Smiley face
Smiley face
Smiley face

بەڕێوبەری بەرێوبەرایەتی ئاوی سلێمانی بێ ئاگایە لە بەفیڕۆچوونی ئاوی خواردنەوە

2017-01-12 09:01:58



ڕۆژنیوز – ڕێزان محەمەد

 

ڕۆژنیوز بەداوداچوون بۆ ڕژان و بەفیڕۆچوونی ئاوی پاکژی خواردنەوە دەکات لەبەردەم فەرمانگەی دابەشکردنی ئاوی دەباشان و بەڕێوبەری بەڕێوبەرایەتی ئاوی سلێمانی-ش بێ ئاگایی خۆی لە شکانی ئەو بۆرییە نیشاندەدات.

 

ماوەی زیاتر لە ١٠ ڕۆژە لە بەردەم بینای فەرمانگەی دابەشکردنی ئاوی دەباشان لەسەر شەقامی بازنەیی مەلیک مەحمود، بەهۆی هەڵکەندنی بەشێک لەو ڕێگەیە بەمەبەستی چاککردنی بۆری ئاوی ئەو کۆڵانانە لەلایەن بەڕێوبەرایەتی ئاوی سلێمانیەوە، ئاوی پاکژی خواردنەوە دەرژێتە سەر شەقامەکە و بە فیڕۆ دەڕوات.

 

بەمەبەستی بەدواداچوون بۆ ئەم کێشەیە، ڕۆژنیوز سەردانی فەرمانگەی دابەشکردنی ئاوی سلێمانی- دەباشان-ی کرد، بەڵام پۆلیسی فەرمانگەکە پێی ڕاگەیاندین، کە بەڕێوبەر ڕۆشتۆتەوە و ئەم بابەتەش پەیوەندی بە بەڕێوبەرایەتی ئاوی سلێمانی-یەوە هەیە.

 

پاشان پەیوەندیمان کرد بە سەربەست عوسمان، بەڕێوبەری بەڕێوبەرایەتی ئاوی سلێمانی و ئاگادارمان کردەوە لە شکانی ئەو بۆرییە، بەڵام ئەویش بێ ئاگایی خۆی نیشاندا و وتی:" ئاگاداری ئەو کێشیە نیم، نیو کاتژمێری دیکە پەیوەندیم پێوەبکەنەوە".

 

پاش نیوکاتژمێرەکە و دوای ئەوەی زانیاری لەسەر ئەو کێشەیە بەدەستهێنا، سەربەست عوسمان، بە رۆژنیوز ڕاگەیاند:"ماوەی زیاتر لە ١٠ ڕۆژە ئەو ڕێگەیە هەڵکەندراوە بەمەبەستی کارکردن لە بۆریەکەدا، بەڵام بەهۆی بەکارهێنانی ئامێری حەفر بۆریەکی ئاوی پاکژ کون بووە و ئاوی لێدەڕوات".

 

سەبارەت بە هۆکاری چاکنەکردنی لەماوەی ئەو ١٠ ڕۆژەدا، سەربەست عوسمان وتی:" بەهۆی خراپبوونی حەفارەکەمان چاککردنی ئەو پرۆژەیە دواخراوە، تەنها یەک حەفارەشمان هەیە بۆیە نەمان توانیوە کە زوو چاکی بکەینەوە".

 

بەڕێوبەری بەڕێوبەرایەتی ئاوی سلێمانی، وتیشی:" ئەمڕۆ و هەینی ئاوی گەڕەکەکانی ئەو ناوچەیە دەبڕین و ئەو بۆریە چاکدەکەین و ناهێڵین چیتر ئاوی پاکژ بەفیڕۆ بڕوات".

 

جێگای باسە، کە بەفیڕۆچوونی ئەو ئاوە پاکژە لەبەردەم بینای فەرمانگەی دابەشکردنی ئاوی دەباشان-ە، کە یەکێک لە دروشمانەی ئەو فەرمانگەیە هەڵیگرتووە بریتییە لە "ئاوی پاکژ بە فیڕۆ مەدە".

 

 

 

 

 

 

ش.ف
 



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin