Smiley face
Smiley face
Smiley face

وێڕای بڕینی بەشە دەرمان نەخۆشخانەی گەل لە بناری قەندیل بەردەوامە

2017-04-21 13:29:06



ڕۆژنیوز- محەمەد حەسەن

 

وێڕای بڕینی بەشەدەرمان لە لایەن وەزارەتی تەندروستی هەرێمی کوردستانەوە، نەخۆشخانەی گەل لە بناری قەندیل بەردەوامە لە چارەسەرکردنی نەخۆشەکانی ناوچەکە، هاوکات سەرەڕای بچوکییەکەی، لە شوێنی دیکەشەوە نەخۆشەکانی سەردانی ئەو نەخۆشخانەیە دەکەن.

 

وەزارتی تەندروستی حكومەتی هەرێمی كوردستان ماوەی هەشت مانگە بەشە دەرمانی نەخۆشخانەی گەلی بڕیوە لە بناری قەندیل، ئەوەش نیگەرانی دانیشتوانی بناری قەندیل و زۆرێك لە هاوڵاتیانی باشوری كوردستانی لێكەوتۆتەوە.

 

هاوڵاتییەك بە ناوی ئاسیە عەبدوڵڵا كە لە ڕانیەوە سەردانی نەخۆشخانەی گەلی كردووە لە بناری قەندیل دەڵێت: من ماوەیەكی زۆرە لە ڕانیەوە سەردانی ئەم نەخۆشخانەیە دەكەم بە ڕاستی هەم كارمەندانی و هەمیش دكتۆری نەخۆشخانەكە مامەڵەیەكی زۆر باشیان لە گەل خەڵكدا هەیە، لە ئێستاشدا كە وەزارەتی تەندروستی حكومەتی هەرێمی كوردستان بڕی دەرمانی نەخۆشخانەكەی بڕیوە، لێرەوە داوا لە لە لایەنی پەیوەندیدار دەكەم كە هاوكاری نەخۆشخانەی گەل لە بناری قەندیل بكەن، چونكە لە ڕاستیدا ناوەی نەخۆشخانەكە دیارە و تەنیا لە خزمەتی گەلی كوردایە.

 

هاوڵاتیەكی تر بەناوی كەریم ئەحمەد، بۆ یەكەم جارە سەردانی نەخۆشخانەی گەل دەكات لە بناری قەندیل و وتی: من سەردانی نەخۆشخانەی زۆرم كردووە، بەڵام بۆ یەكەم جارە دەبینم لێرەدا بە بێ جیاوازی و واستەكاری هەموو كەسێك وەك یەك سەیر دەكرێت و دكتۆرەكەش بە باشی سەیری نەخۆش دەكات و مامەڵەی لە گەل نەخۆشەكان زۆر باشە.

 

كەریم وتیشی: داوا لە كەرتی تەندروستی دەكەین كە بە بێ جیاوازی چۆن دەرمان بۆ بنكەكانی تەندروستی هەرێمی كوردستان دابین دەكات ئاوەهاش بۆ ئەم بنكەیەش دابینی بكات، چۆن یارمەتی نەخۆشخانەی هیوا لە سلێمانی دەدەن كە نەخۆشخانەیەكی خێرخوازییە، بەم شێوەیەش یارمەتی ئەم نەخۆشخانەیەش بدەن.

 

هەروەها دكتۆر میدیا مستەفا كە لەم نەخۆشخانەیە بە بێ بەرامبەر نەخۆش چارەسەر دەكات، بە ڕۆژنیوزی ڕاگەیاند: ئێرە نەخۆشخانەی گەلە لە بناری قەندیل پێشتر نەخۆشخانەیەكی تر هەبوو، بەڵام لە لایەن فرۆكەكانی توركیا بۆردومان و وێران بوو، لە ئێستاشدا ئەم ئەنەخۆشخانەیە لە لایەن وڵاتپارێزێكی خەڵكی شاری سڵیمانیەوە دروست كراوە، لەم نەخۆشخانەیە تاقیگەی سۆنەر، ئی سی جی، هێلكاری دڵ و هەروەها بەشی فریاگوزرایشی لێیە.

 

 

سەبارەت بە بڕینی بەشە دەرمانی نەخۆشخانەكە لەلایەن وەزارەتی تەندروستی هەرێمەوە، د. میدیا وتی: وەزارتی تەندروستی بەشە دەرمانی ئێمەی بڕیوە، ڕاستە بە هۆكاری قەیرانی داراییەوە دەرمان بۆ بنكە تەندروستییەكانی دیكە كەم كراوەتەوە، بەڵام دەبێ ئەم نەخۆشخانەیەش وەك نەخۆشخانەكانی تر سەیر بكرێت.

 

ئێمە داوا لە هەموو خێرخواز و مرۆڤ دۆستێك دەكەین كە ئەگەر لە توانایان دابێت بتوانن هاوكاری نەخۆشخانەی گەل بكەن لە بناری قەندیل، چونكە سەرەڕای بۆردومانی فرۆكەكانی توركیا، دیسان خەڵكێكی زۆر ڕوو لەم نەخۆشخانەیە دەكەن، ڕۆژانی یەكشەممە تا پێنجشەممە دەرگای نەخۆشخانە بە ڕووی هاوڵاتیاندا كراوەیە، هەر بۆ ناونوسینیش لە كاتژمێر 7:30 تا 9:30 ناوەكان دەنوسرێن.

 

 

 

 

 

 

د.خ

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]mail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin