Smiley face
Smiley face
Smiley face

سزانەدانی بکوژان بە هۆکارێکی زیادبوونی کوشتنی ژنان دەزاندرێت

2017-08-20 09:58:00



ڕۆژنیوز ـ هاوڕێ کرێکار 

 

بەشێک لە ژنانی گەرمیان پێیان وایە، زهنیەتی پیاوسالارانە و سزانەدانی بکوژانی ژن، هۆکاری زیادبوونی کوشتنی ژنانە و ژنێکیش پێیوایە بۆ کۆتاییهێنان بە توندوتیژیی دژی ژنان، دەبێت، هەردوو ڕەگەز ئاشنا بە مافەکانی ژنان بکرێت.

 

ئامارەکانی کوشتنی ژنان لە هەرێمی کوردستان مانگ بە مانگ زیاتر دەبێت.

 

ئەسما عەزیز، ژنێکی دانیشتووى شارۆچکەى کەلارە و ئاماژەی بە هەندیک لە هۆکارەکانی زیادبوونی توندوتیژییەکانی دژ بە ژنان کرد و بە ڕۆژنیوزی وت: نەبوونى ڕۆشنبیریی لە کۆمەڵگادا و ناهۆشیاریی پیاو و زهنیەتی پیاوسالارانە و تێڕوانینیان بۆ ژن لە ڕێگاى شەرەفەوە هۆکاری زیادبوونى ڕێژەى کوشتنى ژنانە لە هەرێمى کوردستان.

 

ئەسما عەزیز

 

ئەسما عەزیز، وتیشى: سزانەدانی بکوژانی ژن، هۆکارێکی دیکەی زیادبوونی کوشتنی ژنانە.

 

خەیاڵ ئەحمەد، ژنێکی دانیشتووی هەمان شارۆچکەکەیە و سەبارەت بە هەمان بابەت ئاماژەی بە بڵاوبوونەوەی فکرێکی مەترسیدار کرد لە کۆمەڵگای کوردیدا و بە ڕۆژنیوزی وت: لە کۆمەڵگای ئێمەدا سەرەڕای کوشتنی ژن، ژنەکە خۆی تاوانبار دەکرێت و ڕەوایەتیی بە کوشتنەکەی دەدرێت.

 

خەیاڵ ئەحمەد

 

خەیاڵ، پێیوایە، کە بێدەنگیی ڕێکخراوەکانی ژنان هۆکارێکی دیکەی زیادبوونی کوشتنی ژنانە و هۆکاری بێدەنگییەکەشی بۆ کۆنترۆڵکردنیان لەلایەن حزبەکانەوە گەڕاندەوە.

 

ژینۆ عەلی، ژنێکی دانیشتوى شارەدێی ڕزگارییە لە گەرمیان و لە بارەی چۆنیەتی کۆتاییهێنان بە توندوتیژییەکانی دژ بە ژنان تەنیا ئاماژەی بە خاڵیک کرد و بە ڕۆژنیوزی وت: پێویستە حکومەتى هەرێم کار بۆ ئەوە بکات، سیمینار و وۆرک شۆپی جیاجیا بۆ هەردوو ڕەگەز ڕێکبخات لە شوێنەگشتییەکان و ناوەندەکانی خوێندن، بۆ ئەوەى هەردوو ڕەگەز پێکەوە لە مافەکانی ژنان هۆشیار بکرێنەوە.

 

ژینۆ عەلی

 

بەپێی ئامارێکى دەستەی سەربەخۆی مافی مرۆڤ لە هەرێمی کوردستان، تەنیا لەماوەی مانگیکدا، لە ٢/تەموز هەتا ٢/ئاب-ی ئەمساڵ، پێنج ژن لە هەرێمی کوردستان کوژراون، تەرمی ژنێک دۆزراوەتەوە، ژنێک بریندارکراوە و ژنێک-یش خۆی سوتاندووە.

 

ئەمە لەکاتێکدایە بەپێی ئاماری مانگی پێشووتری دەستەکە، واتا لە ٢/حوزەیران هەتا ٢/تەموز، سێ حاڵەتی کوشتنی ژنان و یەک حاڵەتی خۆ کوشتنی ژن(خۆخنکاندن)تۆمارکراوە، ئەگەریش بەراوردی هەردوو ئامارەکە بکەین دەردەکەوێت تدوتیژییەکانی دژ بە ژنان زیادیکردووە.

 

بەپێی ئەو هەواڵانەش، کە ڕۆژانە لە میدیاکان-دا بڵاودەبنەوە، ژمارەی کوشتنی ژنان زیاترە لەوەی، کە لە ئامارەکانی دەستەکەدا هاتووە.

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin