Smiley face
Smiley face
Smiley face

هەولێر، زیاتر لە دوومانگە ئاسایشی پارتی هاوڵاتییەکی باکوری بێسەروشوێن کردووە

2017-05-18 10:21:43



ڕۆژنیوز - هەولێر

 

ڕۆژی ٤ی ئازار لە چوارچێوەی خۆپیشاندانێکدا بەرامبەر بە هێرشی چەکدارەکانی پارتی بۆسەر خانەسۆر و شەنگال، حاجی ئوزەن کە پەنابەرێکی سیاسی باکوری کوردستانە لە هەولێر، دەستگیرکرا و تا ئێستا هیچ هەواڵێک لە بارەیوە نییە.

 

لەبارەی چارەنووسی ماشاڵا ئوزەنەوە، کچە مامێکی حاجی ئوزەن بۆ ڕۆژنیوز دەدوێت و باس لە گوشارەکانی پارتی دەکات و دەشڵێت کە نازانن بۆچی ئوزەن دەستگیرکراوە.

 

ماشاڵا ئوزەن، کە ئامۆزای حاجی ئوزەنە، دەڵێت:"نزیکەی دوو مانگ و ١٥ ڕۆژە حاجی ئوزەن دەستگیرکراوەو تا ئێشتا هیچ زانیارییەکمان لەبارەیەوە بە دەست نەگەیشتووە، دۆخی تەندروستی دایکی باش نییە، حەوت جار نەشتەرگەری دڵی کردووە، من تەنانەت ناتوانم پێی بڵێم کوڕەکەت دەستگیرکراوە، پێویستە ئەمە قبوڵ نەکرێت و بەخێرایی ئازادی بکەن، ئاسایش دڵنیامان ناکاتەوە کە لای ئەوان دەستگیرکراوە، بەڵام ئێمە دەزانین کە لە ژووری چواری زیندانی ئاسایشی گشتی هەولێردا دەمێنێتەوە".

 

 

ناوبراو لە بەردەوامی قسەکانیدا وتی:"تا ئێستا نەمانتوانیوە بیبینین، ئێمە پێیان دەڵێین باشە قبوڵمانەو دەستگیرکراوە، لانی کەم ڕێگابدەن جارێک بیبینین، چەند جار چووم بۆ ئاسایشی گشتی، ناو و پاشناو و ژمارە و هەموو شتێکم داوە کە هەواڵێکم لە بارەیەوە پێ ڕابگەیەنن، بەڵام هیج هەواڵێک نییە، تەنانەت هۆکاری دەستگیرکردنەکەشیانمان پێ ناڵێن، نە ئێمە و نە کەسی دیکەش نازانێ بۆچی دەستگیرکراوە".

 

ماشاڵا ئوزەن لە کۆتایی قسەکانیدا وتی:"زۆر ئاساییە، هەموو کەسێک سیاسییە، هەموو کوردێک چ لە باشور و چ لە باکوری کوردستان سیاسین، هیوادارین هەواڵێکمان لەبارەیەوە پێ ڕابگەیەنن، ئەوە دەبێتە نزیکەی سێ مانگ کە ئاگامان لێی نییە، ئەندامانی خێزانەکەشی سەردانی ئاسایشی گشتیان کردووە، بەڵام هیچ وەڵامیان نەداوەتەوە".

 

جێگای ئامەژەیە، ڕۆژی ٣ی ئازاری چەکدارانی پارتی هێرشیان کردە سەر خانەسۆری سەربە شەنگال و ڕۆژی ٤ی ئازاریش ژمارەیەک لە چالاکوانانی مەدەنی لە شاری هەولێر هەستان بە دەربڕینی ناڕەزایی بەرامبەر بەو هێرشە، چەندین کەسیان پێش دەستپێکردنی خۆپیشاندانەکە لەلایەن ئاسایشی پارتییەوە دەستگیرکران پاش ماوەیەک هەموویان ئازادکران، بەڵام حاجی ئوزەن کە پەنابەرێکی سیاسیی خەڵکی باکوری کوردستانە هێشتا ئازادنەکراوەو نیگەرانییەکان لەبارەیەوە ڕۆژ لەدوای ڕۆژ زیاتردەکەن.

 

ئەمە لە کاتێکدایە، کە سێ ڕۆژ پاش دەستگیرکردنی ئەوچالاکوانانە، دادگای هەولێر بڕیاری ئازادکردنی هەموو دەستگیرکراوانی دا بەڵام ئاسایشی پارتی ئەم بڕیارەی دادگای جێبەجێنەکرد.

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin