Smiley face
Smiley face
Smiley face

یەکێتی و پارتی و ڕاگەیەندراوێکی هاوبەشیان بڵاوکردەوە

2017-01-11 14:48:12



ڕۆژنیوز – ناوەندی هەواڵەکان

 

کۆبونەوەی شاندی یەکێتی نیشتیمانی کوردستان و پارتی دیموکراتی کوردستان- عێراق لە پیرمام کۆتایی هات و هەردوولا ڕاگەیەندراوێکی هاوبەشیان بڵاوکردەوە.

 

پێش نیوەڕۆی ئەمڕۆ کاتژمێر١١:٠٠ لە مەکتەب سیاسی پارتی دیموکراتی کوردستان-عێراق لە پیرمام یاکێتی نیشتیمانی کوردستان و پارتی دیموکراتی کوردستان-عێراق کۆبونەوە و کاتژمێر ١:٣٠ خولەک کۆبوونەوەکە کۆتایی هات، ئێستاش مەکتەبی سیاسی هەردوولا ڕاگەیەندراوێکی هاوبەشیان بڵاوکردەوە.

 

لە ڕاگەیەنداروەکەدا هاتووە:" ئەمڕۆ شاندی مەکتەبی سیاسیی ھەردوولا لە شاری ھەولێری پایتەخت کۆبوونەوە و ئەم بابەتانەیان خستە بەر باس و گفتوگۆ:

 

یەکەم: پێوەندیی نێوان ھەروولا: بۆ زیاتر پتەوکردن و پەرەپێدان و گونجاندنی پێوەندییەکان بەپێی ئەرکەکان و ھەلومەرجی نوێ، بەتایبەتی لە بواری حوکمڕانی و پەیوەندییە کوردستانییەکان و پەیوەندی ھەرێم لەگەڵ حکومەتی فیدرال و وڵاتانی ناوچەکە و جیھاندا، کە لە ئاست گۆڕانکارییە خێرا و زۆرەکانی ئەم قۆناغەدا بێت و لە بەرژوەندیی گەلی کوردستاندا بێت.

 

دووەم: ھەوڵدان بۆ چارەسەری کێشە و گرفتەکانی ھێزە سیاسییەکانی پارچەکانی دیکەی کوردستان و ڕێزگرتن لە سەروەری یاسا و دەستوەرنەدان لە کاروباری یەکتر.

 

سێیەم: چۆنیەتیی چارەکردنی قەیرانی دارایی کە بەرۆکی خەڵکی کوردستان بەگشتی و مووچەخۆرانی بەتایبەتی گرتووە، بۆیە ھەردوولا پاڵپشت و ھاوکار بین بۆ حکومەتی ھەرێم و دەزگا پەیوەندیدارەکان لە دۆزینەوەی ڕێگای چارەکردن و ئەنجامدانی چاکسازی لەو بوارانەی پێویستن کە ببێتە مایەی دابینکردنی بژێوی کۆمەڵانی خەڵک و دابینکردنی مووچە بۆ مووچەخۆران و گرنگیدان بە بواری نەوت و گاز و دابینکردنی شەفافیەتی زیاتر و پێویست.

 

چوارەم: دانانی ڕێوشوێنی گونجاو بۆ چارەسەری کێشە بنەڕەتییەکانی ھەرێمی کوردستان لەپێش ھەموویانەوە کاراکردنەوەی پەرلەمانی کوردستان.

 

پێنجەم: دانانی کۆمیتەیەکی ھاوبەش کە نوێنەرایەتیی لایەنە سیاسییەکانی کوردستان و پێکھاتە نەتەوەییەکان لەخۆ بگرێت، بەمەبەستی گفتوگۆکردن لەگەڵ حکومەتی عیراق و ھەر لایەنێکی پەیوەندار بۆ یەکلاکردنەوەی پرسی ناوچەکانی ماددەی١٤٠ لە ئایندەیەکی دیاریکراودا، ئینجا ڕیفراندۆم و سەربەخۆیی کوردستان.

 

شەشەم: کۆبوونەوەکانی نێوان ھەردوولا بەردەوام دەبن بۆ ئەوەی بە زوویی بگەینە ڕێککەوتنێک کە سەرەنجام بتوانین کۆی کێشەکان چارەسەری گونجاوی بۆ دابنێین".

 

لە کۆبوونەوەکەی ئەمڕۆدا، کۆسرەت ڕەسول، جێگری یەکەمی سکرتێری یەکێتی، مەلا بەختیار لێپرسراوی دەستەی کارگێری مەکتەبی سیاسی و حاکم قادر و عومەر فەتاح ئەندامانی دەستەی کارگێری و ڕزگار عەلی، سەعدی ئەحمەد پیرە، ئەرسەلان بایز و شێخ جەعفەر ئەندامانی مەکتەبی سیاسی یەکێتی، بەشداربوون.


شاندی پارتیش پێکهاتبوون لە نێچیرڤان بارزانی جێگری سەرۆکی پارتی دیموکراتی کوردستان و فازڵ میرانی سکرتێری مەکتەبی سیاسی و عیزەدین بەرواری و مەحمود محەمەد و ڕۆژ نوری شاوەیس، کاکەمین نەجاڕ و دڵشاد شەهاب ئەندامانی مەکتەبی سیاسی پارتی، ئەندامی شاندی پاتی بوون.


ش.ف



-
RojNews
په‌یوه‌ندی


Korek       : +964 7508749379

Asia          : +964 7718835920

Normal     :   +964 533361295

Email  : [email protected]
© Copyright 2015 . Hemû mafên portala ROJNEWS Ajansa Nûçeyan a Roj hatine parastin