Smiley face
Smiley face
Smiley face

سەرۆکی ئەنجومەنی ئاوەدانکردنەوەی شەنگال: ئەو هێرشە بۆ سەر ئێزدی بوو نەك پەكەكە

2017-03-17 15:36:31



ڕۆژنیوز- دانا عومەر

 

سەرۆكی ئەنجومەنی ئاوەدانکردنەوەی شەنگال ڕایدەگەیەنێت، ئەو هێرشەی كرایە سەر خانەسۆر، بۆ پەكەكە نەبوو، بەڵكو بەئامانجی لەناوبردنی ئێزدییەكان بوو، دەشڵێت ئەگەر ئەوان ئامانجیان هێزەكانی گەریلایە، بابڕون گەریلا لەقەندیل و كەركوك و خانەقینیش هەن، ئاماژە بەوەش دەكات كە خەڵكی شەنگال تەنها متمانەی بە گەریلا هەیە.

 

خدر ساڵح، سەرۆکی ئەنجومەنی ئاوەدانکردنەوەی شەنگال ئاشکرایشی دەکات، کە ئەگەر ئەوان گەیشتنە ئەو بڕوایەی كە مەترسی لەسەر گەلی ئێزدی نەماوە، ئەوا ئێزدی خۆی خۆی دەپارێزێ و هێزێكی خۆی هەیە، چەكیان هەبێت، ئەوكاتە بەگوڵ هێزی گەریلا بەڕێدەكەن.

 

هەروەها سەرۆکی ئەنجومەنی ئاوەدانکردنەوەی شەنگال لەبارەی شەرەکەی خانەسۆر ئەوەی راگەیاندوە کە، ئەوان ئەو شەڕە وەك شەڕی براكوژی نابینن، ئەوان ئەو شەڕە دژی ئێزدی دەبینن.

 

خدر ساڵح ئەوەشی وتتوە کە، ئەگەر حكومەتی عێراق داوا بكات هێزەكانی پەكەكە لەشەنگال بچێتە دەرەوە دەتوانێ‌، بەڵام ئەو كاتە ئێزدییەكان مەرجیان دەبێ، كێ‌ گەرەنتی ئەوە دەكات فەرمانێكی تری وەک سێ‌ ی ئاب، بەسەر ئێزدییەكاندا نادرێت!.

 

 

هەر لەباەری ئەو ترسەی کە لە دووبارەبوونەوەی فەرمانی دیکەیان هەیە بەسەر ئێزیدیەکان، سەرۆکی ئەنجومەنی ئاوەدانکردنەوەی شەنگال وەبیر دێنێتەوە کە، دوێنێ‌ بوو كە لە سێ‌ ی ئابدا 12 هەزار پێشمەرگەیان بە تەلەفۆنێك كشاندەوە، ئێمە بەكێ‌ باوەڕ بكەین، بە هێزی عێراق، هێزی عێراق 60 هەزار پۆلیس و سەربازی لەموسڵدا هەبوو لەماوە 24 كاتژمێردا هەڵوەشان، تەنیا ئێمە باوەڕمان بەو هێزە هەیە كە گیانی خۆیان بۆ ئێمە بەخت كرد، ئەویش هێزی گەریلایە.

 

دەقی چاوپێكەوتنەكە:

 

 - ئەو ئاڵۆزییانەی شەنگال چۆن دروست بوو، ئێستا ڕەوشی شەنگال چۆنە؟

 

"ئەوانە هێزی ڕۆژ نین، هێزی تاریكین، كاری ئەوان تێكدانی یەكێتی نەتەوەیی كوردە"

 

خدر ساڵح: ئەو هێرشەی سەر خانەسور دەنگدانەوەی ناوخۆیی و نێو دەوڵەتیشی بەدوای خۆیدا هێنا، دیارە ئەو ئێزە هێزێكن لە پەنابەرانی وڵاتی سوریا لەلایەن پارتییەوە دروستكراون، ئەوان هێزێكی فەرمی نین، بەپێی یاسای نێو دەوڵەتی نابێت هێز لەپەنابەر دروست بكرێت، بەڵام هێز لەوان دروست بووە، ناویان ناوە هێزی (ڕۆژ) ئەوانە هێزی ڕۆژ نین، هێزی تاریكین، كاری ئەوان تێكدانی یەكێتی نەتەوەیی كوردە، كاری ئەوان دژی كوردە، لەو ڕووداوەی خانەسۆر ئەوە دەركەوت كە ئەوان دوژمنی خەڵكی كوردستانن.

 

-  بۆچی ئەو هێزە دەهێنرێتە نزیكی شەنگال؟

 

"ڕۆژانە خەڵك دەگەڕانەوە خانەسۆر، بۆیە ئەوان ئەوێیان کردە ئامانج"

 

خدر ساڵح: لەبەر ئەوەی كە خانەسۆر نزیكەی دوو ساڵە ئازاد كراوە، ئارامییەكی تەواوی تێدایە، ڕۆژانە خەڵك دەگەڕانەوە خانەسۆر، بۆیە ئەوان ئەوێیان کردە ئامانج، ئەوان فەرمانی شەڕیان پێبوو، ئەوان سەرەتا هێرشیان كرد، حەوت كەسی ئێمەیان شەهیدكرد و نزیكەی 25 كەسیان بریندار كرد، لەدوای هێرشی ئەوان بەسەدان خێزان ئاوارە بوون، هەندێك چونە لای خزمەكانی خۆیان، هەندێك لەوان لەناو ئوتومبێلەكانیاندا دەمانەوە، هەندێكیشیان لەناو خێمەدا مانەوە، ئەمە ڕۆژی 3ی ئابی 2014ی بیر خستینەوە، ئەو كاتەی داعش هێرشی كرد.

هەندێك لە گەلی ئێمە بۆئەوەی ئەو شەڕە ڕابوەستێت خۆپیشاندانیان كرد، وتیان بەشكم ئەوە سودی هەبێت و ئەو هێزە بكشێنەوە، كەچی وەك بینیتان تەقەیان لەخۆپیشاندەران كردو نازێ-یان شەهید كرد، كە ئەمە دووەم شەهیدی خانەوادەی نازێ‌ یە، پێشتر لەلایەن داعشەوە برایەكی نازێ‌ شەهید كراوە.

 

 

- ئێوە وەك ئەنجومەنی شەنگال، چ هەنگاوێكتان ناوە بۆ ئەوەی ئەو شەڕی کوردکوژییە ڕونەدات، یان هیچ پەیوەندیەكتان بە لایەنەكانەوە كردووە بۆ بەرگرتن لەو شەڕە؟

 

"ئێمە ئەو شەڕە وەك شەڕی براكوژی نابینین، ئێمە ئەو شەڕە دژی ئێزدی دەبینین"

 

خدر ساڵح: ببورە، ئێمە ئەو شەڕە وەك شەڕی براكوژی نابینین، ئێمە ئەو شەڕە دژی ئێزدی دەبینین، چونكە ئەگەر ئامانجی ئەوان گەڕانەوەی هێزەكانی گەریلایە، هێزی گەریلا لە زۆر شوێنی هەرێمی كوردستان هەیە، بابڕۆن بۆ ئەوێ‌، یاخود ئێمە نزیكەی 72 كیلۆمەتر خاكمان لەبەردەستدایە، بۆچی تەنها هێرش دەكرێتە سەر خانەسۆر، كە خەڵكی ئێمە هەمووی دەگەڕێتەوە ئەوێ‌ و ناوچەیەكی ئارامە و قوتابخانە و خزمەتگوزاری تێدایە، لەمەوە بۆمان دەردەكەوێت كە هاتنی ئەوان ئەوە نییە كە هێزی گەریلا لەوێ‌ دەربچێت، ئامانجی ئەوان ئێزدییە.

 

- باشە بۆچی  ئەو شەڕە دژی ئێزدی دەكرێت؟

 

"بۆ تەواوكردنی فەرمانی لەناوبردنی گەلی ئێزدی"

 

خدر ساڵح: ئەوشەڕە بۆ تەواوكردنی فەرمانی 3ی مانگی هەشتی 2014یە، ئامانجی هێرشی سێی هەشت لەناوبردنی گەلی ئێزدی بوو، ئەوە بەتەواوەتی سەری نەگرت، چونكە هەندێك لە خێزانەكانی ئێمە لەسەر چیای شەنگال مانەوە، بە هاتنی هێزەكانی یەپەگە و پەكەكە، لە شەشی مانگی هەشتدا وایكرد ئەوە نەچێتە سەر، كە ئەوە سەری نەگرت ڕێگەی ئەوروپا- یان بۆ كورد كردەوە، كەی دەوڵەتێكی وەك و توركیا ڕێگەی داوە كە خەڵك بە بەلاش بچێتە ئەوروپا، بەبەلاش دەیانبردن بۆ ئەوەی ئێزدییەكان نەگەڕێنەوە، ئەوەش سەری نەگرت، هاتن پردی سەحێلە یان لە ئێمە گرت، گەمارۆی خواردن و پێداویستیان خستە سەر ئێمە، هەتا ئێستاش ئەو گەمارۆیە لەلایەن ئیدارەی باشوری كوردستانەوە لەسەر ئێمە بەردەوامە، بۆ ئەوەی ئێمە لەوێ‌ نەمێنینەوە، دواتر هەوڵیاندا كە شەڕ لەنێوان ئێمە و ئەو هێزە ئێزدییانە دروست كەن كە گرێدراوی هێزی پێشمەرگەن، بەڵام بەزیرەكی ئەوان ئەو شەڕە دروست نەبوو كە ئەمە جێی سەربڵندیە، ئەوان شەڕی براكانی خۆیان نەكرد، ئیتر بینیان كە ئەو خەڵكە بەقسەی ئەوان ناكات و خواستی ئەوان پێك ناهێنێت، بینیان ئیتر بەرەو ئەوە دەچین كە موسڵ ڕزگار بێت و تەلەعفەر ڕزگار بێت و قەوارەیەك بۆ شەنگال دروست بێت، بۆیە هەستان ئەو  هێرشەیان  كردە سەر شەنگال، بۆ ئەوەی خەڵك ئاوارە ببێتەوە، نەگەڕێنەوە سەر ماڵی خۆیان، ئەو هێزە بەتەنها خەڵی ڕۆژئاوای كوردستان نین، تورك و میتی توركیشیان تێدابوو، كە بەتوركی قسەیان دەكرد و یەك وشە كوردیشیان نەدەزانی.

 

بەڵام ئێمە وەك هێزەكانی پاراستنی شەنگال بەردەمی ئەوانمان گرت و وەڵامی ئەوانمان دایەوە، بەشەهیدەكانمان سەربەرزین، ئەوان با پشت بە توركیا و هێزی دەرەكی ببەستن، ئێمە پشت بە میللەتی خۆمان دەبەستین.

 

- ئێوە وەك سەرۆكی   ئەنجومەنی شەنگال سەردانی بەغداتان كرد، ئامانجی ئەو سەردانەتان چی بوو وە كێتان لەڕەوشی شەنگال ئاگادار كردەوە؟

 

"ئەو هێرشانەی كراوەتە سەر شەنگال، هەموویمان گەیاندۆتە، دەستی بەرپرسان و پەرلەمانتارانی عێراق"

 

خدر ساڵح: ئێمە هەر لەدوای ڕووداوەكە كونسوڵخانەی ئەمریكامان لە هەولێر ئاگادار كردەوە، لەم سەردانەشماندا بۆ بەغدا نووسینگەی سەرۆك وەزیرانی عێراقمان ئاگادار كردەوە، نامەیەكمان بۆ سەرۆك وەزیر نووسی و گەیاندیانە دەستی، لەبەرئەوەی كە شەنگال لەڕووی ئیدارییەوە هێشتا سەر بە بەغدایە، ئەو هێرشانەی كراوەتە سەر شەنگال، هەموویمان گەیاندۆتە، دەستی بەرپرسان و پەرلەمانتارانی عێراق، ئەمەش لەلایەن حەیدەر عەبادییەوە لەوتاری هەفتانەی خۆیدا باسكرا، كە وتی هەندێك لایەن بە دروستكردنی ئاڵۆزی دەیانەوێت ڕێگە لەبەرەو پێشچونەكانی ئێمە بگرن لە موسڵ، ئێمەش ئەوە قبوڵ ناكەین، ئەوە هەڵوێستی عێراقە، عێراق ڕەنگە ڕاستەوخۆ تەداخولی نەكردبێت، بەڵام ئەوەیان بە هەولێر وتووە كە ئەوان دژی ئەوەن كەڕوویداوە، ئێمەش حسابی خۆمان لەو هێزە دەوێت كە خەڵكی ئێمەی كوشتووە، ئەو بەرپرسیاریەتیەش دەبێت پارتی هەڵی بگرێت.

 

- بۆچی پارتی، ئەوان دەڵێن ئەو هێزە سەر بە وەزارەتی پێشمەرگەیە؟

 

"گەنجی ئێمە هەیە كە بێكارن، بۆ ئەوان ناكەنە پێشمەرگە"

 

خدر ساڵح: باشە بۆ پەنابەردەكەنە پێشمەرگە، بەهەزار گەنجی ئێمە هەیە كە بێكارن، بۆ ئەوان ناكەنە پێشمەرگە، ئێمە وەك یەكینەكانی بەرخۆدانی شەنگال و هێزەكانی ترمان بۆ ناخەنە سەر وەزارەتی پێشمەرگە، حەیدەر شەشۆ ماوەیەكی زۆرە هەوڵدەدات كە هێزەكەی بخرێتە سەر هێزی پێشمەرگە بۆ نایخەنە سەر هێزی پێشمەرگە، دەچێت هێزی عەرب و پەنابەر دروست دەكات.

 

-  ئێوە لە سەردانەكەتاندا بۆ بەغدا باسی چیتان كرد لەگەل لایەن و بەرپرسانی عێراق، هیچ پڕۆژەیەكتان پێبوو كە قسەی لەسەر بكەن؟

 

"لە پڕۆژەكەی ئێمەدا مافی هەموو كەسێك و پێكهاتەیەكی تێدایە"

 

خدر ساڵح: لەڕاستیدا ئامانجی ئێمە لەو سەردانەدا بۆ ئەوە بوو كە ئەوەی بەسەر شەنگالدا هات لە ساڵی 2014 دا دووبارە نەبێتەوە، ئیتر شەنگال نەكەوێتەوە ژێر دەستی یەك لایەن، ئەو لایەنەش كەی ویستی بەجێی بهێڵێت و بازرگانی بەمافی مرۆڤەوە بكات لە شەنگال، ئێمە ئەو پڕۆژەیەمان برد دامانە سەرۆك وەزیرانی عێراق و نوێنەرانی مەسیحی و شیعە و سونەی عێراق، ئێمە ئەو پرۆژەیەشمان داوەتە یەكێتی ئەوروپا، ئەوان و لایەنە عێراقییەكانیش پێیان خۆش بوو، لە پڕۆژەكەی ئێمەدا مافی هەموو كەسێك و پێكهاتەیەكی تێدایە، لایەنە عێراقییەكان وتیان ئەوە دەبێت لە ئەنجومەنی نوێنەرانەوە كاری لەسەر بكرێت، بۆ ئەوەی بەیاسایی بكرێت، بۆ ئەوە ئێمە و شەبەك و مەسیحی و توركمانە شیعەكانیش، كاری لەسەر دەكەین، بۆ ئەوەی بچێتە پێشەوە.

 

- لەناو پڕۆژەكەی ئێوەدا داوای چیتان كردووە بۆ شەنگال، ئێوە دەتانەوێت شەنگال ببێتە هەرێمێكی سەربەخۆ یان چ شتێكی تر؟

 

"داوای ئەوەمان كردووە كە پارێزگایەك بۆ شەنگال دروست بكرێت"

 

خدر ساڵح: ئێمە و مەسیحییەكان داوای ئەوەمان كردووە كە پارێزگایەك دروست بكرێت بۆ شەنگال و تەلەعفەر، ئەگەر ئەوە سەری نەگرت دوو پارێزگا دروست بكرێت، یەكێك بۆ شەنگال ئەوی تر بۆ تەلعفەر، ئەو پارێزگایانە لامەركەزی بن و سەر بەبەغدا بن، نەك سەر بە موسڵ بن، لەبارەی ئەوەی كە ئێمە سەر بە بەغدا بین یان هەرێمی كوردستان، ئێمە گفتوگۆمان كرد، گەشتینە ئەو بڕوایەی كە ئێستا كاتی ئەوە نییە كە باسی ئەوە بكەین، چونكە خەڵكێكی زۆری ئێزدی و مەسیحی لەدەرەوەی خاكی خۆیانن، ئێمە پێمان باش بوو ئەو كاتەی خەڵك دەگەڕێنەوە ئێمە مناقەشە بكەین و دەنگدانێك بۆ وەرگرتنی ڕای خەڵك دروست بكەین.

 

 

-  پارتی دیموكراتی كوردستان داوا دەكات كە هێزەكانی پەیەدە و پەكەكە، لەشەنگال بچێتە دەرەوە، ئایا هیچ هێزێكی پەكەكە و پەیەدە لەشەنگال هەیە، یاخود خەڵكی شەنگال دەیانەوێت ئەو هێزانە بچنەدەروە لەشەنگال؟

 

"تەنیا ئێمە باوەڕمان بەو هێزە هەیە كە گیانی خۆیان بۆ ئێمە بەخت كرد، ئەویش هێزی گەریلایە"

 

خدر ساڵح: پەیەدە لەشەنگال نییە، كەمێك هێزی پەكەكە وەك ڕاوێژكار لە شەنگال هەیە، ئەگەر ئەوان نەبونایە چەندین جار شەڕ لەنێوان هێزەكانی شەنگال ڕویدەدا، ئەوان نەیانهێش شەر ڕوبدات، لەلایەكی ترەوە هیچ هێزێكی باشوری كوردستان مافی ئەوەی نییە كە بڵێت پەكەكە لەشەنگال بڕواتە دەرەوە، لەبەر ئەوەی شەنگال لەڕووی ئیدارییەوە سەر بە حكومەتی عێراقە، حكومەتی عێراق دەتوانێت ئەو داوایە بكات، هەروەها ئەو هێزە خەڵكی ئێزدیان پاراستووە، بەسەدان كچ و كوڕی خۆیان كردوەتە قوربانی تا ئێزدیان ڕزگار كرد، بە ملیۆن دۆلاریان لەو شەڕوانانەدا خەرج كردووە، هەتا نەهێڵن ئێزدی قڕ بكرێت، هەموو ئەو ناوچەیە گیرا تەنها چیای شەنگال نەبێت، ئەوەش هێزەكانی پەیەدە و پەكەكە پاراستیان.

 

ئەگەر حكومەتی عێراق داوا بكات هێزەكانی پەكەكە لەشەنگال بچێتە دەرەوە دەتوانێ‌، بەڵام ئەو  كاتە ئێزدییەكان مەرجیان هەیە، كێ‌ گەرەنتی ئەوە دەكات فەرمانێكی تری وەک سێ‌ ی ئاب، بەسەر ئێزدییەكاندا نادرێت، هەرێمی كوردستان ئەو گەرەنتیە دەداتە ئێمە، ئەوە دوێنێ‌ بوو كە هێرشیان كردە سەر خانەسۆر، ئەوە دوێنێ‌ بوو كە لە سێ‌ ی ئابدا 12 هەزار پێشمەرگەیان بە تەلەفۆنێك كشاندەوە، ئێمە بەكێ‌ باوەڕ بكەین، بە هێزی عێراق، هێزی عێراق 60 هەزار پۆلیس و سەربازی لەموسڵدا هەبوو لەماوە 24 كاتژمێردا هەڵوەشان، تەنیا ئێمە باوەڕمان بەو هێزە هەیە كە گیانی خۆیان بۆ ئێمە بەخت كرد، ئەویش هێزی گەریلایە، گەلی ئێزدی نایانەوێت ئەوان برۆن، ئەوان بڕۆن یان گەلی ئێزدی نامێنێت، یان  لەگەڵ ئەوان دەڕۆین، ئەگەر ئێمە گەیشتینە ئەو بڕوایەی كە مەترسی لەسەر گەلی ئێزدی نەماوە ئەوا و ئێزدی خۆی خۆی بپارێزێ و هێزێكی خۆی هەبێت، چەكیان هەبێت، ئەوكاتە بەگوڵ هێزی گەریلا بەڕێدەكەین.

 

د.خ



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin