Smiley face
Smiley face
Smiley face

ئاکەپە خۆی بۆ شەڕێکی گەورە ئامادە دەکات دژی شەنگال و قەندیل

2017-04-17 14:06:59



ڕۆژنیوز - ناوەندی هەواڵەکان

 

ئاکەپە سەرقاڵی ئامادەکارییە کە لە کۆتایی ئەم مانگەدا بە هاوکاری پارتی شەڕێکی گەورە دژی تەڤگەری ئازادی گەلی کورد دەستپێبکات.

 

کۆبوونەوە و سەردانەکانی بەرپرسانی ئەمنی و ئیستخباراتی و سیخوڕی تورکیا و پارتی لەم دواییانەدا زیادیان کردووە، بەگوێرەی زانیارییەکان ئامانجی سەرەکی ئەم کۆبونەوانە دەستپێکردنی هێرشێکی گەورەیە بۆ سەر هەرێمەکانی پاراستنی مەدیا و شەنگال.

 

ڕاگەیەندراوە، کە جێگری بەپرسی میتی تورک پاش ئەوەی هێزەکانی لە باشیق کۆکردووەتە لەگەڵ مەسرور بارزانی، بەرپرسی پاراستنی پارتی کۆبووەتەوە و لە هەولێریش لەگەڵ بەرپرسەکانی پارتی دانیشتووە، لەو کۆبوونەوانەدا بڕیاری هێرشێکی قورس دژی هەرێمەکانی پاراستنی مەدیا و ناوچەکانی شەنگال و دەوروبەری شەنگال دراوە.

 

ئاکەپە بەنیازە بە هاوکاری پارتییەوە هێڵێکی هێرشی سەربازی لە بامەڕنێ و لە خوار ئامێدییەوە تاوەکو ئاکرێ دروست بکات، بۆ ئەمەش ماوەیەکە هێزەکانی دەوڵەتی تورک لە بامەرنێ، ئامێدی و شارۆچکەی شێلادزێ جێگرکردووە و بەنیازە ئەو هێزانەی لەسەر هێڵێک تاوەکو ئاکرێ بەرفراوان بکاتەوە.

 

بۆ ئەم مەبەستەش سەرچاوە خۆجێییەکان ڕایانگەیاندووە، کە دەوڵەتی تورک هێزەکانی ڕەوانەی سلۆپی و شرناخ کردووە و ژمارەیەکی زۆری چەکی قورس و تانک لە ناوچەی باشیق جێگرکردووە و چەندین بارەگای سەربازی لە ناوچەکانی بامەرنێ، کانیماسی و باتوفا دروستکردووە.

 

هەروەها چیاکانی قەندیل ماوەی سێ ڕۆژە لەلایەن فڕۆکە جەنگییەکانی سوپای تورکەوە بۆردومان دەکرێن، بەم بۆردومانانەش دەیانەوێت کە هێڵەکەیان تاوەکو زاخۆ درێژبکەنەوە و بەرە بەرە بەرەو ئاکرێ بەڕێبکەون، بەپێی ڕاگەیەندراوەکە، ئەو بۆردومانە سێ ڕۆژەیە لە ١٧ خاڵی جیاوازی قەندیل ئەنجامدراوە و لە شوێنە جیاوازەکانی نزیک لەو خاڵانەش هێزی سەربازیان جێگرکردووە بۆ ئەنجامدانی ئۆپەراسیۆنی سەربازی، بۆ ئەمە کارەش پشتگیری چڕوپڕی هێزەکانی پارتییان هەبووە، دەوترێت پارتیش هێزێکی ١٢٠٠ کەسی ناردووەتە ئەو ناوچانە.

 

بەگوێرەی ئەو هەواڵانەی کە دەزگا ڕاگەیاندنەکانی پارتی لە باشوری کوردستان بڵاوی دەکەنەوە، هێزەکانی پارتی و تورکیا بەنیازن ئۆپەراسیۆنێکی بەرفراوان دژی قەندیل، شەنگال و گرێسپی ئەنجام بدەن، هەواڵەکان لە ناوچەکە ئەمە ئاشکرادەکەن، کە هێزەکانی پارتی گوندەکانی دەوروبەری ئاکرێ بەزۆر چۆڵ دەکەن.

 

لە دۆخێکی بەم شێوەیەدا، هیچ کاردانەوەیەکی نێودەوڵەتی بەرامبەر بە پلانانەی تورکیا و پارتی لە ئارادا نییە، پێشتر کاتێک سوپای تورک لە گرێسپی بە نیازی ئەنجامدانی ئۆپەراسیۆن بوو، هێزەکانی ئەمریکا لەوێ ئاڵای خۆیان هەڵکرد و هێزەکانی تورکیایان ناچار بە پاشەکشەکرد، هەروەها ئەو کاتەی سوپای تورک بابی داگیرکردبوو و هەوڵیدا هێرش بکاتە سەر منبیج، هەم ئەمریکا و هەم ڕوسیا هێزیان ناردە منبیج و ڕێگایان بە تورکیا نەدا ئەم کارە ئەنجام بدات.

 

د.خ

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin