Smiley face
Smiley face
Smiley face

کەجەکە: کێشه‌ى ئێمه‌ و پارتى کێشه‌ى چۆنیه‌تى مامه‌ڵه‌کردنه‌ له‌گه‌ڵ داگیرکەران

2017-02-12 09:22:16



ڕۆژنیوز- دانا عومه‌ر

 

ئه‌ندامێکى کۆنسەی بەڕێوبەری که‌جه‌که، ئاماژە بۆ هەوڵەکانی ئۆجالان دەکات بۆ پوچەڵکردنەوەی گەلەکۆمەی ١٥ی شوبات و دەڵێت، کە ئۆجالان توانى ئه‌وه‌ بسه‌لمێنێت که‌ کورد خاوه‌نى دۆزێکى ڕه‌وایه، ئاماژە بە گرنگی کۆنگرەی نەتەوەیی-ش دەکات و لەبارەی کێشە ناوخۆییەکانەوە دەڵێت:"کێشه‌ى ئێمه‌ و پارتى کێشه‌ى چۆنیه‌تى مامه‌ڵه‌کردنه‌ له‌گه‌ڵ داگیرکەرانی کوردستان".

 

خه‌بات هه‌ولێرى، ئه‌ندامى کۆنسه‌ى به‌ڕێوەبەریی کۆما جڤاکێن کوردستان(که‌جه‌که‌) لەم‌ چاوپێکەوتنەی ڕۆژنیوزدا وه‌ڵامى چه‌ند پرسێکى گرنگ ده‌داته‌وه‌، ئامانجەکانی گەلەکۆمەی نێودەوڵەتی ١٥ی شوبات بۆ سەر عەبدوڵا ئۆجالان، شیدەکاتەوە و لەبارەی بەستنی هەوڵەکانی کەجەکەوە بۆ بەستنی کۆنگرەی نەتەوەیی و ناکۆکییەکانی نێوان ئەوان و پارتی-یەوە دەدوێت و باس له‌هۆکارى نه‌کشانه‌وه‌ى پەکەکە له ‌شه‌نگال ده‌کات.

 

دەقی چاوپێکەوتنەکە:

 

- ئێستا نزیک ده‌بینه‌وه‌ له‌ تێپه‌ڕبونى ١٨ ساڵ به‌سه‌ر پیلانگێڕی نێودەوڵەتی ١٥ی شوبات، کە تیایدا عەبدوڵا ئۆجالان ڕفێندرا و دەستگیرکرا، هۆکاری پیلانگێڕییەکە و ئامانجی پیلانگێڕن چی بوو؟

 

"ڕێبه‌ر ئاپۆ به‌ربه‌ستى بۆ  لێکدانه‌وه‌ى هێزه‌ داگیرکەره‌کان دروستکرد"

 

خه‌بات هه‌ولێرى: پیلانگێڕى ١٥ى شوباتى ساڵى ١٩٩٩ له‌ که‌سایه‌تى ڕێبه‌ر ئاپۆ-دا هه‌موو گه‌لى کوردى کرده‌ ئامانج، من ئه‌وپیلانگێڕانه‌ و داروده‌سته‌کانیان مه‌حکوم و شه‌رمه‌زار ده‌که‌م، وه‌ سه‌رى ڕێز بۆ ئه‌و شه‌هیدانه‌ داده‌نه‌وێنم که‌ له‌یه‌که‌م ساتى ده‌ستگیرکردنى رێبه‌ر ئاپۆ-وه‌، گیانى خۆیان کرده‌ قوربانى، بێگومان پیلانگێڕى ١٥ى شوبات پیلانگێڕییه‌کى ئاسایى نه‌بوو، به‌ڵکو گه‌له‌کۆمه‌یه‌کى نێوده‌وڵه‌تى بوو، هێزى هه‌رێمى و نێوده‌وڵه‌تى به‌شداریان تێداکرد،  پیلانگێڕان ئامانجیان ئه‌وه‌بوو له‌ڕێگاى ده‌ستگیرکردنى ڕێبه‌ر ئاپۆ وه‌ بزوتنه‌وه‌ى ڕزگاریخوازى گه‌لى کورد کۆتایى پێبهێنن یاخود بێکاریگه‌رى بکه‌ن، چونکه‌ جوڵانه‌وه‌ى په‌که‌که‌ و ڕێبه‌ر ئاپۆ هه‌ر له‌سه‌رەتاى دروستبونییه‌وه‌ تا ئه‌و کاته‌ى که‌ ئه‌و گه‌له‌کۆمه‌یه‌ ڕوویدا، کۆتاییان به‌ کۆمه‌ڵێک لێکدانه‌وه‌ و حساباتى هێزه‌ داگیرکاره‌کان هێنا، کە ئه‌وان له‌ ڕێککه‌وتنامه‌کانى سایکس بیکۆ و لۆزان و برۆکسل و ئه‌نقه‌ره‌ کوردستانیان دابه‌ش و پارچه‌ پارچه‌ کردبوو، ئەوان پێیان وابوو، که‌ ته‌نیا قڕکردنى جه‌سته‌یى و مه‌عنه‌وى مافى گه‌لى کورده‌، دەیانویست مه‌سه‌له‌ى کورد به‌رده‌وام وه‌ک کارتێک له‌دژى حکومه‌ته‌ هه‌رێمیه‌کان به‌کار بهێنن، وه‌ ده‌یانویست کوردێک به‌رهه‌م بهێنن، که‌ ده‌سته‌مۆ و گوێڕایه‌ڵى ئه‌وان بێت و بۆ به‌رژه‌وه‌ندى خۆیان به‌کارى بهێنن، ئه‌مه‌ له‌سه‌رەتاى سه‌ده‌ى بیسته‌مه‌وه‌ هه‌تاوه‌کو سه‌رده‌مى ده‌رکه‌وتنى بزافى ئاپۆیى پێکهات، به‌ڵام ده‌رکه‌وتنى بزوتنه‌وه‌ى په‌که‌که‌ لێکدانه‌وه‌ى ئه‌وانى بۆ گه‌لى کورد پوچه‌ڵ کرده‌وه‌ و به‌ربه‌ستى بۆدانان، بزافى ئاپۆیى توانى ڕوبه‌ڕوى ئه‌و واقیعه‌ بێته‌وه‌، ڕێبه‌ر ئاپۆ که‌سایه‌تى کوردى ئازادى به‌بنه‌ما گرت، ئه‌مه‌ش به‌ربه‌ستى بۆ  لێکدانه‌وه‌ى هێزه‌ داگیرکاره‌کان دروستکرد، ئه‌وان ده‌یانبینى له‌ساڵى ١٩٩٣ وه‌ ڕێبه‌ر ئاپۆ ده‌یه‌وێت کێشه‌ى کورد به‌ڕێگه‌ چاره‌ى سیاسى و دیالۆک چاره‌سه‌ر بکات، ئه‌گه‌ر ئه‌مه‌ش ڕووبدات، ئه‌وان ده‌زانن که‌ کارتى فشارى کێشه‌ى کورد له‌ده‌ستى ئه‌وان ده‌ردێت، ئه‌وکاته‌ کورد به‌مافى خۆى ده‌گات، ئه‌وانیش له‌گه‌ڵ ئه‌وه‌دا نه‌بوون.

 

- گەلی کورد چۆن توانی ئەم پیلانگێڕییە لە بەرژەوەندی دۆزی کور بەکاربهێنێت؟

 

 

"ڕێبه‌ر ئاپۆ توانى ئه‌وه‌ بسه‌لمێنێت که‌ کورد خاوه‌نى دۆزێکى ڕه‌وایه‌"

 

خه‌بات هه‌ولێرى: ڕێبه‌ر ئاپۆ له‌زیندان دیوه‌ شاراوکانى پلانگێڕییه‌که‌ى ئاشکرا کرد، هات له‌ڕێگه‌ى به‌رگرینامه‌کانى و شاکاره‌کانى که‌ له‌زینداندا نووسى سیستمێکى جێگرەوەی پێشخست، وه‌توانى پلانگێڕى  ١٥ى شوبات وه‌رچه‌رخێنێت و به‌قازانجى گه‌لى کورد بکه‌وێته‌وه‌ له ‌زینداندا توانى کاره‌کانى بۆ ئاشتى و ڕێگه‌چاره‌ى ئاشتیانه‌ى کێشه‌ى کورد په‌ره‌پێدا، هه‌رله‌و ماوه‌یه‌دا که‌ له‌زینداندایه‌ چه‌ندین جار پێشنیارى ئاشتى و ده‌ستپێشخه‌رى ئاشتى کردووه‌، که‌ به‌رچاوترینیان ئه‌وه‌ى ساڵى ٢٠١١ بوو که‌ له‌ئۆسلۆ چه‌ندین هێز تێیدا به‌شدار بوون، که‌دواتر ده‌وڵه‌تى تورک کۆتایى پێهێنا، وه‌ دەستپێشخەری‌ ساڵى ٢٠١٣ بوو که‌ ڕێبه‌ر ئاپۆ ئاگربه‌ستى یه‌کلایه‌نه‌ى ڕاگه‌یاند و تا ئاستێک گه‌ریلا له ‌باکورى کوردستان کشانه‌وه‌، له‌ئه‌نجامى ئه‌و هه‌ڵمه‌ته‌ ستراتیژى و سیاسیه‌ى، که‌ ڕێبه‌ر ئاپۆ ئه‌نجامیدا هێزه‌ دیموکراتخوازه‌ کوردییه‌کان زیاتر له‌ شه‌ش ملیۆن ده‌نگیان به‌ده‌ستهێنا له‌ هه‌ڵبژاردنه‌کان سه‌رکه‌وتن، له‌ڕێگه‌ى ئه‌وه‌وه‌ ڕێبه‌ر ئاپۆ توانى ئه‌وه‌ بسه‌لمێنێت که‌ کورد خاوه‌نى دۆزێکى ڕه‌وایه، هه‌میش ئه‌وه‌ى نیشاندا ئه‌وه‌ى ناخوازێـت کێشه‌که‌ به‌ ئاشتیانه‌ چاره‌سه‌ربێت ده‌وڵه‌تى تورکیایه‌.

 

- بۆچی ئه‌ردۆغان ئاشتی ڕەتدەکاتەوە؟، ئه‌و له‌پێشتردا ده‌یوت، که‌ کێشه‌ى کورد کێشه‌ى منه‌ ئێستا بۆ ڕه‌تى ده‌کاته‌وه‌؟.

 

"ئه‌وه‌ى که‌ له‌ئێستادا  ئه‌ردۆغان ده‌یکات ڕووى ڕاسته‌قینه‌ى ئه‌وه‌"

 

خه‌بات هه‌ولێرى: له‌ڕاستیدا هه‌رکه‌س له‌لایه‌ن خۆیه‌وه‌ لێکدانه‌وه‌ى جیاواز بۆ ئه‌و مه‌سه‌له‌یه‌ ده‌کات، به‌ڵام ئه‌وه‌ى که‌ هه‌یه‌ ئه‌وه‌یه‌ ئێستا ڕووى ڕاسته‌قینه‌ى ئه‌رۆغان ده‌رکه‌وت، وه‌ ئه‌و ده‌مامکانه‌ى هه‌ڵگرت که‌ له‌پێشتردا ده‌یویست ڕاى گشتى کورد و تورکه‌کانیشى پێ فریوبدات، دیالۆک که‌ له‌ ٢٠١١ وه‌ ده‌ستىپێکرد، ده‌وڵه‌تى تورکیا نه‌بوو ڕێبه‌ر ئاپۆ بوو، ده‌وڵه‌تى تورکیا هه‌نگاوى نه‌هاویشت، ده‌وڵه‌تى تورک له‌پاڵ ئه‌وه‌ى که‌ ئه‌مه‌یان به‌کار هێنا بۆ خۆبرندنه‌ پێشه‌وه‌ و ده‌نگ کۆکردنه‌وه‌، پڕۆسه‌یه‌کى تریان پێشده‌خست که‌پێى ده‌وترا پڕۆسه‌ى په‌راوێزخستنى کورد و به‌ تورک کردنى کورد بوو، که‌ ئامانجى له‌ناوبردنى گه‌لى کورده‌، ئه‌و ته‌قلیدى ڕژێمه‌ فاشیست و نازییه‌کانى ئه‌وروپا ده‌کات‌، که‌ له‌ڕاستیدا ئه‌مه‌ هه‌ر به‌رامبه‌ر به‌ گه‌لى کورد ناکات، به‌ڵکو به‌رامبه‌ر هه‌موو گه‌لانى تورکیا ده‌کات، ئەردۆغان ته‌نها له‌ باکورى کوردستان هه‌ڵمه‌تێکى فراوانى دژى کورد به‌ڕێوه‌نابات، به‌ڵکو ئه‌و به‌ئاشکرا ده‌ڵێت که‌ ئێمه‌ له‌گه‌ڵ یه‌کپارچه‌یى خاکى عێراقداین، ئێستا ده‌وڵه‌تى تورکیا ده‌یه‌وێت بەگۆشەگیرکردنی ڕێبەر ئاپۆ له‌که‌سایه‌تى ڕێًبه‌ر ئاپۆدا شه‌ڕى هه‌موو کورد بکات.

 

- ئێوه‌ هیچ گومانێکتان له‌ ژیانى عه‌بدوڵا ئۆجالان نیه‌، به‌هۆى ئه‌وه‌ى که‌ نزیکه‌ى زیاتر له‌ نۆ مانگه‌ هیچ هه‌واڵێکى له‌ زیندانه‌وه‌ نه‌هاتۆته‌ ده‌ره‌وه‌؟

 

 

"ده‌وڵه‌تى تورکیا جێگاى باوه‌ڕ نیه‌"

 

خه‌بات هه‌ولێرى: ڕاستییه‌کى وا هه‌یه‌ که‌ ئه‌وه‌ چه‌ند مانگه‌ هیچ خه‌به‌رێک نیه‌ له‌سه‌ر ڕێبه‌ر ئاپۆ، ده‌وڵه‌تى تورکیاش ده‌وڵه‌تێکى دژى کورده‌، بۆیه‌ چاوه‌ڕێى ئه‌وه‌ى لێده‌کرێت هێرش بکاته‌ سه‌ر هه‌رشتێک که‌ په‌یوه‌ندى به‌ ئیراده‌ى گه‌لى کورده‌وه‌ هه‌بێت، ده‌وڵه‌تى تورکیا جێگاى باوه‌ڕ نییه‌، ئه‌گه‌ر بێتو به‌رخۆدانى گه‌ل نه‌بێت و زیندوویى ته‌ڤگه‌رى ئازادى نه‌بێت، له‌وانه‌یه‌ ئه‌و ڕژێمه‌ هه‌موو شتێکى به‌خه‌یاڵدا بێت، له‌ڕاستیدا پیلانگێڕى نێوده‌وڵه‌تى بێکاریگه‌ر بووه‌ به‌ڵام به‌ته‌واوه‌تى له‌ناو نه‌چووه‌، بۆیه‌ له‌ هه‌ژده‌هه‌مین ساڵوه‌گه‌ڕى ئه‌و پلانگێڕییه‌ شومه‌دا ئه‌مڕۆ له‌ هه‌موو کات زیاتر پێویسته‌ چالاکییه‌کانمان بۆ ئازادى ڕێبه‌ر ئاپۆ به‌رزبکه‌ینه‌وه‌، چونکه‌ ئازادى ڕێبه‌ر ئاپۆ ده‌بێته‌ ده‌سته‌به‌رى ئازادى ئێمه‌.

 

- ئێوه‌ هیچ فشارێکى سیاسیتان دروست نه‌کردووه‌ بۆ ئازادى عه‌بدوڵا ئۆجالان له‌ڕێگه‌ى ئه‌و په‌یوه‌ندیه‌ سیاسییانه‌ى که‌ هه‌تانه‌، له‌گه‌ڵ لایه‌نه‌ ده‌ره‌کیه‌کاندا؟

 

"پێویسته‌ ئاستى چالاکیه‌کانمان به‌رزبکه‌ینه‌وه‌ له‌ڕووى سیاسى و دبلۆماسى و مه‌ده‌نیه‌وه"

 

خه‌بات هه‌ولێرى: ئێستا ده‌رفه‌تێک بۆ گه‌لى کورد هاتۆته‌ پێشه‌وه‌، که‌ دنیا به‌چاوێکى تر سه‌یرى ئه‌م بزوتنەوەیە‌ ده‌کات، ئه‌مڕۆ له‌هه‌موو کات زیاتر کات گونجاوه‌ که‌ ئه‌م بزوتنه‌وه‌یه‌ له‌ لیستى تیرۆرى نێوده‌وڵه‌تى ده‌ربهێنرێت، چونکه‌ خۆشیان ئه‌وه‌یان بینى که‌ ئه‌م هێزه‌یه‌ که‌ له‌ڕۆژئاواى کوردستان و له‌ شه‌نگال ڕووبه‌ڕووى تیرۆر ده‌بێـته‌وه‌، ئه‌م هێزه‌ له‌ کۆبانێ و شه‌نگال که‌رامه‌تى مرۆڤایه‌تى پاراست، له‌لایه‌کى تریش جیهان ئه‌مڕۆ جیهان ئه‌وه‌ ده‌بینێت، که‌ ڕێبه‌ر ئاپۆ بیرمه‌ندێکى فکرییه ‌و له‌به‌ر بیکردنه‌وه‌ و فکره‌کانى له‌زیندانه‌، بۆیه‌ ئێستا له‌هه‌موو شوێنێک چالاکى جۆراوجۆر بۆ ئازادکردنى به‌ڕێوه‌ده‌چێت، که‌ چه‌ندین که‌سایه‌تى غه‌یره‌ کورد تێیدا به‌شداره‌، ئێستا له‌ ئه‌وروپا چالاکى نۆبه‌ت به‌ڕێوه‌ ده‌چێت، وه‌ ڕێپێوان به‌ڕێوه‌ ده‌چێت، که‌ چالاکوان و ئازادى خوازى بیانى تێیدا به‌شدارن، ئێستا زه‌مینه‌ له‌ هه‌موو کات زیاتر لەبارە، به‌ڵام پێویسته‌ ئاستى چالاکییه‌کانمان به‌رز بکه‌ینه‌وه‌ له‌ڕووى سیاسى و دبلۆماسى و مه‌ده‌نییه‌وه‌.

 

- ئێوه‌ له‌ساڵى ڕابردوودا بانگه‌وازێکتان کرد بۆ به‌ستنى کۆنگره‌ى نه‌ته‌وه‌یى، زۆرێک له‌ لایه‌نه‌کان ئه‌م بانگه‌وازه‌یان پێباش بوو، به‌ڵام  ده‌ڵێن کۆنگره‌ى نه‌ته‌وه‌یى ته‌نها به‌ بانگه‌واز نابه‌سترێت، ئێوه‌ هه‌نگاوى دواى بانگه‌وازه‌که‌تان چییه‌ بۆ به‌ستنى کۆنگره‌ى نه‌ته‌وه‌یى؟.

 

"ئێمه‌ ته‌نها به‌ بانگه‌وازه‌وه‌ نه‌وه‌ستاوین، زۆربه‌ى لایەنه‌کانمان بینیوه‌"

 

خه‌بات هه‌ولێرى: ڕێبه‌ر ئاپۆ هه‌وڵى زۆرى داوه‌ بۆ به‌ستنى کۆنگره‌ى نه‌ته‌وه‌یى، ئه‌و بانگه‌وازه‌ى ئێمه‌ش ته‌واوکه‌رى هه‌وڵه‌کانى ئه‌وه‌، ئێمه‌ ته‌نها به‌ بانگه‌وازه‌وه‌ نه‌وه‌ستاوین، به‌ڵکو کۆمیته‌ى په‌وه‌ندیه‌کان و ده‌زگا په‌یوه‌ندیاره‌کانمان زۆربه‌ى حزب و لایه‌نه‌ سیاسیه‌کانیان بینیوه‌، وه‌ خه‌باتێکى جدیشیان بۆ ئه‌وه‌ مه‌سه‌له‌یه‌ کردووه‌، زۆربه‌یان هه‌ڵوێستێکى ئه‌رێنیان هه‌یه‌.

 

کێشەی نێوان ئێوە و پارتی دیموکراتی کوردستان-عێراق چییە و بۆچی پارتی نایەوێت کۆنگرەیی نەوەیی ببەسترێت؟

 

"کێشه‌ى چۆنیه‌تى مامه‌ڵه‌کردنه‌ له‌گه‌ڵ داگیرکەرانى کوردستان"

 

 له‌باره‌ى کێشه‌ى ئێمه‌و براده‌رانى پارتى دیموکراتى کوردستان- عێراق کێشه‌یه‌کى ته‌سکى حزبایه‌تى نییه‌، کێشه‌ى چۆنیه‌تى مامه‌ڵه‌کردنه‌ له‌گه‌ڵ داگیرکەرانى کوردستان، چۆنیه‌تى مامه‌ڵه‌کردنه‌ له‌ گه‌ڵ پارچه‌کانى ترى کوردستان، براده‌رانى پارتى بۆ کۆنگره‌ى نه‌ته‌وه‌یى ئاماده‌ نین، له‌به‌ر ئه‌وه‌ى ئه‌وان په‌یوه‌ندى ستراتیژییان له‌گه‌ڵ تورکیادا هه‌یه‌، هێزێک په‌یوه‌ندى ستراتیژى له‌گه‌ڵ تورکیادا هه‌بێت چۆن بۆ کۆنگره‌ى نه‌ته‌وه‌یى ئاماده‌ ده‌بێت، چونکه‌ که‌ په‌یوه‌ندى ستراتیژى له‌گه‌ڵ لایه‌نێک هه‌بێت له‌ روئیاى ئه‌وه‌وه‌ ده‌ڕوانیته‌ مه‌سه‌له‌کان، هه‌ر له‌سه‌ر ئه‌م بنه‌مایه‌شه‌ مامه‌ڵه‌ى پارتى دیموکراتى کوردستان مامه‌ڵه‌ى به‌و جۆره‌یه‌ له‌گه‌ڵ ڕۆژئاواى کوردستان، گه‌مارۆى ده‌دات و پشتگیرى له‌و هێزانه‌ ده‌کات، که‌ له‌ڕۆژئاواى کوردستان ئاژاوه‌ ده‌نێنه‌وه‌، ئه‌و هێزانه‌ له‌ ئه‌ستانه‌ و ئه‌وشێوێنانه‌ ده‌رده‌که‌ون و داکۆکى له‌وه‌ ده‌که‌ن، که‌ یه‌په‌گه‌ بخرێته‌ لیستى تیرۆره‌وه‌، که‌چى پارتى پشتگیرى له‌و هێزانه‌ ده‌کات، ئێستا ده‌وڵه‌تى تورکیا کۆمه‌ڵکوژى به‌رامبه‌ر گه‌لى کورد ده‌کات له‌ باکور، که‌چى پارتى دیموکراتى کوردستان نه‌ک هه‌ر ئیدانه‌ى ناکات به‌ڵکو په‌یوه‌ندى ستراتیژى له‌گه‌ڵدا ده‌به‌ستێت، و به‌جۆرێک له‌ جۆره‌کان پشتگیرى ده‌کات، ئه‌مه‌یه‌ ڕێگره‌ له‌به‌رده‌م به‌ستنى کۆنگره‌ى نه‌ته‌وه‌یى.

 

- هۆکارى نه‌کشانه‌وه‌ى ئێوه‌ چیه‌ له‌شه‌نگال که‌ ئه‌مه‌ به‌شێکه‌ له‌ ناکۆکیه‌کانى ئێوه‌ و پارتى دیموکراتى کوردستان- عێراق؟.

 

 

"کاتێک مه‌ترسى له‌سه‌ر شه‌نگال نه‌ما و خه‌ڵکى شه‌نگال خۆیان توانیان خۆیان به‌ڕێوه‌ به‌رن ئێمه‌ ده‌کشێینه‌وه"‌

 

خه‌بات هه‌ولێرى: ئێمه‌ له‌به‌رئه‌وه‌ چووینه‌ شه‌نگال، که‌ ئه‌و هێزانه‌ى ئه‌وێیان ده‌پاراست چۆڵیانکردبوو، ئێمه‌ ڕۆشتین ئه‌وێمان پاراست، ئێمه‌ ده‌مانه‌وێت مه‌ترسى کۆمه‌ڵکوژى له‌سه‌ر ئێزدیه‌کان نه‌مێنێت،‌ ئه‌و خه‌ڵکه‌ى که ‌ده‌گه‌ڕێنه‌وه‌ دڵنیابن له‌وه‌ى که‌ کۆمه‌ڵکوژ ناکرێن، ده‌مانه‌وێت خه‌ڵى شه‌نگال خۆى خۆى به‌ڕێوه‌ به‌رێت، بۆچى ئێزدیه‌کان خۆیان خۆیان به‌ڕێوه‌ نه‌به‌ن، خۆیان هێزێکى خۆپاراستنیان نه‌بێت، ئه‌وان ئه‌زمونى ڕابردوویان هه‌یه‌ ٣ ى ئابى ٢٠١٤ له‌به‌ر چاوه‌، کاتێک مه‌ترسى له‌سه‌ر شه‌نگال نه‌ما و خه‌ڵکى شه‌نگال خۆیان توانیان خۆیان به‌ڕێوه‌ ببەن ئێمه‌ ده‌کشێینه‌وه‌.

 

-ئایا تا ئێستا ئێوه‌ پێتان وایه‌ ئه‌وه‌ پێک نه‌هاتووه‌، له‌کاتێکدا مه‌ترسى داعش له‌سه‌ر شه‌نگال که‌مبۆته‌وه‌ و ئێزدیه‌کانیش خاوه‌نى چه‌ند هێزێکى خۆیانن؟

 

"هێشتا به‌شێکى زۆر له‌ گونده‌کانى ده‌وروبه‌رى شه‌نگال له‌ده‌ستى داعشدایه‌"

 

خه‌بات هه‌ولێرى: تائێستا له ‌شه‌نگال مه‌ترسى کۆتایى نه‌هاتووه‌، هێشتا به‌شێکى زۆر له‌ گونده‌کانى ده‌وروبه‌رى شه‌نگال له‌ده‌ستى داعشدایه‌، یه‌که‌مجار ده‌بێت ئه‌وانه‌ ڕزگار بکرێن، دواى ئه‌وه‌ ده‌بێت پێوستى پاراستنى ئه‌و ناوچانه‌ دابین بکرێت، ئێستا هه‌ندێک هێز دروست بوون، بۆنمونه‌ ئێزدیه‌کان خۆیان هێزەکانى برخۆدانی شه‌نگالیان دروستکردووه‌، هێزەکانی ژنانى شه‌نگالیان دروستکردووه‌، هێزه‌کانى ئێزدى خان هه‌یه‌، پێویسته‌ ئه‌و هێزانه‌ بکرێنه‌ هێزى فه‌رمى له‌چورچێوه‌ى هه‌رێمى باشورى کوردستان، ئه‌وان خۆیان بپارێزن، با شه‌نگال وه‌کو هه‌رێمێکى سه‌ر به‌باشورى کوردستان بێت، به‌ڵام خۆیان خۆیان به‌ڕێوه‌به‌رن، ناکۆکى ئێمه‌ له‌گه‌ڵ براده‌رانى پارتى له‌سه‌ر ئه‌مانه‌یه‌.

 

- ئێوه‌ ئه‌م قسانه‌تان به‌پارتى دیموکراتى کوردستان-عێراق وتووه‌، یاخود هیچ په‌یوه‌ندیه‌ک له‌نێوان ئێوه‌ و پارتى دیموکراتى کوردستاندا ماوه‌؟

 

"دانیشتن و کۆبونه‌وه‌مان له‌گه‌ڵ پارتى هه‌بووه‌ و هه‌یه‌"

 

خه‌بات هه‌ولێرى: ئێمه‌ په‌یوه‌ندیمان له‌گه‌ڵ پارتى دیموکراتى کوردستاندا هه‌یه‌، به‌تایبه‌ت دواى ئه‌و لێدوانانه‌ى، که‌ له‌سه‌ر شه‌نگال درا، ئێمه‌ دانیشتن و کۆبونه‌وه‌مان له‌گه‌ڵ پارتى دیموکراتى کوردستاندا هه‌بووه‌ و هه‌یه‌، به‌ڕاستى ده‌مانه‌وێت به‌ باشکردنه‌وه‌ و ڕاستکردنه‌وه‌ى په‌یوه‌ندیه‌کانى ئێمه‌ و پارتى دۆزى نه‌ته‌وه‌یى و دیموکراتى به‌ره‌وپێش ببه‌ین، وه‌ زیاتر ڕه‌وتى ڕۆژئاواى کوردستان جێگیر بکه‌ین و باشورى کوردستان له‌م دۆخه‌ قه‌یراناوییه‌ ڕزگار بکه‌ین، باشورى کوردستان ببێته‌ پشتیوان و هاوکارى پارچه‌کانى تر، ئێمه‌ ده‌مانه‌وێت هه‌مومان پێکه‌وه‌ کۆنگره‌ى نه‌ته‌وه‌یى ببه‌ستین، ئه‌گه‌ر کۆنگره‌ى نه‌ته‌وه‌یى هه‌بوایه‌ ئیستا کێشه‌ و ناکۆکى نێوان لایه‌نه‌کان که‌م ده‌بووه‌ وه‌ و کۆنگره‌ ده‌بووه‌ شوێنى چاره‌سه‌رکردنى کێشه‌کان.

 

- له ‌باشورى کوردستان هێزى گه‌وره‌ پارتى و یه‌کێتى و بزوتنه‌وه‌ى گۆڕان و کۆمه‌ڵ و یه‌کگرتوى ئیسلامی-ن‌، ئایا ئه‌م لایه‌نانه‌ ئاماده‌ى کۆنگره‌ى نه‌ته‌وه‌یین؟

 

"پێویسته‌ ئه‌م کێشانه‌ چاره‌سه‌ر بکرێن"

 

خه‌بات هه‌ولێرى: له‌ باشورى کوردستان لایه‌نه‌کان ناکۆکییان له‌گه‌ڵ یه‌کدا هه‌یه‌ و هه‌ندێک لایه‌ن له‌ناو خۆیاندا کێشه‌یان هه‌یه‌، بۆیه‌ پێویسته‌ ئه‌م کێشانه‌ چاره‌سه‌ر بکرێن و به‌یه‌ک ئیراده‌ به‌ره‌و کۆنگره‌ى نه‌ته‌وه‌یى هه‌نگاو بنێین.

 

- پێت وایه‌ کات له‌به‌رده‌م ئه‌نجامدانى کۆنگره‌ى نه‌ته‌وه‌یى ئه‌وه‌نده‌ زۆر بێت که‌ چاوه‌ڕێى چاره‌سه‌رکردنى ناکۆکیه‌کان بکه‌ین و ئه‌وکاته‌ هه‌نگاو بۆ به‌ستنى کۆنگره‌ بنێین، یاخود ده‌توانین به‌ ناکۆکیه‌کانه‌وه‌ بڕۆینه‌ ناو کۆنگره‌یه‌کى نه‌ته‌وه‌یه‌وه‌، چونکه‌ زۆرجار کۆنگره‌ خۆى به‌شێکه‌ له‌چاره‌سه‌ر؟

 

"کاته‌که‌ زۆر هه‌ستیار و که‌مه‌"

 

خه‌بات هه‌ولێرى: کاته‌که‌ زۆر هه‌ستیار و که‌مه‌، ده‌رفه‌تى ئه‌وه‌مان پێنادات، من ناڵێم یه‌کسه‌ر پێویسته‌ کۆنگره‌ى نه‌ته‌وه‌یى ئه‌نجام بده‌ین، ئێمه‌ ده‌توانین کۆنفراسێکى نه‌ته‌وه‌یى ئه‌نجام بده‌ین و له‌و کۆنفرانسه‌دا ده‌توانین زۆر له‌ کێشه‌کانمان چاره‌سه‌ربکه‌ین، خاڵه‌ هاوبه‌شه‌کانمان بدۆزینه‌وه‌ و له‌سه‌رى کار بکه‌ین، خاڵى هاوبه‌شمان زۆره‌، ده‌بێت شته‌ ستراتیژیه‌کان به‌ئامانج بگرین، ئێمه‌ بۆ ئه‌وه‌ى هه‌رچى بکه‌وێته‌ سه‌رشانمان ئه‌نجامى ده‌ده‌ین.

 

- په‌یامى ئێوه‌ وه‌ک که‌جه‌که‌ بۆ گه‌لى کورد چیه‌ نزیکبونه‌وه‌ى هه‌ژده‌هه‌مین ساڵوه‌گه‌ڕى ده‌ستگیرکردنى عه‌بدوڵا ئۆجالاندا؟

 

"داوا له‌هه‌موو لایه‌ک ده‌که‌م که‌ له‌ چالاکییه‌کانیاندا به‌شداربن"

 

له‌ ١٨ هه‌مین ساڵوه‌گه‌ڕى ڕۆژى شومى ١٥ى شوباتدا، گه‌لى ئێمه‌ له‌ هه‌موو شوێنێک له‌سه‌ر پێیه‌ و چالاکى ئه‌نجام ده‌دات، له‌باشورى کوردستان وه‌ک  چۆن له‌ساڵى ١٩٩٩ دا چالاکى ئه‌نجام درا به‌هه‌مان شێوه‌ پێویسته‌ له‌ئێستاشدا چالاکى ئه‌نجام بده‌ن، وه‌ پێویسته‌ حزب و لایه‌نه‌ سیاسییه‌کان هه‌ڵوێستیان هه‌بێت دژ به‌و پیلانگێڕیه‌، وه‌ پێویسته‌ ڕێکخراوه‌کانى کۆمه‌ڵگاى مه‌ده‌نى به‌شدارى ئه‌و چالاکییانه‌بن، کۆمیته‌ى ئازادى بۆ ئۆجا‌لان هه‌ڵمه‌تێکى ده‌ستپێکردووه‌، داوا له‌هه‌موو لایه‌ک ده‌که‌م که‌ له‌ چالاکییه‌کانیاندا به‌شدار بن.

 

 

ش.ف

 

 

 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin