکی دیکە بەناوی هێرش قادر، ڕایگەیاند:"هەرکاتێک ئاڵۆزی نێوان لایەنە سیاسییەکان زیاتر دەبێت، کاری میدیایی-ش زیاتر ئاستەنگیی بۆ دروست دەبێت".

 

هێرش قادر

 

هێرش قادر، وتیشی:ئاماری سەندیکای ڕۆژنامەنووسان، سەنتەری میترۆ و ڕێکخراوە نێودەوڵەتییەکان، دەریدەخات، کە پێشێلکارییەکان بەرامبەر بە ڕۆژنامەنووسان لە هەرێمی کوردستان و تایبەت لە هەولێر و دهۆک ساڵ بە ساڵ زیاتر دەبێت.

 

هێرش، ڕەخنەشی لە سەندیکای ڕۆژنامەنووسان و ڕێکخراوەکانی داکۆکییکردن لە مافی ڕۆژنامەنووسان گرت، کە هەوڵی جدییان نەداوە ڕاگرتنی ئەو پێشێلکارییانە.

 

ڕۆژنامەنووس ڕێبوار کاکەیی-ش، پێیوایە ڕۆژنامەنووس لە هەرێمی کوردستان بێ پشتیوانییترن کەسن، لەکاتی ئەنجامدانی هەر پێشێلکارییەک بەرامبەر بە ڕۆژنامەنووسان، لایەنە پەیوەندیدارەکان لەجیاتی پشتیوانیی سیناریۆیەک دادەڕێژن بۆ دورستکردنی بەرگێک بۆ ئەو پێشێلکارییانە.

 

ڕێبوار کاکەیی

 

ڕێبوار کاکەیی، لە بەردەوامیی قسەکانیدا بێ هیوایی خۆی لە سەربەخۆیی دادگاکانی هەرێمی کوردستان-یش نیشاندا و وتی:"هەتا ئێستا هیچ کەسیسێکی ڕۆژنامەنووسان یەکلایی نەکراونەتەوە، بۆیە ئەگەر سکاڵاش تۆمار بکەین هیچ کەسێک بەدەم سکاڵاکەوە نایەت".

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin