Smiley face
Smiley face
Smiley face

شاندێکی کەنەکە سەردانی بەرێوەبەرایەتی کەجەکە و کەژەکەی کرد

2017-08-18 13:06:29



ڕۆژنیوز - ناوەندی هەواڵەکان

 

لە درێژەی تێکۆشانی کۆنگرەی نەتەوەیی کوردستان- کەنەکە، شاندێکی کەنەکە ئەمڕۆ سەردانی بەڕێوەبەرایەتی کۆما جڤاکێن کوردستان- کەجەکە و پاشان بەڕێوەبەرایەتی کۆمەڵێن ژنێن کوردستان- کەژەکەی کرد.

 

شاندی کەنەکە پێکهاتبوو لە فاروق جەمیل، ئەندامی  کۆنسەی دیوانی کەنەکە و دکتۆر کامیران بەرواری، ئەندامی کۆنسەی بەڕێوەبەرایەتی کەنەکە و پەروین عەزیز، بەرپرسی ژنانی کەنەکە و شەهلا هافیت، جێگری هاوسەرۆکانی کەنەکە و و فەرهاد دۆسکی، ئەندامی کەنەکە، شاندی کەجەکەش پێکهاتبوو لە جەمیل بایک، هاوسەرۆکی کۆنسەی بەڕێوەبەرایەتی کەجەکە و ڕەزا ئاڵتون، ئەندامی کۆنسەی بەڕێوەبەرایەتی کەجەکە، هەروەها شاندی کەژەکە پێکهاتبوو لە بەسێ ئەرزینجان و دکتۆر ژیان گارزان، ئەندامانی کۆردیناسیۆنی کەژەکە.

 

لە کۆبوونەوەی کەنەکە و کەجەکەدا سەرەتا جەمیل بایک بەخێرهاتنی شاندەکەی کرد و پاشان فاروق جەمیل قسەی کرد و وتی:"تەنیا هیوایەک کە لە باشور ماوەتەوە پێکهێنانی یەکێتی نەتەوەییە، ڕاوێژی نەتەوەیی کە لە سلێمانی بەڕێوەچوو زۆر گرنگ بوو، پاش ئەو کۆنفرانسە بەنیازین کۆنفرانسێکی گشتی دیکەش بەڕێوە ببەین، بەم کۆنفرانسانە دەمانەوێت ئامانجی یەکێتی نەتەوەیی بە سەرکەوتووییەوە پێکبێنین".

 

 

پاشان جەمیل بایک قسەی کرد و وتی:"پێویستە بەرژەوەندییە نەتەوەییەکانی کورد بەراورد بە هەموو شتێکی دیکە لە ئەولەوییەتدا بن و هەموو نەتەوەی کورد پێویستە بەم تێڕوانینەوە سەیری پرسی نەتەوەیی کورد بکەن، باوەڕمان وایە کەنەکە دەتوانێت بە سەرکەوتووییەوە ئەم کارە بە ئەنجام بگەیەنێت، یەکێتی نەتەوەیی تەنیا بۆ بەشێک لە کوردستان نییە و بە واتای یەکێتی هەموو بەشەکانی کوردستانە".

 

لە کۆبوونەوەی کەنەکە و کەژەکەشدا، شاندی کەنەکە ڕایگەیاند، کە کۆنگرەی نەتەوەیی کوردستان گرنگی زۆر دەداتە ڕۆڵی ژنان لە پێکهێنانی یەکێتی نەتەوەیی و پێویستە بەرگری بکرێت لە دەستکەوتەکانی تێکۆشانی ژنان.

 

کۆردیناسیۆنی کەژەکەش ڕایگەیاند، کە ژنانی کورد بە قارەمانانە بەرگری دەکەن لە دەستکەوتەکانی نەتەوەی کورد و بەتایبەتی دەستکەوتەکانی تێکۆشانی ژنانی کورد، کۆردیناسیۆنی کەژەکە پشتگیریی لە خەباتی کۆنگرەی نەتەوەیی کوردستانیشی ڕاگەیاند.

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin