Smiley face
Smiley face
Smiley face

ئەو ژنە نووسەرەی ئۆجالان کاراکتەری سەرەکی ڕۆمانێکییەتی بۆ ڕۆژنیوز دەدوێت

2017-03-20 11:33:40



ڕۆژنیوز – سلێمانی

 

ئەو ژنە نووسەرە تەمەن ٧٣ ساڵەی، کە زیاتر لە نیوەی تەمەنی بە نووسین بەڕێکردووە و عەبدوڵا ئۆجالانی ڕێبەری پەکەکەش کاراکتەری سەرەکی ڕۆمانێکییەتی بۆ ڕۆژنیوز دەدوێت.

 

د.وەهبیە شەوکەت محەمەد، ژنە نووسەری کورد لە ١٤/٢/١٩٤٤ لە شارۆچکەی دوزخورماتووی سەر بە پارێزگای سەلاحەدین لەدایکبووە و لە ئێستادا لە شاری سلێمانی نیشتەجێیە.

 

وەهبیە، ساڵی ١٩٦٤ خوێندنی ئامادەیی تەواوکردووە و پلەی دووەمی لەسەر ئاستی شاری سلێمانی بەدەستهێناوە، لە کۆلێژی پزیشکی زانکۆی موسڵ وەرگیراوە، بەڵام بەهۆی ئەوەی زۆربەی مامۆستاکانی ئەو کۆلێژە بەعسی بوون، وەهبیە ئامادەنەبوو بچێتە ئەو کۆلێژە، هەر بۆیە بۆ ماوەی دوو ساڵ لە خوێندن دابڕا.

 

پاشان، وەهبیە، زەمالەی خوێندنی وەرگرت و لە ساڵی ١٩٦٦پاش ئەنجامدانی تاقیکردنەوە و سەرکەوتنی، لە ١٥/١٠/١٩٦٦ چووە وڵاتی سۆڤیەت بۆ تەواوکردنی خوێندنەکەی، حەوت ساڵ لەوێ ماوەتەوە، کە ساڵێک بۆ فێربونی زمان خوێندوویەتی و شەش ساڵ-یش لە کۆلێژی پزیشکی خوێندوویەتی.

 

د.وەهبیە، ساڵی ١٩٧٣ چووتە وڵاتی بەریتانیا و هەشت ساڵ لەوێ ماوەتەوە، لە نەخۆشخانەکان وەک پزیشک کاریکردووە، هەروەها دیبلۆمی لەبواری دەرونی و ژیری بەدەستهێناوە و ماستەریشی لە بواریکی دیکە بەدەستهێناوە، پاشان جارێکی دیکە، گەڕاوەتەوە باشوری کوردستان.

 

د.وەهبیە، لە ساڵانی شەستەکان و لە وڵاتی سۆڤیەت یەکەم نووسینی بڵاوکردووەتەوە، کە چیرۆکێک بووە بە ناوی (چەپکێک نێرگس بۆ سەر گۆڕم) کە چیرۆکی ڕاستی ژیانی هاوڕێیەکی بووە، پاشان بەردەوامی بە نووسینەکانی داوە.

 

لەکاتی شەڕی ناوخۆدا لە تەلەفیزیۆنی ئازادی بانگهێشت کراوە بۆ بەشداربوون لە بەرنامەیەکدا، کاریگەری شەڕی ناوخۆ لەسەر میلـلەت، بەهۆی ئەو قسانەی لەو بەرنامەیەدا کردوویەتی هەڕەشەی کوشتنی لێکراوە.

 

ساڵی ١٩٩٥ بەهاوکاری گەریلاکانی پەکەکە چووەتە شاری قامیشلۆی ڕۆژئاوای کوردستان، بۆ بەشداربوون لە کۆنگرەی نەتەوەیی کوردستان لە شاری برۆکسل-ی پایتەختی بەلجیکا، بەڵام بەهۆی دواکەوتنی لە وادەی خۆی، د.وەهبیە نەیتوانی بەشداری کۆنگرەی نەتەوەیی کوردستان ببێت.

 

پاشان لەسەر داواکاری عەبدوڵا ئۆجالان، ڕێبەری پەکەکە، د. وەهبیە دەبرێتە دار ئەلزیافە (هۆڵی میوانداری) لەنزیک شوێنی مەشق و ڕاهێنان و حەوانەوەی گەریلا و شەڕڤانان، ئەو زۆر سەرسام بوو بە مەشقکردنی شەڕڤانان و ساڵێک لەوێ ماوەتەوە و لەوێ ڕۆمانی مسیرت الحریە فی الکردستان دەنوسێت، کە عەبدوڵا ئۆجالان، ڕۆڵی سەرەکی تێدادەبینێت و لە ڕۆمانەکەیدا ئۆجالان ناوی (عەلی)یە، بۆ نوسینی ئەو ڕۆمانەش عەبدوڵا ئۆجالان هاوکاری زۆری کردووە و وەڵامی پرسیارەکانی د.وەهبیەی داوەتەوە.

 

لە ساڵی ١٩٩٦ لە سوریاوە چووەتە وڵاتی کەندا و ڕەگەزنامەی وڵاتی کەنەدای وەرگرتووە، لە مانگی پێنجی ٢٠٠٤ –یش بەیەکجاری گەڕاوەتەوە هەرێمی کوردستان و لە شاری سلێمانی نیشتەجێبووەتەوە، ئەو وەک خۆی باسی دەکات بەهۆی نووسینەوە دەتوانێت هەناسە بدات، کتێبەکانی و پێنووسەکەی و دەفتەرەکەی ژێردەستی هاوڕێی ڕۆژانی تەنیایی ئەون.

 

کتێبی سەربەخۆیی کوردستان، دواین کتێبی ئەو ژنە نووسەرەیە و لە ئێستادا سەرقاڵی نووسینیەتی.

 

 

 

ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin