Smiley face
Smiley face
Smiley face

بایكۆت كاریگەری لەسەر دەروونی خوێندكاران و مامۆستایانیش دروستكردووە

2017-01-12 08:30:32



ڕۆژنیوز – جیهاد هەورامی

 

ئەگەرچی دەوام لە سنوری پارێزگاکانی سلێمانی و هەڵەبجە ئیدارەکانی گەرمیان و ڕاپەڕین دەستیپێکردووەتەوە، بەڵام هێشتا لەو شوێنانە چەندین مامۆستا بایکۆتیان نەشکاندووەو ئامادەنین بچنەوە هۆڵەکانی خوێندنەوە، ئاماژە بەوەشدەکەن بایكۆت كاریگەری لەسەر دەروونی خوێندكاران و مامۆستایانیش هەبووە.

 

خوێندکارێکی ئاماژە بەوەدەکات بە دەوامی بەشێک لە مامۆستایان ئەو کاریگەرییە چاکنابێت کە بایکۆت دروستیکردووە، مامۆستایەکیش دەڵێت، چوونەوە ناو هۆڵەکانی خوێندن مانای ڕازیبوونمان نییە بە دۆخەکە، مامۆستایەکی ناڕازیش دەڵێت: یەكێك لە پەیامە گرنگەكانی بایكۆت دەرخستنی لایەنی شاراوەی دەسەڵاتدارانبوو.

 

خوێندكارێكی پۆلی نۆیەمی بنەڕەتی بەناوی بانو ئەحمەد، بۆ ڕۆژنیوز دواو وتی:" بایكۆتی مامۆستایان كاریگەری زۆر خراپی لەسەر پڕۆسەی خوێندن و دەوامی ئێمە هەبووە، بە تایبەت لە دواكەوتنی دەوامەكەمان و نەخوێندنی مەنهەج لەو ماوەیە كە بەپێچەوانەوەی لەو شوێنانەی كە بایكۆت نەكرابوو پڕۆسەی خوێندن ئاسایی بوو، ئێمەش لەماڵەوە بە قەلەقی لە چاوەڕێی كردنەوەی دەرگای خوێندنگاكانمان بوین".

بانو، وتیشی:" كردنەوەی دەرگای خوێندنگاكان و گەڕانەوەی بەشێك لەمامۆستایان ئەم بارودۆخەی ئێمە چاك ناكات، چونكە فشارێكی زۆرمان لەسەرە بۆ تەواوكردنی ئەو مەنهەجەی كە لەماوەی سێ‌ مانگی پێشوو نەمانخوێندووەو لەگەڵ ئەوەشدا بەشێك لەمامۆستایان مەنهەجی كتێبەكانیان بۆ كردوین بە مەلزەمە و زۆر شتیان لێ‌ تەرك كردووە، ئەمەش زیانی بۆ ئێمەی خوێندكارە كە بەشێكی مەنهەج فێرنابین".

 

مامۆستایەكی ناڕازیش بەناوی بەنان بەهادین، ئەوەی بە ڕۆژنیوز ڕاگەیاند:" بایكۆتی هۆڵەكانی خوێندن لەلایەن مامۆستایانەوە بۆ داواكردنی مافەكانی بووەو ئەوەی كەمتەرخەمی كردووە حكومەتی هەرێمە كە تا ئێستا وەڵامی داواكاریەكانی مامۆستایانی نەداوەتەوە، هەر بۆیە پاش تێپەڕبوونی نزیكەی چوار مانگ لەسەر بایكۆت، بەشێكمان گەڕاینەوە هۆڵەكانی خوێندن لەبەر بەرژەوەندی خوێندكاران و نەفەوتانی ساڵێكی خوێندنیان".

مامۆستا بەنان، ئاماژەی بەوەشدا:" گەڕانەوەمان بۆ دەوام بە مانای وازهێنان نیە لەو داوایانەی كە زیاتر لە سێ‌ مانگە لەسەر شەقام هاواری بۆ دەكەین، بەڵكو لەئێستاشدا سورین لەسەر جێبەجێكردنی داوا ڕەواكانی خۆمان، بەڵام بەداخەوە بێ‌ هەڵوێستی و وەڵام نەدانەوەی حكومەت ئەم دۆخەی خولقاندوە كە كەرتی پەروەردە بەكەموكورتی و شپرزەیی بەڕێوەدەچێت و تا ئێستاش هەندێ‌ لەخوێندنگاكان داخراون".

 

 

مامۆستایەكی ناڕازیش بەناوی هوشیار ئەحمەد کە تا ئێستا بەردەوامە لە بایکۆت، بە ڕۆژنیوزی وت:"بایكۆت خەباتێكی مەدەنیانە و سەردەمیانەیە كە تاكی باشوری كوردستان هەستیبەوە كرد لەم ڕێگەیەوە داوای مافە ڕەواكانی خۆی بكات و بەردەوام بونیشی بۆ زیاتر لە ١٠٠ ڕۆژ سەلمێنەری ئەو راستیەیە و سەلماندی كە كێ‌ لەگەڵ مافی ڕەوای مامۆستایان و فەرمانبەرانە و لەخەمی بەرەوپێش چونی وڵات و پەروەدەیە".
 
هوشیار ئەحمەد، وتیشی:"یەكێك لە پەیامە گرنگەكانی بایكۆت دەرخستنی لایەنی شاراوەی ئەو كەس و دەسەڵاتدارانەبوو كە چۆن لەپێناو بەرژەوەندی تاك و حزبی خۆیان ئامادەن ژیانی میلەت بكەنە قوربانی و دەیانەوێ‌ لەڕێگەی فشارو سزادان بایكۆت بەمامۆستایان بشكێنن، هەرچەندە بایكۆت كاریگەری خراپی لەسەر پڕۆسەی خوێندن داناوە، بەڵام مامۆستایان تەنها لەپێناو بەدەستهێنانی مافە ڕەواكانی خۆیان ئەم ڕێگا مەدەنیانەیان هەڵبژاردو ئامادەنەبوون چیتر بەگوێی‌ حزب و لەژێر فەرمانی ئەو واز لە مافەكانی بهێنێت".
 

لەسەر هەمان پرس بەناز عومەر، بەڕێوەبەری خوێندنگای سازگاری كچان بەم جۆرە بۆ ڕۆژنیوز دوا:" بایكۆتی مامۆستایان كاریگەری لەسەر دەرون و مێشكی خوێندكاران داناوە كە دوای تێپەڕبونی زیاتر لەسێ‌ مانگ و گەڕانەوەیان بۆناو پڕۆسەی خوێندن دەبینین بێتاقەتی و بێزاربونیان پێوە دیارەو زۆربەی مامۆستایانیش كاتێك لەبایكۆت بەردەوام نەبوون، لەبەر بەرژەوەندی خوێندكاران گەڕانەوە، ناتوانین ئەركی خۆیان بەجوانی بەڕێوە ببەن".

بەناز عومەر، وتیشی:" من هەر لەسەرەتاوە لەگەڵ بایكۆتدا نەبوم، چونكە چاوەڕێی ئەوەم دەكرد كەحكومەت هیچ وەڵامێكی نیە بۆ جێبەجێکردنی داواكاریەكانمان، تەنها فەوتانی زیاتر لە سێ‌ مانگی خوێندنی خوێندكاران بوو، لە ئێستاشدا كە دەرگای خوێندنگاكانمان كردوەتەوە بە جۆرێك شپرزین كە نازانین چۆن قەرەبووی ئەو ماوەیە بكەینەوە و میكانیزمێكیش نیە تاوەكو بتوانین تاكۆتایی ساڵ وانەكان بەخوێندكاران بڵێینەوە".

 

ئەو بەڕێوەبەرە ئاماژەی بەوەشدا:"حكومەتی هەرێم بەرپرسە لە خوڵقاندنی ئەم بارودۆخەی كەرتی پەروەردەو پێویستە ئاوڕێكی جدی لەمامۆستایان بداتەوەو داواكاریەكانیان جێبەجێبکا‌بكات بۆ ئەوەی بۆ ساڵانی داهاتوش توشی ئەم گرفتە نەبینەوە لەگەڵ ئەوەشدا پێویستە مامۆستایانی ناڕازی یەك جۆر هەڵوێستیان هەبێت، یان بەردەوام بن لەسەر بایكۆت تاكۆتای،ی یان‌ بایكۆت نەكرێت و بەجۆرێكی تر داوای مافەكان بكرێت".

 

س.ح



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : rojnewsso@gmail.com
© Copyright 2015 . Hemû mafên portala ROJNEWS Ajansa Nûçeyan a Roj hatine parastin