Smiley face
Smiley face
Smiley face

"میدیای كوردی بە بەردەوامی لەقەیراندابووە"

2017-04-21 10:44:09



ڕۆژنیوز ـ هاوڕێ كرێكار

 

مامۆستایەكی زانكۆ ئاماژە بەوە دەكات، میدیای كوردی بەبەردەوامی لەقەیراندابووە و لە هەموو ئاستەكاندا نەیتوانیوە پیشەییانە پەیامی میدیای بگەیەنێت، هەروەها ڕەوشی ئازادی ڕادەربڕین لە دۆخێكی زۆرخراپدایە، هاوشانی ئەمەش ئازادی بڵاوكردنەوەی زانیارییەكانیش لەدۆخێكی خراپتردایە.

 

بە بۆنەی ساڵرۆژی ڕۆژنامەگەریی كوردییەوە، مامۆستایەكی زانكۆ تیشك دەخاتە سەر ئەوەی لەباشوری كوردستان تیرۆركردن و هەڕەشەكردن لە ڕۆژنامەنووسان لەسەر بڵاوكردنەوەی گەندەڵییەكان و خستنەڕوی ڕاستییەكان بەردەوامی هەیە و لەگەڵ ئەوەشدا ئازادی ڕادەربڕین لە دۆخێكی زۆر خراپدایە.

 

ئەركان ڕەوف، مامۆستای ڕاگەیاندن لەزانكۆی سلێمانی سەبارەت بەڕەوشی ڕۆژنامەگەری لەهەرێمی كوردستان بە ڕۆژنیوزی وت: لەڕووی ناوەڕۆكەوە میدیای كوردی بەبەردەوامی لەقەیراندابووە و لە هەموو ئاستەكاندا نەیتوانیوە پیشەییانە پەیامی میدیایی بگەیەنێت، ئەوانەی سەر بەحزبەكان بوون هەمیشە لەبەرگێكی میدیایدا خەریكی پروپاگەندەی سیاسی بوون، ئەو دەزگایانەی تریش، كەجۆرێك لەسەربەخۆییان هەبووە، بەهۆی پێنەدانی زانیاریی و كەم ئەزمونییەوە وەك پێویست نەیانتوانیوە پیشەییانە كارەكانیان بكەن و زۆر جار ئەوانیش وەك میدیای حزبی بوون بەبەشێك لە پروپاگەندەكاری سیاسی، جا بەمەبەستبێت یان بێ‌ مەبەست.

 

 

ئەركان ڕەوف وتیشی: لەئێستاشدا بەهۆی قەیرانی داراییەوە دەزگا میدیاییەكان و بەتایبەت ئەوانەی سەربەخۆیانە لەڕووی داراییەوە دەیان ویست پشت بەخۆیان ببەستن داخراون، یان بە ئاستێكی لاواز بەردەوامن، لە بەرامبەردا میدیایەكی سێبەر بەكوالێتی باشتر و بەپشتیوانی دارایی زیاتر دەركەوت و لەڕووی تەكنیك و تەكنەلۆژیاشەوە بە ئاستێكی بەرز پەیامە میدیاییەكانیان بە وەرگرەكانیان دەگەیەنن، بەڵام لەناوەڕۆكێكی تەواو سیاسی ئاراستەكراو، زۆرجاریش وەك دەزگایەكی پروپاگەندەی سیاسی زانیارییەكان بەشێوێنراوی دەگەیەنن، ئەگەرچی لەڕووی شێوەوە خۆیان وەك پرۆفیشناڵ بەوەرگرەكانیان دەناسێنن، ئەمەش قەیرانێكی گەورەترە لە بواری كاری پیشیەییانەی میدیا.

 

هەروەهاناوبراو ئەوەشی وت: لەگەڵ هەموو ئەمانەشدا هەواڵی ناڕاست (Fake news)، كە ئێستا بەشێك لەوڵاتان بەپلانەوە دەیانەوێت ڕووبەرووی ببنەوە بەهۆی ئەم جۆڕە لە هەواڵ ، بەڵام لێرە حكومەت خۆی بەشێكە لە دروستكەری (Fake news) بۆ سەرلێشێوانی خەڵك و بڕوانەكردن بەزانیارییە ڕاست و بەڵگەدارنەی لەسەر گەندەڵی و نایاساییەكان و پێشێلكاریەكانیان بڵاودەكرێنەوە.

 

مامۆستاكەی بەشی ڕاگەیاندنی زانكۆی سلێمانی ئاماژەی بەوەش دا: ڕەوشی ئازادی ڕادەربڕین لە دۆخێكی زۆر خراپدایە، هاوشانی ئەمەش ئازادی بڵاوكردنەوەی زانیارییەكانیش لەدۆخێكی خراپتردایە، هەمیشە ئەوانەی زانیاری ڕاستیان لایەو  و بڵاویان دەكەنەوە مەترسی تیرۆر و هەڕەشەیان لەسەرە، كوشتنی چەند ڕۆژنامەنووسێك لەچەند ساڵی ڕابردوودا بەڵگەی ئەو مەترسیانەن لەسەر ئازادی بڵاوكردنەوەی زانیاری و و بیرو ڕا هەیە، بەردەوامیش دۆخەكە بەرەوخراپتر دەچێت ئەوەش بەهۆەی ئەوەی فەرمانڕەواكان خۆیان بەشێكن لەو هەڕەشانەی لەسەر ئەو ئازادیەی هەیە.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin