Smiley face
Smiley face
Smiley face

میدیاکانی تورکیا ئۆپەراسیۆنی داگیرکردنی شەنگالیان ڕاگەیاند

2017-04-06 13:25:58



ڕۆژنیوز - ناوەندی هەواڵەکان

 

پاش ئەوەی دەوڵەتی تورک هیچ ئەنجامێکی لە ئۆپەراسیۆنی "قەڵغانی فورات" بەدەست نەهێنا، بەپێی میدیاکانی تورکیا، ئۆپەراسیۆنی "قەڵغانی دیجلە" دەستپێدەکات.

 

میدیاکانی تورکیا بڵاویانکردووەتەوە، کە پاش ڕیفراندۆمی ١٦ی نیسان، سوپای تورک دژی شەنگال و بۆ داگیرکردنی ئەو دەڤەرە ئۆپەراسیۆنێک بەناوی "قەڵغانی دیجلە" دەستپێدەکات.

 

ڕۆژنامەی یەنی شەفەق، کە سەربە ئاکەپەیە بە مەبەستی شەڕی تایبەت هەواڵێکی بڵاوکردووەتەوە و ڕایانگەیاندووە، کە ئۆپەراسیۆنی داگیرکردنی شەنگال پاش ڕیفراندۆمی ١٦ی نیسان دەستپێدەکات.

 

هەر لەو هەواڵەدا ئاماژە بەوە دراوە:"ئەنقەرە بەغدا و هەولێری زۆر ئاگادار کردەوە، کە پێویستە شەنگال چۆڵبکرێت،  بەڵام هیچ ئەنجامێکی وەرنەگرت، مەسعود بارزانی وەکو سەرۆکی هەرێمیش چەندین جار هۆشیار کرایەوە، بەڵام هیچ ئەنجامێک بەدەست نەهات و هێزەکانی پێشمەرگە دژی شەنگال ئۆپەراسیۆنیان دەستپێنەکرد".

 

ئەو هەواڵە ناڕاستەوخۆ ئاماژەی داوە، کە پاش کۆبوونەوەکانی ٢٦ و ٢٧ی شوبات لە ئەنقەرە، لە ڕۆژی ٣ی ئازاردا چەکدارەکانی سەربە پارتی و هێزەکانی تورکیا هێرشیان کردە سەر خانەسۆری سەربە شەنگال.

 

ڕۆژنامەی "یەنی شەفەق" لە هەواڵەکەیدا ئاماژەی بەوەشداوە، کە ئۆپەراسۆنی "قەڵغانی دیجلە" لە هێڵی دهۆک و زاخۆوە دەستپێدەکات، ئامانجی دووەمی ئەو هێزانە پاش ئۆپەراسیۆن دژی کامپەکانی پەکەکە و هێرش بۆسەر شەنگالە، هەروەها لە هەواڵەکەدا هاتووە، کە سوپای تورک لە لایەنی سلۆپی سەربە شرناخەوە هێرش دەکەن و لە دوو قۆڵی باشیک و ناڤاران-یشەوە لە ئۆپەراسیۆندا دەبن.

 

بۆ ئەمە مەبەستەش، بەگوێرەی سەرچاوە خۆجێیەکان، ماوەی سێ مانگە کە سوپای تورک چەکی قورس ڕەوانەی سلۆپی دەکات، هەروەها سێ ڕۆژ پێش ئێستاش، خولوسی ئاکار، فەرماندەی سوپای تورک سەردانی ئامەدی کردبوو و پاش ئەو چووبوو بۆ سلۆپی.

 

ئەردۆغانیش دوو ڕۆژ پێش ئێستا لە بەرنامەیەکی تەلەفزیۆنیدا وتبووی:"پاش ئۆپەراسیۆنی قەڵغانی فورات، دوو ئۆپەراسیۆنی دیکەمان هەیە"، پاشان دەزگا ڕاگەیاندنەکانی تورک ڕایانگەیاند، کە تورکیا بەنیاز دەستێوەردانی حەسەکە، عەفرین و شەنگال بکات، ئەو ئۆپەراسیۆنانەش یەکیان بە "شمشێری فورات" و ئەوی دیکەیان وەکو "قەڵغانی دیجلە" ناوزەددەکرێن.

 

هەروەها پاش ئەوەی لە کەرکوک ئاڵای کوردستان هەڵکرا، ئەردۆغان هەڕەشەی لە هەرێمی کوردستان کردبوو و پارتیش لە بەرامبەریدا بێدەنگ مابووەوە، ئەمەش گومانەکان بۆ ئەوەی "لەنێوان پارتی و ئاکەپەدا ڕێککەوتنی نهێنی هەیە" زیاتردەکات.

 

جێگای ئاماژەیە، کە ئۆپەراسیۆنی "قەڵغانی فورات" بەڕێگاپێدانی ڕوسیا و ئەمریکا دەستیپێکردبوو، بەڵام لە چوارچێوەی شەڕی باب-دا هێزە ئاسمانییەکانی ئەمریکا پشتگیری سوپای تورکیان نەکرد و ئاڵۆزی لەنێوان سوپای تورکیا و چەتەکانی داعش-دا دروستبوو، تا لە کۆتاییدا ڕوسیا بە هانای تورکیاوە چووبوو.

 

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin