Smiley face
Smiley face
Smiley face

نێچیرڤان بارزانی ئامادەی کۆبوونەوەکەی مامۆستایانی ناڕازی نابێت

2017-01-12 09:53:50



ڕۆژنیوز – ڕێزان محەمەد

 

دوای کۆبوونەوەیان لەگەڵ ئەدهەم بارزانی، ئەنجومەنی مامۆستایانی ناڕازی لە شاری هەولێر لەگەڵ وەزیری پەروەردە کۆدەبنەوە، بێ ئەوەی نێچرڤان بارزانی ئامادەی کۆبوونەوەکە بێت.

 

دوای ئەوەی هەفتەی ڕابردوو ئەنجومەنی مامۆستایانی ناڕازی کۆبوونەوە لەگەڵ ئەدهەم بارزانی، سەرۆکی ئەنجومەنی سەرکردایەتی پارتی لە سلێمانی و هەڵەبجە و بارزانی بەڵێنی بە مامۆستایان دا، کە دیدارێکیان لەگەڵ نێچیرڤان بارزانی، سەرۆکی حکومەتی هەرێم و پشتیوان سادق، وەزیری پەروەردە بۆ ڕێکبخات، بڕیارە ئەمڕۆ شاندێکی ئەنجومەنی مامۆستایانی ناڕازی سەردانی ئەنجومەنی وەزیرانی حکومەتی هەرێمی کوردستان بکات و لەگەڵ وەزیری پەروەردە کۆببێتەوە.

 

 

عادل حەسەن، ئەندامی ئەنجومەنی مامۆستایانی ناڕازی لە شاری سلێمانی، بە رۆژنیوزی ڕاگەیاند:" کۆبوونەوەکە بۆ گەیاندنی داواکارییەکانی مامۆستایانە بە سەرۆکایەتی حکومەت".

 

 

وتیشی:" پێیان وتووین لە کۆبونەوەکەدا تەنیا وەزیری پەروەردە بەشدار دەبێت، بەڵام ئێمە ئەزمونمان لەگەڵ ئەم کۆبوونەوانەدا هەیە، زۆر جار خەڵکانی دیکەش بەشدار دەبن". 

 

عادل حەسەن، ئاماژەی بۆ ئەوەشکرد، کە ئەنجومەنی سەرکردایەتی پارتی لە سلێمانی و هەڵەبجە ئەم کۆبوونەوەیان ڕێکخستووە، بەڵام نازانین خۆیان بەشدار دەبن یان نا.


ناوبراو، وتیشی:"ئەگەر داواکارییەکانمان جێبەجێ نەکرێت دوای کۆبوونەوەکە، ڕاشکاوانە دەڵێین حکومەتی هەرێمی کوردستان نەیویست داواکارییاکانمان جێبەجێ بکات".

 

ئەو ئەندامەی ئەنجومەنی مامۆستایانی ناڕازی، ڕاشیگەیاند، کە داواکارییەکانیان هەمان داواکاری پیشوو نین، بەڵام ئامادەنەبوو ناوەڕۆکی داواکارییەکان ئاشکرا بکات و وتی:" هەتا دوای ئەنجامدانی کۆبوونەوەکە داواکارییەکانمان ئاشکرا ناکەین". 


سەبارەت بەوەی بۆچی ماوەی سێ مانگە حکومەت و وەزیری پەروەردە هاواری ئێوە نابیستێت و ئێستا لەگەڵتان کۆدەبێتەوە، عادل، وتی:" وادیارە بەهۆی ئەوەیە، کە پارتی لە خۆپیشاندان لەبەردەم  بارەگاکانی دەترسێت، هەرچەندە نازانین وەڵامی حکومەت چی دەبێت".

 

زیاتر لە سێ مانگە، بەشێک لەمامۆساتایانی شاری سلێمانی بایکۆتی دەوامیان کردووە و ناچنەوە بۆ هۆڵەکانی خوێندن.

 

داواکاری مامۆستایان لە رابردوودا، بریتی بوو لە خەرج کردنی مووچەکانیان لەکاتی خۆیدا و قەرەبووکردنەوەی مووچە فەوتەوەکانیان و هەڵگرتنی سیستمی پاشەکەوتی مووچە.

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin