Smiley face
Smiley face
Smiley face

زەحمەتكێشان: ڕیفراندۆم بکرێت و نەکرێت کاراکردنەوەی پەرلەمان گرنگە

2017-05-14 09:29:44



ڕۆژنیوز – سۆران حسێن

 

ئەندامێکی دەستەی سەرۆکایەتی حزبی زەحمەتکێشانی کوردستان ڕایدەگەیەنێت، کە ڕیفراندۆم بکرێت و نەکرێت کاراکردنەوەی پەرلەمان زۆر گرنگە.
 

بەڵێن عەبدولا، ئەندامی دەستەی سەرۆکایەتی حزبی زەحمەتکێشانی کوردستان لە چاوپێکەوتنێکی تایبەتی ڕۆژنیوزدا، باس لە دواین گۆڕانکارییەکانی حزبەکەی و دۆخی هەرێمی کوردستان و پارچەکانیتری کوردستان دەکات، هەروەها رایدەگەیەنێت کە ئەوان لە ئێستادا کۆنگرەی نەتەوەی کورد بە گرنگترین کار بۆ یەکڕیزی کوردەبینن و دەشڵێت، ئەوەی بەڕاستی داعشی تێکشکاند پێشمەرگەو شەڕڤانان بوون، باسیش لە گرنگی پەیامەکانی ئۆجالان بۆ ئاشتی دەکات.

 

دەقی چاوپێکەوتنەکە:

 

-سەرەتا باسێک لە دواین کۆنگرەی حزبەکەتان بکەن کە چەند ڕۆژێک لەمەوپێش بەڕێوەچوو؟

 

"ڕێژەی ١٠%ژن لە کۆنگرەدابوو"

 

بەڵێن عەبدوڵا: کۆنگرەی ئەمجارەمان نۆیەمین کۆنگرەبوو، تێیدا ٢٦٥ ئەندام بەشدارییان کرد، بە بەشداری ١٠%ی ژنان.

 

-پێتانوانییە بۆ ئەمڕۆ ١٠% کەمە بۆ ژنان؟
 
"حەزمان دەکرد ڕێژەی ژنان زیاتربێت"
 
بەڵێن عەبدوڵا: ئێمە حەزمان دەکرد لەو ڕێژەیە زیاتربێت، بەڵام بەپێی حزوری ژنان لە سیاسەت و حزبەکاندا ڕێژەکە ئەوەندەبوو، بەداخەوە کەوایەو ئێمە دەمانخواست زیاربێت.

 

-ئێستا سیستمی زەحمەتکێشان چۆن بەڕێوەدەبرێت؟
 
"دەستەی سەرۆکایەتییە"
 
بەڵێن عەبدوڵا: لە کۆنگرەی ڕابردووەوە ئێمە سکرتێرمان لابردووەو دەستەی سەرۆکایەتیمان بەکارهێناوە، لەم کۆنگرەدا داوایەک هەبوو بۆ گەڕانەوەی سیستمی سکرتێری، بەڵام بەزۆرینە ڕەتکرایەوە، ئێمە پێمانوایە کە نابێت دەسەڵاتەکان لای یەک کەس کۆببێتەوە، بۆیە ئێستا دەستەی سەرۆکایەتی سێ کەسە،و مەکتەبی سیاسی و کۆمیتەی ناوەندی حزب بەڕێوەدەبەن، لە چەند ساڵی ڕابردوودا ئەم شێوازەمان سەرکەوتوو بووە.
 

-پرۆژەی ئێوە چییە بۆ ئەم دۆخەی هەرێمی کوردستان؟

 

"نەخشەمان هەیە ئەگەر گوێمان لێبگیرێت"

 

بەڵێن عەبدوڵا: ئێستا دوو بابەتی چارەنووسساز ڕووبەڕوومان دەبێتەوە، ئەویش قەیرانی سیاسی و داراییە، ئێستا ڕیفراندۆمیش هاتووەتە سەری، ئێمە نەخشەی خۆمان هەبووەو لە ئێستاشدا لەسەر پرسی چارەی خۆنووسین و  قەیرانی سیاسی وەفدی ئێمە بڕیارە سەردانی لایەنەکان بکات، لە ڕاپۆرتی کۆنگرەدا بەدرێژیش باسمان لە قەیرانی دارایی و هۆکارەکانی کردووە، نەخشەڕێگامان هەیە ئەگەر گوێمان لێ بگرن.

 

-بۆچی پێتان وایە گوێتان لێناگرن؟
 
"پێگەمان لاوازە"
 
بەڵێن عەبدوڵا: مەبەستم لە گوێنەگرتن ئەوەیە، کە ئێمە تێڕوانینمان هەیە، بەڵام پێگەمان لە پەرلەمان لاوازە، بۆیە کاتێک کە لاوازبوویت زەحمەتە وەڵام بۆ پرۆژەکەش هەبێت.
 

-بە گشتی سیاسەتی کورد چۆن هەڵدەسەنگێنن؟

 

"ئەوەی بەڕاستی داعشی تێکشکاند پێشمەرگەو شەڕڤانانن"

 

بەڵێن عەبدوڵا: ئێستا کورد لە هەلومەرجێکی زۆر ناسکدایە، کورد بە تێکۆشانی خۆی لەهەر چوارپارچەی کوردستان قۆناغێکی باشی لە ڕۆژهەڵاتی ناوەڕاستدا بڕیوە، ئێستا هێزێکی حساب بۆکراوەو بەهێزە، بێ کورد ئاسان نییە چارەنووسی ناوچەکە دیاری بکرێت، دیارە ئەوەی ئەمڕۆ بە ڕاستی شەڕی داعش دەکات و تێکیدەشکێنێت ئەوە پێشمەرگەو شەڕڤانانن، بۆیە گرنگە ئەو پێگەیەمان بەهێزتربکەین و هەمووکێشەکان بە گفتوگۆو لە چوارچێوەی پرۆژەیەکی نەتەوەییدا چارەسەربکەین.

 

-ئێستا بەشێکی زۆری لایەنەکان کاراکردنەوەی پەرلەمان لە ڕیفراندۆم بەگرنگتر دەزانن جگە لە پارتی، زەحمەتکێشان بۆچوونی چییە؟
 
"دەبێت نەخشەڕێگایەک دابنێین"
 
بەڵێن عەبدوڵا: پرۆژەی ئێمە ئەوەیە دەبێت هەموو لایەنەکان پێکەوە پرۆژەی سەربەخۆیی کوردستان واژۆبکەن، پاشان نەخشەڕێگایەک لەسەر چۆنییەتی ڕیفراندۆم دابنێین کە چۆن هەر لە هاوڵاتیانەوە تا ڕێکخراوەکان و وڵاتانی هەرێمی و ئەورپی بۆ دۆزەکە ڕابکێشین، باس لە چۆنییەتی کاراکردنەوەی پەرلەمانیش بکەین.
 

-کەوایە ڕیفراندۆم پێش کاراکردنەوەی پەرلەمان بکرێت؟

 

"پاش و پێشیان نییە"

 

بەڵێن عەبدوڵا: کاراکرانەوەی پەرلەمان و ڕیفراندۆم پاش و پێشیان نییە، ئێمە نابێت وابیربکەینەوە کە بڵێین پەرلەمان کارابکرێتەوە یان نا، ئێستا پەرلەمان لەکارخراوە، گریمان ڕیفراندۆم هەرناکرێت، خۆ دەبێت پەرلەمان هەر کارابکرێتەوە، کەوایە ئێمە ڕیفراندۆم هەبێت و نەبێت دەبێت پەرلەمان کارابکرێتەوەو کێشە سیاسییەکانی ناوخۆ و ئەوانەی لەگەڵ بەغدا هەیە چارەسەربکرێت، بۆیە تکا لە هەموو میدیاکاران دەکەم هێندە شتەکان پەیوەستی یەک نەکەن، کێشەکان هەر دەمێنن، بەڵام دەبێت لەپێناو خەڵکدا چارەسەیان بکەین، نەک لە هەرێم لە هەموو پارچەکان.

 

-ئایا هیچ ئاسۆیەک نەماوە بۆ مانەوە لەگەڵ بەغدا دا؟
 
"ئەو کێشانە نوێ نین"
 
بەڵێن عەبدوڵا: کێشەی هەرێم و بەغدا تەنها ئەمانەی ئێستا نین، ئەوانەش ئێستا هەن دەرهاویشتەی سەرەتای درووستبوونی عێراقە، ئەوە ١٠٠ساڵە ئەم دەوڵەتە هیچ بەرهەمێکی نەبووە بۆ گەلانی عێراق و بەتایبەت کورد، دوای روخانی بەعس وتمان ڕەنگە گۆڕانکاری بکرێت، بەڵام ئەوە چواردە ساڵە بەهەمان شێوە دەڕوات، دەبێت کوردو پێکهاتەکانیتر ئازاد بکرێن کە چارەنووسی خۆیان دیاری بکەن، ئێستا فەرماندەکانی حەشدی شەعبی دەڵێن دوای داعش شەڕی تەقسیم (دابەشبوون) دەکەین، لە کاتێکدا ئەوان عێراق دابەش دەکەن نەک کورد.
 

-دەوترێت لیژنەی ئامادەکاری بۆ ڕیفراندۆم درووستدەکرێت، زەحمەتکێشان بانگهێشتی ئەو لیژنەئە کراوە؟

 

"کێشەیەک درووستبووە بەس وردەکارییەکەی نازانم"

 

بەڵێن عەبدوڵا: چەند هەفتەیەک پێشتر کە پارتی و یەکێتی سەردانی لایەنەکانیان کردو چوونە بەغداو هاتنەوە، داوای کۆبوونەوەو دیاریکردنی لیژنەیەک کرا، بەڵام تا ئێستا ئەو کۆبوونەوە نەکراوە، پێموایە ئەو کۆبوونەوەیە بۆ درووستکردنی چەند لیژنەیەکە بۆ سەرپەرشتیکردنی ڕیفراندۆم، نەک تەنیا لیژنەیەک، بۆیە تا ئێستا هیچ لیژنەیەک درووستنەکراوە، ئەوەی هەبوو تەنها بۆ کۆبوونەوەکە بووە، کە ئێمەش نوێنەرمان دیاری کردووە، بەڵام پێدەچێت گرفت پێشهاتبێت، کە من وردەکارییەکانی نازانم.

 

-بۆچوونی حزبی زەحمەتکێشان لەسەر دۆخی شەنگال چییە؟

 

"لەگەڵ ئەوەداین کە بەگفتوگۆکێشەکان چارەسەربکرێن"
 
بەڵێن عەبدوڵا: بۆ دۆخی شەنگال ئێمە بێگومان لەگەڵ ئەوەداین هەموو کێشەکان بە گفتوگۆ چارەسەربکرێت، دەبێت لە هەموو پارچەکان و نێوان هەموو لایەنەکان دەبێت بە گفتوگۆ جارەسەربکرێت و هیچ لایەنێکی هیچ پارچەیەک دژایەتی یەکتر نەکەن، پێویستە لایەنەکان وەک پێویست پشتیوانی یەکتر بکەن، بۆنمونە ئێمە تا زاخۆ لایەنێکی سیاسین، لە زاخۆ بەولا دەبێت پشتیوانی خەباتی باکور بکەین، ئێمە بەگشتی پێمانوایە دەبێت هەموو کێشەکان بەگفتوگۆ چارەسەربکرێت لە چوارچێوەی کۆنگرەی نەتەوەییدا.

 

-لە چەند مانگی ڕابردوودا کەجەکە بە فەرمی داوای کۆنگرەی نەتەوەیی کرد، کەوایە ئێوەش هەمان داواتان هەیە بۆ چارەسەری کێشەکان؟
 

"کۆنگرەی نەتەوەیی ئەمڕۆ لە سبەی گرنگترە"

 

بەڵێن عەبدوڵا: بێگومان ئێمەش هەمان باوەڕمان هەیە، ئەوەش داواکارییەکی تازەی ئێمە نییە، هەر لەسەرەتا کارمان بۆکردووەو خەباتمان بۆ کردووە، لە ئێستاشدا ئەندامی کۆنگرەی نەتەوەیی کوردستان، کەنەکە-ین، گرنگە کەنەکەش ببێتە بەشێکی گەورەی کۆنگرەکە، کە ئەم کۆنگرەیە ڕۆژێک زووتربێت باشترە.

 

-زیاتر لە بیست ساڵە هێزێکی گەورەی سوپای تورکیا لە هەرێم هەیە، پێتانوانییە کە هەموو لایەنەکان دەبێت هەڵوێستیان هەبێت لەبەرامبەر ئەو هێزەدا؟
 
"هەبوونی ئەو سەربازانە پەیوەندی بەڕێککەوتنی لایەنێکەوە نییە"
 
بەڵێن عەبدوڵا: هەبوونی ئەو سوپایە بە بڕوای ئێمە پەیوەندی بە هاوپەیمانییان لەگەڵ لایەنێکدا نییە، نەک هەر هەرێم، بەڵکو عێراق بەگشتی بووە بە مەیدانی دەستێوەردانی سەربازی و سیاسی وڵاتان، بۆیە لە هەموو حاڵەتێکدا دەبێت کورد لەگەڵ ئەو وڵاتانەدا گفتوگۆبکەن، ئەوان بەرژەوەندییان هەیە، ئێمەش هەمانە، پێویستە وەک هەموو دنیا بەرژەوەندی هاوبەش هەبێت، بەتایبەتتر ئەگەر دەوڵەتەکان دراوسێشبن.
 

وتیشی: بۆیە گرنگە لێپرسراوانی هەرێم لەگەڵ ئەو وڵاتانەدا بکەونە گفتوگۆوە، دەبێت ڕێگای دەستێوەردانی هیچ وڵاتێک نەدرێت و ئێمەش دەست وەرنەدەینە کارەکانیان، بێگومان کەس پێی خۆشنییە یەک جوندیش هەبێت لە هەرێم دا، بۆچی لێرەبن!، ئیشیان چییە، با هەرکاتێک خۆمان داوامانکرد بێن، گرنگە حکومەت و پەرلەمان ئەو کێشانە چارەسەر بکەن.

 

-ئێوە لەگەڵ لایەنە سیاسییەکانی پارچەکانی دیکەی کوردستاندا پەیوەندیتان چۆنە؟

 

"پەیوەندیمان لەگەڵ هەموو لایەنەکاندا باشە"
 
بەڵێن عەبدوڵا: لە چوارچێوەی کاری نەتەوەییدا پەیوەندی و دۆستایەتیمان لەگەڵ هەموو لایەنە سیاسییەکاندا هەیە لە ڕۆژهەڵات و باکورو ڕۆژئاوا، هەموو هەوڵێکیشمان داوە بۆ چارەسەرکردنی کێشەکان، بۆ ئەوەی بە کێشەوە نەچینە ناو کۆنگرەی نەتەوەییەوە.
 
-ئازادبوونی زیندانییە سیاسییەکانی باکوری کوردستان بۆ گرنگیدان بە ئاشتی چۆن هەڵدەسەنگێنن؟
 
"پرۆژەکەی ئۆجالان زۆر سەرکەوتووبوو لە پێناو ئاشتیدا"
 
بەڵێن عەبدوڵا: کاتی خۆی بەڕێز عەبدوڵا ئۆجالان پرۆژەی ئاشتی چارەسەری دیموکراتی خستە ڕۆژەڤ و کارەوە، کورد زۆر سودی لێبینی، بەرهەمی ئەو پرۆژەبوو گەلەکەمان ٨١ کورسی بەدەستهێنا، ئێمە وتومانە گرنگە کورد هەر پەرە بە ئاشتی بدات، با تۆپەکە لە ساحەی ئەوان بێت، گەل و وڵاتانیش ئەوکاتە لە پشتت دەبن، بۆیە پرۆژەکەی بەڕێز ئۆجالان سەرکەتووبوو، ئەگەر بەرامبەرەکەشت کۆسپت بۆ درووستبکات ئەوە هەرتۆ براوە دەبیت، شەڕ لە سوودی کورد نییە.
 
 
س.ح


-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin