Smiley face
Smiley face
Smiley face

بێ بەڵێنیی حکومەت مامۆستایانی نائومێد کردووە

2017-08-21 09:28:53



ڕۆژنیوز – هاوکار مستەفا

 

ژمارەیەک لە مامۆستایانی هەڵەبجە و سەیدسادق نائومێدن لەوەی حکومەتی هەرێم دەستکاریی سیستمی پاشەکەوتی مووچە بکات، بۆئەوەی مامۆستایانیش دەوامی ئاسایی خوێندن دەستپێبکەنەوە و بەبێ بەڵێن ناوی دەبەن، بەڕێوبەری گشتی پەروەردەی هەڵەبجە-ش دەڵێت: پێناچێت ئەمساڵ مامۆستایان بایکۆتی دەوام بکەن.

 

پێویستە ڕۆژی ١٥/ئەیلول، یەکەم ڕۆژی ساڵی نوێی خوێندن بێت، بەڵام هەتا ئێستا دیار نییە ئایا مامۆستایان لەو بەروارەدا دەچنەوە هۆڵەکنای خوێندن، یان بەهۆی بەردەوامیی سیستمی پاشەکەوتی مووچەوە وەک ساڵی پار دەست بە مانگرت و خۆپیشاندان دەکەن.

 

گوڵان ئەحمەد، مامۆستا لە ئامادەیی شەهید شەوکەت لە شارۆچکەی سەیدسادق بە ڕۆژنیوزی ڕاگەیاند: دەستەڵاتدارانی باشوری کوردستان سیاسەتی برسیکردن و فشاردروستکردن لەسەر چینوتوێژە جیاوازەکان پەیڕەو دەکەن و جێبەجێکاری بەڵێنەکانی خۆیان نین، ئەوەشی زیاتر کاریگەریی ئەم سیاسەتە هەڵەیەی لەسەرە کەرتی پەروەردە و فێرکردنە.

 

گوڵان ئەحمەد

 

بەبۆچوونی گوڵان، کردنەوەی دەرگای ناوەندەکانی خوێندن لەلایەن حکومەتی هەرێمەوە بۆ ئەوە نییە خوێندکاران فێری زانست و خوێندەواریی بکرێن، بەڵکو ئامانجی تەنیا ڕاگرتنی بایکۆت و خۆپیشاندانی مامۆستایان بەڕێکردنی کاتە.

 

هەروەها، شێنێ‌ ئادەم، بەڕێوەبەری باخچەی ساوایانی شنە لە هەڵەبجە بەڕۆژنیوزی وت: بارودۆخی مامۆستایان و فەرمانبەران هێندە خراپە لە حاڵەتی کردنەوەی دەرگای خوێندنگاکانیشدا ناتوانم بەهیچ شێوەیەک فشار لە مامۆستایان و کارگوزارەکان بکەم، کە دەوام بکەن چونکە ژمارەیەک لە مامۆستایان دەبێت ڕۆژانە بە تاکسی هاتووچۆ بکەن و مووچەکەشیان هەر بەشی ئەوەدەکات بیدەن بە بەکرێ‌ تاکسی، بۆیە هەر دەبێت بڵێین هیوا دارین ئەم بارودۆخە چاکبێت.

 

شێنێ‌ ئادەم

 

ناوبراو، وتیشی: من هیچ گەشبین نیم، کە بەم زوانە بتوانرێت دەستکاریی پاشەکەوتی مووچە بکرێت، چونکە نرخی نەوت بەرزە و حکومەت خۆی نایەوێت پێداچوونەوە بە سیستمەکەدا بکات.

 

لەبەرامبەردا، سۆران عومەر، بەڕێوەبەری گشتی پەروەردەی هەڵەبجە بەپێچەوانەی لێدوانی ئەو مامۆستایانە باسی لە ئامادەکارییەکان کرد بۆ دەستپێکردنەوەی خوێندن و بە ڕۆژنیوزی ڕاگەیاند: دەستمان بە ئامادەکاریی کردووە بۆ وەرگرتنی خوێندکاری نوێ‌ و هەروەها دابەشکردنی فۆڕمی گواستنەوە بەسەر مامۆستایاندا، چونکە ئەمساڵ پێناچێت مامۆستایان بایکۆتی دەوام بکەن ئەوەش بەهۆی ئەو گۆڕانکاریانەی کە بڕیارە لە مووچەی مامۆستایان و فەرمانبەراندا بێتە ئاراوە.

 

سۆران عومەر

 

بەڕێوبەری گشتی پەروەردەی هەڵەبجە، وتیشی: تا ئێستا ڕووننییە تا کەی پارەی هاندانی مامۆستایان دابەشدەکرێت، بەڵام ئێمە لای خۆمانەوە سەرجەم ڕێکارە ئیدارییەکانمان تەواوکردووە بۆ دابەشکردنی پارەی مانگی سێ-ی هاندان و چاوەڕێی گەنجینەی سلێمانی دەکەین بۆ خەرجکردنی، بەڵام پێناچێت پێش جەژن ئەو پارەیە خەرج بکرێت.

 

حکومەتی هەرێمی کوردستان بەبیانووی قەیرانی دارایی-یەوە، زیاتر لە دوو ساڵە سیستمی پاشەکەوتی مووچە پەیڕەودەکات و بەپێی سیستمەکە، هەر مامۆستا و فەرمانبەرێک بڕی ١٥% بۆ ٧٥%ی لێ دەبڕدرێت بەپێی بڕی مووچەکەی، واتا هەتا مووچەکەی زیاتر بێت پارەی زیاتری لێدەبڕدرێت.

 

لە سەرەتای چەسپاندنی سیستمەکەدا، کە نرخی نەوت لەنێوان ٢٨ بۆ ٣٠ دۆلاردا بوو، حکومەتی هەرێم ڕایگەیاند، کە بەپێی گۆڕانی نرخی نەوت گۆڕانکاری لە پاشەکەوتدا دەکرێت و ئەگەر نرخی نەوت بەرزبووەوە بڕی پاشەکەوت کەم دەبێتەوە، بەڵام ئێستا نرخی بەرمیلێک نەوت ٤٠ دۆلار زیاترە و پاشەکەوتی مووچەش هەر وەک خۆی ماوەتەوە.

 

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin